Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
МАСТОРТЬ ЯВОМАЦ
Израилень содаф тя масторсь эрясь аньцек 120 киза: эсонза нильгемонень киза оцязорондасть Саул, Давид и Соломон. Сяльде масторсь явовсь кафту: Израиленнекс и Иуданнекс. Тя лиссь тяфта: Израилень сембе ломаттне пуромсть Сихему Ровоамонь, Соломононь цёранц, оцязоркс путома. Эста Еровоам, Соломононь ингольдень покодиец, и сембе пуромкссь састь Ровоамонди и мярьгсть: «Аляце путсь лангозонк аф кандовомшка сталма. Тон тёждялгофтыть аф тиеви тефнень, аф кандовомшка сталмоть, и эста карматама тейть покодема».
Ровоам оцязорсь анась ёнь тянь коряс атятнень кядьста, конат покодсть нинге Соломононди. Сят мярьгсть: «Улендярят тяни эсь ломаньтналцти урекс, пяшкодендярясак эняльдеманц, корхтандярят мархтост ляпоняста, эста синь улихть тейть урекс сембе пингс». Аньцек Ровоам ашезень сяве мяльс атятнень валснон. Кулхцондозень од ломаттнень, конатнень мархта кассь. Синь макссть кальдяв ёнь: «Мярьк ломаньтналти: "Монь вяшкянязе алязень карксэземда эчке. Сяс, кда алязе матрась эсонт, мон касфтса тя матрамать; алязе пиксседязь шнань локшеса, мон карман пикссемонт кшнинь локшеса..." Израилень сембе ломаттне няезь, оцязорсь ашезень кулхцонда синь».
Израильсь ащесь 12 тарадста, Яков атянь атяснон кемгафтува цёранзон коряс. Од оцязорть валонзон марямста кемонь тараттне кеподсть каршезонза, явсть и кочказь эстейст оцязоркс Еровоамонь. Иняру Сёрматфса тя масторсь лемневи "Израилень масторкс" али нинге Кельме ширдень масторкс. Израилень масторсь эрясь кафта сятт кизода ламос. Сонь срафтозе Саламанассар, ассириянь оцязорсь, Кристосонь шачемада инголе 721 кизоня.
Ровоамонди, Соломон оцязорть цёранцты, лядсть видекс аньцек Иудань тарадоц и Вениаминонь тарадста пялькссь, конат тиезь "Иудань масторть" али Лямбе ширдень масторть. Пряошекс тейнза ульсь Ерусалимсь. Иудань мастороц эрясь 350-шка киза, сонь срафтозе Вавилонць Кристосонь шачемада 586 кизода инголе.
ОЦЯЗОРХТ 3-ЦЕСЬ 12
186 
