Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ПЕТЫРÖС ДА ИОАНÖС ÖЛÖДÖНЫ ИСУС ЙЫЛЫСЬ ВИСЬТАВЛÖМЫСЬ
Коктöмöс бурдöдöм да Петырлöн бурвисьталöм бöрын вит сюрс морт нин эскисны Исус Кристослы. Но попъяс да веськöдлысьяс скöралiсны, тшöктiсны босьтны Петырöс да Иоанöс да йöртны найöс дзескыдiнö. Мöд луннас чукöртчисны Ерусалимö юдейяслöн веськöдлысьяс, пöрысьяс, Индöдö велöдысьяс да аркирейяс. Найö корисны Петырöс Иоанкöд да юалiсны налысь коктöмöс бурдöдöм йылысь: «Кутшöм вынöн да код нимöн тi тайöс вöчинныд?»
Сэки Петыр, кодi вöлi тырöма Вежа Лолöн, шуис налы: «Войтырлöн веськöдлысьяс да Израильлöн пöрысьяс! Миянлысь кö талун тi коранныд воча кыв, мый ми бурдöдiм висьысь мортöс да сылы бур вöчим, кывзöй да тöдöй: ми вöчим тайöс Назаретса Исус Кристос нимöн. Бурсö вöчим Исуслöн вын отсöгöн, и тайö мортыс сулалö тiян водзын дзоньвидза. Тi тувъялiнныд Исусöс крестö, но Енмыс ловзьöдiс Сiйöс. И абу мöд Мездысьыс, да абу сетöма йöзлы енэж улас мöд нимсö, код пыр миянлы позьö мездмыны».
Кор веськöдлысьяс да пöрысьяс аддзисны Петыр да Иоанлысь повтöмлунсö да казялiсны, мый найö велöдчытöм йöз, ёна шензисны. Но накöд сулалысь бурдöм мортöс аддзигöн нинöм паныд шуны эз вермыны. Сэсся тшöктiсны петавны Петырöс да Иоанöс, асьныс пондiсны сёрнитны ас костаныс: «Мый кутам вöчны тайö йöзыскöд? Öд став Ерусалимыс тöдö налысь шензьöданатор вöчöмсö, ми огö вермöй соссьыны таысь. Медым юöрыс водзö эз паськав войтырным пöвстын, чорыда öлöдам найöс, медым эз висьтавлыны Исус йылысь».
Сэсся бöр корисны апостолъясöс да тшöктiсны, мед дугдасны висьтавлыны да велöдны Исус йылысь. Петыр да Иоан воча шуисны налы: «Мöвпыштлöй асьныд, бур-ö тайö Ен водзын, ми кö Енмöс дорысь ёнджыка кутам кывзыны тiянöс. Ми огö вермöй чöв овны сы йылысь, мый аддзылiм да кывлiм». Чорыда чирыштöм бöрын веськöдлан котыр лэдзис апостолъясöс. Йöз вöснаыс эз вермыны мыждыны найöс, öд ставныс ошкисны Енмöс тайö лоöмторсьыс.
Апостолъяслöн уджъяс 4:1-21
450 
