Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
7-тӥ ПСАЛОМ
1Вениамин выжыысь Хус пумысен Давидлэн
Кузё-Инмар азьын бӧрдыса кырӟанэз.
2Инмаре Кузё-Инмаре! Мон Тыныд оскиськисько,
вань уллясьёслэсь-сантэмасьёслэсь уть, мозмыты монэ.
3Мозмытӥсе-утисе ӧвӧл дыръя, сьӧсь пӧйшур кадь,
со мынэсьтым лулме таласа, кесяса медаз кушты вал.
4Инмаре Кузё-Инмаре! Мар ке умойтэмзэ мон лэсьтӥ ке,
ки улам шонер луисьтэмез вань ке,
5асэным тупаса улӥсьлы пунэмзэ уродэн берыктӥ ке,
мон, кудӥз мозмытӥ сыӵезэ но,
кудӥз чик мугтэк мыным тушмон луиз,
6соку тушмон лулы сьӧры мед уйиськоз, мед кутоз монэ,
сюе мед лёгалоз мынэсьтым улонме,
тузонлы мед пӧрмытоз мынэсьтым данме.
7Кузё-Инмаре, вожпотонэныд султы,
тушмонъёсылэн урмыса улэмзылы пумит кариськы,
мон понна сӥзем судад ӝутӥськы.
8Пумтэм трос калыкъёс Тон котыре мед султозы,
соослэн йылазы вылӥе ӝутӥськы.
9Кузё-Инмар калыкъёсты судить каре.
Монэ судить карыкуд, Кузё-Инмаре,
шонер, дун-шектэм улэмме санэ пон.
10Сьӧлыклэсь кышкасьтэмъёслэн уродлыксы мед быроз,
нош шонер улӥсез юнматы:
Тон, шонерлыко Инмаре, сюлэмез, пушез эскериськод!
11Мынам щитэ сюлмынызы шонер улӥсьёсты утись Инмар бордысь.
12Инмар – шонер судить карись,
Со [кужмо, кема чидась,] нуналлы быдэ кылэз юн юась.
13Кин сьӧлыкъёсызлэсь куштӥськыса уг ке берытскы,
Со Аслэсьтыз палашсэ шере, пукыӵсэ золтэ но мертаське.
14Солы кулон вайись арбериос дася, ньӧлъёссэ ӵушкасесь каре.
15Тани сьӧлыклэсь кышкасьтэм шонертэм улонэн секытэн луиз,
йыркурен пушкыз тыр луиз но ӧрекчаськон вордӥськытӥз.
16Гу гудӥз, гудӟыса сое быдэстӥз, нош дасям гуаз ачиз усиз.
17Законлы пумит улэмез йыр вылаз берытскоз,
сьӧсь ужез йырвекчияз усёз.
18Кузё-Инмарез шонерлыкез понна данъясько,
Вылысь Кузё-Инмарлэсь нимзэ кырӟаса ушъясько.
Глава 7
