Выбрать язык
Книги Ветхого Завета
Книги Нового Завета
с русским текстом1Иов Кузё-Инмарлы ответ сётыса шуиз:
2«Тодӥсько, мар лэсьтыны Тынад мылкыдыд вань,
Тон сое ваньзэ лэсьтыны быгатӥськод, сое дугдытыны уг луы.
3Кин со, номыре валатэк,
Инмарлэсь малпанзэ сӧрыны тыршись?
– Озьы, мон вералляй мон понна валантэм, тодмотэм,
паймымон ужъёс сярысь.
4”Кылзӥськы, мон верало;
Тынэсьтыд мар ке юай, Тон мыным валэкты”.
5Тон сярысь мон пельыным кылӥ вал,
нош табере мынам синъёсы но Тонэ адӟо ни;
6соин ик мон, сюй-тузон, пень пӧлы султыса,
вань ярантэм вераськем кылъёсылэсь куштӥськисько,
соос понна ӧкынӥсько*а».
7Со кылъёсты Иовлы Кузё-Инмар верам бере Кузё-Инмар Феманысь Елифазлы шуиз: «Тон вылэ но тынад кык эшъёсыд вылэ Мынам вожпотонэ ӝуаса улэ со понна: Мон сярысь тӥ, мынам Иов ляльчие кадь, шонер ӧд вераськылэ.8Озьыен, басьтэлэ асьтэлы сизьым кунян, сизьым ыж но, Мынам Иов ляльчие доры мыныса, асьтэос понна курбон сётэ; тӥледыз кулэтэм карыса палэнтонтэм вылысь Мынам Иов ляльчие тӥ понна вӧсяськоз, уго солэсь гинэ вӧсяськемзэ Мон кабыл басьто, малы ке шуоно Мынам Иов ляльчие кадь Мон сярысь тӥ шонер ӧд вераське».
9Кошкизы Феманысь Елифаз, Савхейысь Вилдад, Наамитысь Софар но лэсьтӥзы озьы, кызьы соослы Кузё-Инмар косӥз, – Кузё-Инмар Иовлэсь вӧсяськемзэ кабыл басьтӥз.
10Аслаз эшъёсыз понна вӧсяськем бере Иовлэсь ыштонзэ Кузё-Инмар берыктӥз, Иовлэн азьвыл маиз вал, со сярысь Кузё-Инмар солы кык пол тросгес сётӥз.11Соку со доры лыктӥзы вань агай-вынъёсыз, сузэръёсыз, азьвыл вань тодмоосыз; солэн корказ пырыса, соин ӵош нянь сиизы; соин ӵош куректӥзы, Кузё-Инмарлэсь со вылэ лэзем вань уродлыкез чидано луэм понна сое буйгатылӥзы; котькудзы солы быдэн кесита*б но зарни зундэс кузьмазы.
12Иовлэсь берпум нуналъёссэ, азьвылъёсыз сярысь, Кузё-Инмар эшшо но бакельлыкогес кариз: солэн дас ньыль сюрс векчи пудоез луиз, куать сюрс верблюдъёсыз, сюрс пар ошъёсыз но сюрс ишакъёсыз луизы.13Солэн сизьым пиез но куинь нылыз вордскиз.14Нырысетӥезлы со Емима ним сётӥз, кыкетӥезлы – Кассия, нош куинетӥезлы – Керенгаппух.15Быдэс дунне вылын ӧй вал Иовлэн нылъёсыз кадесь чебер-йӧно кышномуртъёс. Соослэн атайзы агай-вынъёссылы кадь ик соослы но люкет сётӥз.
16Со бере Иов сю ньыльдон ар улӥз но пиоссэ, ньылетӥ выжыысь пиосызлэсь пиоссэс адӟиз на.17Иов пересьмыса, тырмыт нуналъёс улэм бераз кулӥз.*в
*а 42:6 ӧкыныны – раскаиваться
*б 42:11 кесита – корт, одӥг сӥкльлэсь дуно маке
*в 42:17 Септуагинтаын (грек Библиын) Иовлэн книгаез бордын вань таӵе ватсанъёсыз: «Гожтэмын: Кузё-Инмар улӟытыса султытон дыръя со нош ик соосын ӵош султоз». Иов сярысь сири кылын гожтэм книгаын верамын, со Идумеяен Аравия вискы интыяськем Авситидия музъемын вордскемын шуыса (нырысь солэн нимыз Иовав вал). Аравияысь кышно басьтӥз, пи нуныез вордскиз, солы Еннон ним сётӥзы; атаез Зареф нимо вал (Исав пиослэн пизы), анаез – Воссора (озьыен, Иов Авраамлэсь вордскемъёс пӧлысь витетӥ ёзысь луэ). Та эксэйёс Едомен кивалтыса улӥзы: Веорлэн Валак пиез нырысетӥез вал, солэн городэзлэн нимыз Деннава; Валак бӧрсьы та кунэн кивалтӥз Иовав, сое Иов шуыса нимазы; таиз бӧрсьы эксэй луиз Ассом, Феман кунысь игемон; со бӧрсьы эксэй луиз Варадлэн Адад пиез, со Моав бусыын Мадианэз погыртӥз, солэн городэзлэн нимыз Гефем. Иов доры лыктэм эшъёсыз Елифаз (Софонлэн пиез) – Исав пиос пӧлысь, Феманлэн эксэез, Валдад (Ховарысь Амнонлэн пиез), Савхейысь кивалтӥсь, Минеялэн эксэез Софар. Елифазлэн Феман пиез Идумея улосвылэн кивалтӥз. Сири кунлэн книгаяз со сярысь верамын, со, пе, Евфрат шур вӧзысь Авситидия музъем вылын улӥз; азьвыл солэн нимыз Иовав, пе, вал, нош атаез Зареф нимо, со шундыӝужанысь вуэм мурт вал.
Глава 42