Выбрать язык
Книги Ветхого Завета
Книги Нового Завета
с русским текстом1Хорлэн кивалтӥсезлы. Давидлэн крезьгурез.
[Лулын-сюлмын куалекъяса улыку.]
2Кузё-Инмаре, Тыныд оскиськисько,
даурам но возьытэ вуттэмын медам луы;
Аслад шонерлыкеныд монэ мозмыты.
3Мон пала пельдэ кар, мозмытыны дырты.
Мыным утиськыны изгурезь лу, ватӥськон корка лу мыным,
4Тон мынам юнматскон интые, изкаре;
Аслад нимыд понна валты монэ.
5Сьӧлтэт пушкысь потты монэ, сое лушкемен мыным пуктӥзы.
Тон уго мынам утиськон интые.
6Аслэсьтым лулме кияд сётӥсько;
Тон монэ мозмытӥськод, Кузё-Инмаре, зэмлыклэн Инмарез.
7Адӟеме уг поты визь туган ужъёсын вырисьёсты,
мон Кузё-Инмарлы оскиськисько.
8Тынад гажан-жалянэд вань,
со понна шумпотӥсько, шулдыръяськисько,
курадӟыса-кайгырыса улэмме Тон адӟид, тодӥд лулылэсь куректэмзэ
9Тушмонлэн кияз монэ ӧд сёты, пыдъёсме эркын интые султытӥд.
10Кузё-Инмаре, жаля монэ, мыным ёркыт,
куректыса куасьмиз мынам синмы, мынам лулы, мынам пушкы.
11Куректыса начармиз улонэ, курадӟыса ортчо улоно аръёсы;
сьӧлыкъёсыным сэрен лябӟиз кужыме, лыосы куасьмизы.
12Вань тушмонъёсы азьын гинэ ӧвӧл,
бускельёсы азьын но курлан-веранлы мон пӧрми,
тодмоосы понна кышкатъян маке луи;
ульчаысен монэ адӟисьёс палэнэ бызьыса кошко.
13Кулэм муртэ кадь сюлмазы монэ вунэтӥзы,
сӧриськем тусьты выллем мон луи.
14Тросэзлэсь сантэман-лек кылзэс кылӥсько; котькытын кышкытлык;
мыным пумит соос огкылысь верасько, лулме быдтыны малпало.
15Нош мон, Кузё-Инмаре, Тыныд оскиськисько,
шуисько: «Тон – мынам Инмаре».
16Улоно нуналъёсы – Тынад киулад,
тушмонъёсылэн, уллясьёслэн киулысьтызы мозмыты-уть монэ.
17Югыт-чылкыт ымнырыныд ляльчиед шоры учкы,
Аслад гажан-жалянэныд уть монэ.
18Кузё-Инмаре! Тыныд вазиськеме понна возьытэ медам усьы вал;
сьӧлыклэсь кышкасьтэмъёс возьытэ мед вуозы,
адэ усьыса, мед чалмытскозы.
19Пӧяськись ымъёс мед пумозы, вылтӥяськыса, синазькыль карыса,
шонер улӥсьлы пумит соос урод кылъёс верало.
20Макем трос Тынад ӟечлыкъёсыд,
соосты Тон Аслэсьтыд кышкаса улӥсьёс понна возиськод,
соосты адямиос азьын Аслыд оскиськисьёслы дасяд.
21Адямиослэн бугыръяськонъёссылэсь
Тон соосты шобрет улад ватӥськод,
кыл тэкшеронъёслэсь тылысад пегӟытӥськод.
22Дано каремын Кузё-Инмар юнматэм городаз,
Аслэсьтыз паймымон гажан-жалянзэ Со мыным возьматӥз!
23Куалектыкум мон малпай:
«Палэнтэмын мон Тынад син азьысьтыд»;
нош мон Тыныд вазиськыку,
мынэсьтым вӧсяськем кылъёсме Тон кылӥд.
24Солэн вань шонер улӥсьёсыз, Кузё-Инмарез яратэлэ!
Кузё-Инмар оскиськымон муртъёсты уте,
вылтӥяськыса улӥсьёслы дурыныз пунэмзэ берыктэ.
25Ваньды Кузё-Инмарлы оскиськыса улӥсьёс,
кужмо кариське, мед юнматскоз тӥляд сюлэмды!
Глава 30