Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ЮМАФ-АРАФ ЦЁРАТЬ МРДАМАЦ
«Аляц ичкоздекиге няезе цёранц и ужяльдезь люпштавсь седиец; ласьксь каршезонза, лаподсь кргазонза и ушедсь палсемонза. Цёрац мярьгсь тейнза: "Аляй! Мон пежетьс сувафтыне ваймозень менельть и тонь инголет, аш кода ни монь лемдемска тейть цёракс". Аляц мярьгсь урензонды: "Кандода цебярь щам, щафнесть сонь, суркска тонгода сурозонза, карьсембяльге – пильгозонза. Вятеда антф вазня и печкость: карматама ярхцама и кеняртькшнема! Вдь тя цёразе кулофоль, тяни вельмась, юмсесь и мувсь". Тисть ила.
Оцю цёрац паксясоль. Мрдамста маладсь кудснонды и кульсь морамат-кштимат. Сон серьгядезе покодихнень эзда фкять, кизефтезе: "Мезе тя?" Ся мярьгсь каршезонза: "Дуганце мрдась, и аляце печксь антф вазня, сяс мес сон мрдась шумбраста-парста". Оцю цёрась кяжиясь, кудунга ашезь ёра сувамс. Аляц лиссь, тердезе сонь. Аньцек сон мярьгсь алянц каршес: "Няк, мон тняра киза покодян, мзярдовок ашень моле туркс валцень каршес, но тон мзярдовок ашеть макссе тейне ялганень каванямс сява вероскявок! Ина кодак сась ва тя цёраце, кона юводозе уликсонц усксеви аватнень мархта, тон печкоть тейнза антф вазня!"
Аляц мярьгсь тейнза: "Цёрай! Тон фалу мархтонат, сембе моннесь тонне, а сянкса эряви кеняртькшнемс, мес дуганце кулофоль и вельмась, юмсесь и мувсь».
ЛУКА 15:20-32
374 
