Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
3. КЕЛЬГОМАТЬ И ОЗОНДОМАТЬ КОЛГА
«Тинь кулесть, мезе азф: "Сельмонкса сельме, пейнкса пей". Ина мон корхтан тейнть: кяжть каршес тят моле. Кие эрьхттянза види шамамарьти, ладяк тейнза кержитьке; кинь мялец судендамс мархтот и нельгомс панарцень, макск тейнза вярдень щамценьге; кие мольфттянза мархтонза фкя вайгяльбе, мольхть мархтонза кафта. Кядьстот анайти макст и пандомда анайть эзда тят шарфне.
Тинь кулесть, мезе азф: "Кельк маластоцень и сельмосотка тяк няе душманцень". Ина мон корхтан тейнть: "Кельгость душманонтень, озондода панциентень инкса. Аньцек тяфта тинь улефтяда менелень Алянтенди идькс. Вдь сон кошарясы эсь шинц лисендема кяжихнень и цебярьхнень вельхксс, кучси пизем виде и аф виде ваймотненди. Кармандярятада кельгомост кельгиентень, тянкса кодама тейнть казне? Тяконь тиендихть каяфксонь кочкайхневок! Кда тинь пара ломанькс васьфнесасть аньцек эсь альнякантень-дуганонтень, мезе пяк тяфтама тиенттяда? Тяфта тиендихть виде шкайфтомотневок! Уледа афсатыксфтома, кода афсатыксфтома Менелень Алянте.
Ванода, тяда макссе лезкс ломань ингольде прянтень няфтеманкса: эста аф ули тейнть казне Менелень Алянтень эзда. Лезксонь максомста тят тура тянь колга сембонди, кода тиендихть шамафкссотне синагогаса и ульцяса пряснон шнафтоманкса. Видеста корхтан тейнть: синь сявондьсазь ни эсь казнеснон. Ина тонь лезксонь максомстот, кержи кядце тяза сода, мезе тии видись, улеза максфце салавань тевкс; Аляце, салаваннеть няиец, максы тейть няевозь.
Озондомстовок тят уле шамафкссотнень лаца. Синь кельгсазь синагогаса и ульця ужева лотксезь озондомаснон прянь няфтеманкса. Видеста корхтан тейнть, синь сявондьсазь ни эсь казнеснон. Ина тон озондома сувак кудозт, пякстак кенкшцень и озонтт Аляцти, кона салаваксшиса. Аляце, салаваннеть няиец, максы тейть няевозь. Озондомста ламонь тяда корхта виде шкайфтомотнень лаца. Синь арьсихть: ламонь корхтазь, Шкайсь синь кульсыне. Тяда тиенде лацост, вдь Алянте кядьстонза анамда инголе содасы, мезе тейнть эряви. Озондода тяфта: Менелень Аляньке...»
МАТВ. 5:38-48; 6:1-8
полатксоц моли
МЕНЕЛЕНЬ АЛЯНЬКЕ
Менелень Аляньке!
Иняруяза лемце;
Саза оцязорксшице;
Пяшкодевоза мяльвийце
Мастор лангсовок кода менельса,
Эрь шинь кшиньконь
Макск тейнек тячи;
Нолдайть шумоньконь,
Кода миньге нолясаськ
Тейнек шумуфненди.
Тямасть вятьфте тяряфнемас,
И ванфтомасть кальдявда
*аСяс мес тонне Оцязорксшись,
*бВийсь, кайги лемсь пефтома пингс.
Аминь.
*а б Мекольце кафта валкитьксне Од Сотксса ашет.
334 - 335 
