Кусöдны кö быдлаысь бисö, лоö сап пемыд. Абу-ö тадз? Коркö эз вöвны турун ни пуяс, дзоридзьяс ни лэбачьяс, весиг енэжыс да муыс. Ентыкöла*а пасьталаыс вöлi пемыд да гудыр-гадыр. Но Ен эз кöсйы, медым тадзи колис, и Сiйö вöчис тайö шензьöдана муюгыдсö*б. Ми тöдам, мый нинöм ачыс оз артмы. Ставсö, мый миянöс кытшалö, вöчöма зэв бура да мичаа. Став вöчöмторйыс висьталö ыджыд мывкыда Вöчысь йылысь.
Библияын гижöма, мый медводз Ен вöчис енэж да му. Муыс вöлi куш, да сылöн эз на вöв мыгöрыс. Йир весьтас вöлi пемыд, и Енлöн Лов шлывъялiс ва весьтын.
Ен шуис: «Мед лоас югыд». И лои югыд. Сiйö аддзис, мый югыдыс бур, и торйöдiс югыдсö пемыдысь. Ен нимтiс югыдсö лунöн, а пемыдсö – войöн. Коли рыт – тайö вöлi медводдза лун. И воис асыв.
Ен шуис: «Мед лоас торйöдöма васö». Ва костас Сiйö вöчис енэж да торйöдiс улыс васö вылыс ваысь. И лои тадз. Коли рыт – тайö вöлi мöд лун. И воис асыв.
Ен шуис: «Мед енэжувса ваыс чукöрмас öтлаö, медым тыдовтчас косiн». И лои тадз. Ен нимтiс косiнсö муöн, а чукöрмöм васö – саридзöн. Сiйö аддзис, мый тайö бур.
Ен шуис: «Мед муыс чужтас-быдтас быдсяма турун, быдмöг да пу, кодъяс пондасны вайны ассьыныс кöйдыс-вотöс». И лои тадз. Муыс чужтiс-быдтiс быдсяма веж быдмöгсö да пусö. Ен аддзис, мый тайö бур. Коли рыт – тайö вöлi коймöд лун. И воис асыв.