Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ПАРА КУЛЯ ИСУСОНЬ ШАЧЕМАНЦ КОЛГА
Шкайсь кучезе масторлангу эсь Цёранц, Исус Кристосонь, ломаттнень пежетьта и сембе пингонь юмамада идемост. Сонь шачеманц мархта ушедсь модать лангса од пинге. Нльне кизонь лувксоньке ушеткшни сонь шачемастонза. Исус Кристосонь шачемацка ёфкс лацонь. Тинць арьседа, тейнза, менелень-масторонь Тиить Цёранцты, савсь шачемс ракшань*а кардса.
Эрьда ушедсаськ азондоманьконь ушетксста. Израилень кельме ширеса, Назарет ёмла ошса эрясь стирь, лемоцоль Мария. Сон кельгозе Азорть, седиецка аруволь. Весть тейнза эвондась Гавриил ангелсь, конань кучезе Азорсь. Сон мярьгсь Мариянди: «Шумбрат, Шкаень кельги сельмоса няйф! Шкайсь мархтот, бславафат тон аватнень ёткста». Мариянь абонфтозь валонза. Эста ангелсь мярьгсь тейнза: «Тят пеле, Мария, тон сатоть пароши Азорть эзда: вов, пекият, шачфтат Цёра, лемдьсак Исус. Сон ули инь оцюкс и лемдеви Вяре Шкаень Цёракс, Шкайсь макссы тейнза сонь Давид атянь-атянц оцязоронь вастонц. Сон кармай оцязорондама Яковонь юромонц лангса пефтома пинге, оцязорондаманцты аф ули пе».
Мария эста рьвакс апак туколь, аньцек ладяфоль пара ломаненди, конань лемоцоль Иосиф. Мария кизефтезе ангелть: «Кода тя ули, кда мон мирдьта аф содан?» Ангелсь каршезонза мярьгсь: «Иняру Ваймопожфсь валги лангозт, Вярдень Шкайть виец вельхтятанза; сянкса иняру шачфське лемдеви Шкаень Цёракс».
Мзярда Иосиф марязе, Мария пеки, ёрась аф сявомс сонь рьвакс, аньцек Азорть ангелоц сась онозонза, мярьгсь: «Иосиф, Давидонь цёрац! Тят пеле сявомс Мариянь рьвакс; сяс мес соньцтонза шачись Иняру Ваймопожфть эзда. Шачфты сон цёра, лемдьсак Исус, вдь сон идесы ломаньтналонц пежетьснон эзда».
ЛУКА 1:26-35, МАТВЕЙ 1:19-21
*а Ракша – жувата.
290 
