Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ИСУС КРИСТОСОНЬ КЕМГАФТУВА ТОНАФНИЕНЗА
Исус кадозе Назаретть и кармась эряма Капернаум ошса, кона ащесь Галилеяса Геннисаретонь эрьхкть ваксса. Тяфта пяшкодсь Исаия шкаймаряйть инголи азфоц: «Завулононь модась и Навталинь модась, конат ащихть Иорданть омбяле оцюведень шири ки лангса, виде шкайфтомотнень Галилеясна – шобдаса ащи ломаньтналсь няйсь оцюдонга оцю валда; куломань масторса и цильфса ащихненди пиндолгодсь валда".
Ся пингста сявомок Исус кармась тонафтома и корхтама: "Шарфтода Шкайти, сяс мес маладсь Менелень Оцязорксшись». Исусонь мельге мольсь лама ломань, конат састь коста-повсь, сон тонафтсь эсост и пчкафнезень урмаснон.
Исус кочкась эстейнза кемгафтува тонафни, конат фалу ульсть мархтонза, и тонафнезень синь башка. Вов ня тонафнихнень лемсна: Симон-Пята, Андрей, Иоанн, Яку, Филипп, Варфоломей-Нафанаил, Матвей-Левий, Фома, Яку – Алфеень цёрац, Фаддей – Якувонь Иудась, Кананей Симон и Иуда Искариот, кона сяльде мисы Исусонь. Сембе тонафнихне ульсть покоди ломатть, но Шкайсь макссь тейст паваз, синь арасть ялгакс и тонафникс Исус Кристосонди, Шкаень Цёрати.
Андрей и сонь седибяльксоц Симон-Пята кунцесть Галилеянь оцюведьса калхт. Исус няезень синь, мярьгсь: «Моледа мельган, тихтядязь тинь ломанень кунцикс». Тянь вельде азозе: сон тонафтсыне вятемост ломаттнень видешити, аерфнемост синь пежеттнень эзда. Андрей и Пята кадозь калонь кундамань афнемаснон и эстокиге тусть Исусонь мельге. Тяфта тиендсть лия тонафниензовок, кодак серьгядьсазь, эстокиге туйхть Исусонь мельге. Исус кармась синь кучсемост тонафтома и макссь тейст вий-эрьгя урмань пчкафнемс и панцемс аф ару ваймопожфнень.
МАТВ. 4:12-22; МАРК. 3:13-19
316 
