Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
НЕЕМИЯ СТЯФТСЫ ЕРУСАЛИМОНЬ ПЕРЯФКСТЬ
Неемия ульсь персиянь Артаксеркс*а оцязорть видеса покодикс.
Израилень фкя ломанць мрдась Ерусалимста Персияв и азондозе Неемиянди: "Сят, кит лядсть полонда меле, эряйхть тоса оцю ашушиса и люпштафста. Ерусалимонь перяфкссь калафнеф, ортанза плхтафт". Ня валхнень кулемста Неемия озась и аварьгодсь, мзярошка ши ризьфпотмосоль, постовась, озондсь менелень Шкайти. Артаксеркс оцязорсь нолдазе Неемиянь Ерусалим ошень перяфксть стяфтома.
Неемия сась Ерусалиму и израилень ломаттнень мархта кярьмодсь одукс стяфтомост Ерусалимонь калафнеф перяфксть и ортатнень. Тянь маряфтозь израилень ломаттнень душманцна, синь ёрасть лоткафтомс тевть. Эста Неемия макссь ломанензонды прянь араламанди тюрембяльхть. Перяфксонь кеподихне и сталмонь каннихне фкя кядьса тев тисть, омбоцеса кирдсть сялгом. Эрь покодить карксэземс тонкфоль тор, тяфта синь покодсть. Шкаень кядсь аралакшнезень синь, и перяфксть стяфтомац шумордафоль.
Тевсь аделавсь. Эста ломаттнень эвондась мяльсна петемс эряфснонга Шкаень валть коряс. Тяда меле марнек ломаньтналсь, кода фкя ломань, пуромсь ош кужети. Ездра койти тонафтыти мярькфоль кандомс Моисеень Коень книганц, конань Азорсь максозе Израильти. Ездра озксвятись кандозе Коень книгать сембонь инголи. Сонь кулхцондозь алятневок, аватневок, сембе, кинь ульсь шарьхкодемшкац. Лувсь валдашкодомста шиньгучкати, и сембе ломаттне кулхцондсть стядонь пилет. Ездра шназе Азорть, инь оцю Шкайть. Марнек ломаньтналське каршезонза: "Аминь, аминь", – кепсезь вяри кядьснон, сюконякшнесть и прашендсть комада Азорть инголе.
НЕЕМИЯ 1-8
*а Артаксеркс оцязорондась Персияса 465-425 кк. Кристосонь шачемада инголе. Тя ульсь аф ся оцязорсь, кона сявозе рьвакс Эсфирень.
246 
