Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
АВЕССАЛОМОНЬ КУЛОМАЦ
Авессалом, Давидонь цёранзон эзда фкясь, ульсь аф азомшка мазы, сембодонга пяк петнезь мазы кувака шяяренза. Но сон пяк прянь няиель. Авессалом кепсезе ломаньтналть эсь алянц Давидонь каршес, ёрась сонць арамс Израилень оцязоркс. Васькафнезь и келазень ляпошиса маштсь ускомост ломаттнень эсь ширезонза. Курокста Давидонди эсь ломанензон мархта савсь ворьгодемс цёранц эзда.
Авессалом содазе, коса алянц кяшема вастоц и тусь лангозонза оцю ушмовий мархта. Давид, кодак кулезе тянь, кучсь каршезонза ушматт, сияк кошардсь аф тиемс зиян Авессаломонди, ванфтомс эряфонц. Давид сякокс кельгозе сонь, апак ватт сянь лангс, мзяра ризф тись тейнза цёрац.
Тюремась мольсь вирьса. Шкайсь лездсь Давидонь ушманонзонды и синь сяськсть. Авессаломонь ушманонза тяряфтсть ворьгодезь идемс пря. Сонць Авессалом ворьгодсь мул лангса. Аньцек лиссь тяфта: оцю тумоть алга ардомста сонь шяяренза повсть тарадс. Мулсь тусь ардозь сяда тов, Авессалом лядсь шуфтса нюрьгома, пильгонза ашесть токсе модати. Давидонь ушмовиенц вятиец няезе тянь и налса сялгозе оцязоронь цёрать видеста седис.
Давид тянь кулемста пяк ризназевсь и ламос авардсь. «Цёразе, Авессалом, цёразе! Вай, кда монць куловолень тонь вастозт, Авессалом, цёразе, цёразе!» Авессалом кулось эряфонь мазы пингстонза. Библияса азф: "Кие сялдсы алянц и тядянц, сянь толвалдоц мады шобдаса".
ОЦЯЗОРХТ 2-ЦЕСЬ 14:25-26; 15:1-6; 18:2-14, 32-33; ВАЛМУВОРКСОНЬ КНИГА 20:20
174 
