Choose Language
Old Testament Books
New Testament Books
view with a second Bible
1 Ӣсус Юдея мāт Вифлеем ӯсыт самын патме порат тот Ирод нампа хум хōныг ӯнлыс. Тōнт хōтал нэ̄глын ēрыл номтыӈ хумит Иерусалимн ёхтысыт, ос лāвēгыт:2 ”Усьты самын патум Юдея Хōн хōт ōлы? Тав нэ̄глапам тōрум сове мāн кāсалāлыслув ос Тав палтэ пуӈк пинуӈкве ёхтысув”.3 Ты лāтӈыт хӯлмēт, Ирод-хōн ос пуссын Иерусалим мир тав ётэ хот-рохтысыт.4 Пуссын пӯп-ōйкат кӯсяит*а ос Сāккон ханисьтан хумит*б акван атсанэ ос китыгласанэ, Кристос самын патуӈкве хōт э̄рыс.5 Тāн тавēн лāвсыт: ”Юдея мāт Вифлеем ӯст, тох Тōрум лāтыӈ тотнэ хум нэ̄пакет хансым ōлыс:6 ‘Ос наӈ, Иуда мāт ōлнэ Вифлеем, Иуда канасит ӯсанылныл сяр мāнь āти кос; наӈынныл тах Канась ēмты, Тав Ам Израиль мирум ӯрытэ тах’”.7 Тōнт Ирод сытамхалт номтыӈ хумит атсанэ, тōрум сов нэ̄глын пора урыл ёмсякв китыгластэ.8 Номтыӈ хумит Вифлеемн кēтсанэ ос лāвыс: ”Минэ̄н, ёмсякв Ня̄врам урыл китыглахтэ̄н. Хунь Таве хōнтылы̄н, āнумн ля̄ххал тотэ̄н, ам ос Тавēн тах пуӈк пинэ̄гум”.9 Тāн хōн лāтӈыт хӯнтласаныл, та минасыт. Ос тāн кāсаласаныл, хумус тōрумт нэ̄глум сов тāн э̄лы-пāланылт та минас. Тувыл Ня̄врамакве ōлум мā нуми-пāлн ёхтыс, ёл та пōйтыс.10 Хунь тāн сов кāсаласыт, сяр яныг ся̄гтылыл хот та ся̄гтсыт.11 Хунь кол кӣвырн сялтсыт, Ня̄врам Мария ся̄не ёт та кāсаласаныл. Тāн сāнспуӈк ӯнтым Тавēн пуӈк та пинсыт, тāнти хусапаныл пāлыг-пӯнссаныл ос мӯйлупсат Тавēн тотсаныл: сōрни, ладан ос смирна нампа атыӈ саранōх.12 Номтыӈ хумит хуиманыл порат Тōрум тāнанылн лāвыс: Ирод палт воссыг ул вос минэ̄гыт, ос мōт лё̄ӈх хосыт тāнки мāнанылн та минасыт.
13 Хунь номтыӈ хумит минасыт, Ӯсюп хуиматэ порат Кӯсяй Ангел тав палте нэ̄глыс ос лāвыс: ”Нōх-квāлэн, Ня̄врам ос Тав Ся̄не вуегы̄н, Египет мāн оен, ос тот ōлэн, ам лāвнэм тāл ювле ул ёхтэн. Ирод Ня̄врам кинсуӈкве ос алуӈкве таӈхитэ”.14 Ӯсюп э̄ти та нōх-квāлыс, Ня̄врам ос Тав Ся̄не ёт висаге ос Египетн та минас.15 Ос тот тав Ирод сорме мус та ōлыс. Тох та ēмтыс, хумус Кӯсяй такви лāтыӈ тотнэ хум сирыл лāвыс: ”Египет мāныл Амки Пы̄гум Ам вōвыслум”.16 Тōнт Ирод торгамтастэ, тав номтыӈ хумитн лāплувес, тав сяр хот-кантмувес ос пуссын кит тāл яныт ос мāньнув хум ня̄врамыт Вифлеем ӯсыт ос та ӯс ēрыт сяма алуӈкве кēтыс. Та пора урыл тав май номтыӈ хумитыл сāртын ёмсякв-китыглахтас.17 Тōнт Еремей нампа Тōрум лāтыӈ тотнэ хум сирыл та ēмтыс, тав май лāви:18 ”Рōхсуй Рамат суйты, лю̄ньсь ос яныг лю̄ньсь. Рахиль такви ня̄враманэ урыл лю̄ньси, тāн āтимыг ēмтнэ̄ныл мāгыс, лю̄сьнэтэ̄ныл ёл-пōйтуӈкве ат таӈхи”.
19 Хунь Ирод сорумн патыс, Ӯсюп хуйнэтэ порат тав палтэ Египетт Кӯсяй Ангел нэ̄глыс20 ос лāвыс: ”Нōх-квāлэн, Ня̄врам ос Тав Ся̄нэ вуēгын ос Израиль мāн мӣнэн. Хотъютыт Ня̄врам алуӈкве тахсыт, ань сорумн патсыт”.21 Ӯсюп нōх-квāлыс, Ня̄врам ос Тав Ся̄не ёт висаге ос Израиль мāн та ёхтыс.22 Хунь хӯлыстэ, насати Архелай ань Ирод āсе пēнтсыл Юдея мāт хōныг ӯнлы, тав тув минуӈкве хот-рохтыс. Э̄т ӯлмēн хӯлтым сирыл Ӯсюп Галилея мāн та минас.23 Ос тув ёхтумēт Назарет нампа ӯсын ōлмыгтас. Тōрум лāтыӈ тотнэ хумит лāвме сирыл сōль ēмтыс: Тав Назарей намыл пинаве тах.
*а 4 2:4 пӯп-ōйкат кӯсяй – ты русь лāтӈыл первосвященник
*б 4 2:4 Сāккон ханисьтан хум – ты русь лāтӈыл учитель Закона, книжник
Глава 2
