Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ФИЛИПП И ЭФИОПИЯНЬ ОЦЮ ШИРЯЗ
Весть Шкаень ангелсь мярьгсь Филипп диаконти: «Стяк и архт шиньгучкань пяли, Ерусалимста Газу вяти кити, кона шава». Сон стясь и тусь. Тя ёткть тёждя крандаскаса ардсь тя киге оцю ширяз, Эфиопиянь оцязоравать сембе козяшинц ванфтыец. Сон сашендсь Ерусалиму сюконяма, а тяни мрдась меки и ки кувалма лувсь Исаия шкаймаряйть книганц.
Ваймопожфсь мярьгсь Филиппонди: «Архт и петть тя крандаскяти». Маладомста Филипп марязе, оцю ширязсь лувондсы Исаия шкаймаряйть, мярьгсь: «Шарьхкодят, мезе луват?» Ся каршезонза: «Коста шарьхкодян, кда кивок аф тонафтсамань?» Мярьгсь Филиппонди куцемс и озамс ваксозонза. Сёрматфса сон лувондозе вов тя вастть: «Кода уча сон вятьфоль печкомс, и кода вероз нараензон инголе вайгяльфтома, тяфта сон ашезе панчсе кургонц. Лангсонза пеедезь-наругазь тиевсь судсь, аньцек кие азондсы сонь юромонц? Вдь сонь эряфоц сявови мода лангста».
Оцю ширязсь мярьгсь Филиппонди: «Эняльдян, азк: кинь колга тяфта корхтай шкаймаряйсь? Эсь колганза али киньге лиянь?» Сёрматфонь тя вастста ушедозь, Филипп кармась азондома Исусонь колга.
Тя пингть кисна прась вчёк ведь малас; оцю ширязсь мярьгсь: «Вов ведь. Мезе тейне шоряй кстиндафтомс пря?» Филипп каршезонза: «Кемандярят марнек седиса, ули кода тянь тиемс». Ся мярьги: «Кеман, Исус Кристос Шкайть Цёрац». Мярьгсь лоткафтомс крандасканц, и кафцьке валгсть ведти, Филипп кстиндазе сонь. Мзярда лиссть ведьста, Иняру Ваймопожфсь апак учт сявозе тоста Филиппонь. Ширязсь оду ашезе няе ни сонь и кеняртькшнезь поладозе эсь кинц.
Шкайсь аф ваны ломанть шаманц, масторонц, кяленц лангс, но «эрьсь, кие тердьсы Азорть лемонц, идеви».
ТЕФНЕ 8:26-39
454 
