Choose Language
Old Testament Books
New Testament Books
view with a second Bible
1 Та хōталытт Иоан Витн тӯлнэ хум ёхталас ос Юдея мир ōлтāл мāт Тōрум лāтыӈ тотыс.2 Ос лāвыс: ”Тōрум нупыл ё̄ӈхēн, тōрум йильпи нот*а ля̄пан ты ёхтыс”.3 Тав таи ты, хотъют урыл Тōрум лāтыӈ тотнэ хум Исая лāвыглалыс: ”Мир ōлтāл мāт турсуй суйты: ‘Кӯсяй мāгыс лё̄ӈх сё̄питэ̄н, Тавēн сохт, састум лё̄хъясыт сё̄питэ̄н’”.4 Такви Иоан маснутанэ верблюд пуныл сагим ōлсыт, э̄нтапет сов э̄нтап квāлыг ōньсяс; саранча*б ос мāг тэ̄пыг тэ̄с.5 Тōнт сāв Иерусалим ос пуссын Юдея ос Иордан мувлахи мāт ōлнэ мир тав палтэ кон-квāлыглалсыт.6 Тāн Тōрум нупыл ё̄хсыт, ос тав тāнаныл Иордан витн янытаныл тӯлыглалыс.7 Хунь Иоан тав нупылэ сāв фарисей ос садукей*в мир ё̄мнэ̄ныл кāсалас, тāн нупланыл лāвыс: ”Ялпыӈӯйныл тэ̄лум утыт! Хōӈхан нāн Тōрум э̄лаль ōлнэ лавныл сысы оюӈкве палямтавесы̄н?8 Ёмас вāрмаль вāрēн, вос нāӈки, хумус нāн Тōрум нупыл ё̄ӈхысы̄н.9 Наскассыг ул лāвēн: ‘Мāн āсюв Авраам’; ам нāнанн ты лāвēгум, Тōрум ты āхвтасытныл Авраам ня̄врамыт вāруӈкве вēрми;10 Алам сāграп йӣв тытыт тāсыг хуи: ёмас пилн ат тэ̄лнэ кāсыӈ йӣв ёл-сāграве ос нāйн воськасаве тах.11 Ам нāнан Тōрум нупыл ё̄хнэн мāгыс витн тӯлыянум, ос ам юи-пāлумт Йинэ ут āнумныл усьпылнэ̄г ё̄рыг ōлы; Тав лāгыл маснутаге тотуӈкве ам ат хōйхатэ̄гум; Тав нāнан Ялпыӈ Лылыл ос нāйл пинуӈкве паты;12 Тав кāтэт мāнтэ ōлы ос Тав колассам анятэ сыстамты тах. Колассамыт Такви ōсилэ̄н акван-атыянэ, ос тōсам ня̄нь пумыт харыглаттāл нāйин тыттыянэ”.
13 Тōнт Ӣсус Галилея мāныл Иоан палт Иордан я̄ вāтан витн тӯлнэ мāгыс ёхтыс.14 Иоан Таве пувыстэ ос лāвыглас: ”Āнумн Наӈыныл э̄ри витн тӯлуӈкве, Наӈ ос ам палтум ёхтысын!”15 Ос Ӣсус ювле-лāвыс: ”Ань тох вос ōлы, хумус Тōрум тахнэ сирыл вēськат вос ēмты”. Тōнт Иоан Таве та тāратастэ.16 Ос витн тӯлыглым юи-пāлэ̄т Ӣсус тāра витныл паг-квāлыс, – ос тувыл та, Тавēн тōрум пāлыг-пӯсхатас, ос Тав Тōрум Лылы та кāсаластэ, Тав голубь*г хурипал ёл, Тав тармылэ ты тāратахтас.17 Ос нуми тōрумныл суйтыс: ”Ты Ам я̄тил Пыгквем ты, Тав Ам сымум э̄рнэ Пыгквем”.
*а 2 3:2 Тōрум йильпи нот – ты русь лāтӈыл Царство Божье
*б 4 3:4 саранча – тэ̄пканыт тэ̄лтнэ тэ̄нут холтнэ хомлах хурипаг нумӯйит
*в 7 3:7 садукей – религия ос политика партияныл э̄лумхōлас
*г 16 3:16 голубь – тōвлыӈ ӯй
Глава 3
