Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ИСУС ВЕЛЬМОФТСЫ ЛАЗАРЕНЬ
Весть Бетания велеста сась Исусонди пичефксу куля. Марфа и Мария сазорхне пачфнесть тейнза Лазарь альнякаснон сярядеманц колга: «Азороньке, кельгома ялгаце сяряди». Тянь кулемста Исус мярьгсь: «Тя урмась аф куломанди, а Шкаень иневалдонди, тянь вельде кеподевоза Шкаень Цёрать лемоц». Тяда меле сон эрясь нинге кафта шит сяка вастса, сяльде тусь Бетанияв, мзярда содазе ни – Лазарь кулось.
Ламоц иудейхне сашендсть Марфанди и Мариянди кулоф альнякаснон инкса ризфснон явома. Марфа няезе Исусонь, мярьгсь тейнза: «Азорозе! Улендярялеть тяса, афоль кула альняказе. Аньцек тянивок содаса, Шкайсь макссы тейть, мезе анат кядьстонза». Исус каршезонза: «Вельмай альнякаце... Мон – вельмамась и эряфсь; эзон кемайсь кулондяряйге – вельмай. Эрь эряйсь и эзон кемайсь мзярдонга аф кулы. Кемат тянди?» Марфа мярьгсь: «Тяфта, Азорозе! Кеман, тон Кристоссь, Шкаень Цёрась, конанди эрявсь самс масторлангу». Меле сон тусь и серьгядезе Мария сазоронц. Исус кодак няезень авардезь сайхнень – Мариянь и мархтонза иудейхнень, сонценьге ваймопожфоц ризназевсь, мярьгсь: «Коза путость Лазарень?» Сят каршезонза: «Азороньке! Архт и ванк». Исус маладсь пандапотмарти, коса калмафоль Лазарь. (Ся масторса эста калмосельхть пандапотмарс, сувама вастть нежетькшнелезь кевса.) Исус мярьгсь шашфтомс кевть, тянь каршес Марфа мярьгсь, кле, Лазарь ниле шит ни ащи лазксса. Исус каршезонза: «Кали ашень мярьге тейть: кармандярят кемама, няйсак Шкаень иневалдть?» Мзярда кевсь веляфтфоль, Исус кеподезень сельмонзон менели, мярьгсь: «Аляй! Сюконян тейть кулеманксон... мон содайне, тон фалу кульсамак монь...» Тянь азомда меле сон кайгиста серьгядсь: «Лазарь! Листь тоста!" Кулофсь лиссь, кядьга-пильгова калмамань котфса ашкотфста...»
Ламоц иудейхне тя ацермать няемста кемасть Исусонди, аньцек фарисейхне и озксонь прявятихне кочкасть пуромкс арьсемонза, кода шавомс Исусонь.
ИОАНН 11:1-50
376 
