Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
29-тӥ ПСАЛОМ
1Давидлэн крезьгурез. Коркаез выльдыку кырӟан.
2Монэ ӝутэмед но тушмонъёсылы вормыны,
шумпотыса улыны сётымтэед понна
Тонэ, Кузё-Инмаре, вылӥ карыса уло.
3Кузё-Инмаре, мынам Инмаре!
Тыныд вазиськи но, Тон монэ бурмытӥд.
4Кузё-Инмаре! Тон мынэсьтым лулме адысь поттӥд,
шайгуэ пырисьёс пӧлысь поттыса, монэ улэп кельтӥд.
5Кузё-Инмарлэн дун-чылкыт улӥсьёсыз,
Солы кырӟалэ, Солэсь святой нимзэ данъялэ,
6Солэн вожпотонэз вакчи дырлы гинэ луэ уго,
нош Солэн ӟеч эрикез – быдэс улонлы:
ӝытазе бӧрдон лыктэ, нош ӵукна – шумпотон.
7Шумпотыса майбыр улон дыръям мон шуылӥ:
«Быдэс даурам уг куалекты».
8Ӟеч эрикеныд, Кузё-Инмаре, Тон мынэсьтым гурезьме юнматӥд;
ымнырдэ ватӥд но, мон кышкатски.
9Соку мон Тыныд, Кузё-Инмаре, тэльмырыса вазиськылӥ,
Кузё-Инмарме сюлворыса курылӥ:
10«Мар пайдаез луоз мынам вирылэсь,
шайгуэ ке мыным пыроно?
Сюй Тонэ данъялоз-а? Тынэсьтыд зэмлыктэ ивортоз-а?
11Кузё-Инмаре, кыл, жаля монэ;
Кузё-Инмаре! Мыным юрттӥськись лу».
12Мынэсьтым бӧрдон-викышъянме шулдыръяськонлы пӧрмытӥд,
бышкиськись чурыт дӥсянме кылид но шумпотонэн кусме думид,
13мынам лулы Тонэ мед данъялоз, дугдылытэк мед данъялоз.
Кузё-Инмаре, мынам Инмаре!
Пумтэм вапумъёс ӵоже Тыныд тау карыса уло.
Глава 29
