Выбрать язык
Книги Ветхого Завета
Книги Нового Завета
с русским текстом1«Озьыен, Иов, кылзы мынэсьтым верамъёсме,
вань верам кылъёсме пеляд пон.
2Тани, мон ымме усьтӥсько, кылы-ымы вераны кутске.
3Мынам кылъёсы чылкыт сюлмысьтым пото,
кылы-ымы чылкыт тодон вералоз.
4Инмарлэн Духез монэ кылдытӥз,
Дунне Кутӥсьлэн шоканэз мыным улон сётӥз.
5Быгатӥськод ке, ответ сёт но мынам азям султы.
6Тани мон тынад мылкыд каремедъя Инмар интыын:
мон но тон кадь ик сюйысь-тузонысь кылдытэмын;
7соин ик тон мон азьын кышканы, керпотыны кулэ ӧвӧл,
мынам киы тонэ уг ёрты.
8Тон мыным кылымон верад,
мон ас пельыным кылӥ тынэсьтыд верам кылъёстэ:
9”Янгыше, шеке ӧвӧл, мон чылкыт, ӧрекчаськыса уг улӥськы.
10Нош Со мыным пумит янгыше уськытон шедьтӥз,
монэ Аслаз тушмонэз луэ шуыса лыдъяны кутскиз;
11мынэсьтым пыдъёсме сьӧлтэтэ пуктӥз,
вань сюресъёсме чакласа-эскерыса улэ”.
12Тани мон тыныд ответ сётӥсько: татын тон шонер ӧвӧл,
малы ке шуоно Инмар адямилэсь вылӥын.
13Мар понна тон Соин эчешыны-ӵошатскыны кулэ?
Нокыӵе ужъёсыз понна но Со кыл уг куты.
14Инмар одӥг пол вера, но со верамез уг ке шӧдо, мукетъят ини –
15кӧлыку, уйвӧтын, куке адямиосты ум нюртэ,
валес вылын нырулыса улыку, –
16соку Со адямилэсь пельзэ усьтэ но
Аслэсьтыз валэктон-дышетонъёссэ печатен нюртыса юнматэ,
17адямиез кыӵе ке но ужлэсь палэнтон понна,
со бордысь вылтӥяськонэз уллян понна,
18солэсь лулзэ пыдэстэм гу дорысь палэнтон понна,
солэсь улонзэ мечен быдтонлэсь утён понна.
19Яке со ас валесаз висён пыр визьмаське,
вань лыосыз чидантэм секыт висьыку,
20солэн нянь сиемез уг ни поты,
лулыз яратоно сиёнзэ но кулэ уг ни кары.
21Лулмугорыз син азьын куасьмыны-бырыны кутске,
лыосыз кыре пото, соос азьвыл уг но адӟисько вал.
22Лулыз шайгулы матэ мынэ, нош улонэз кулон доры вуэ.
23Солэн Кылчинэз-нодъясез вань ке, – сюрс пӧлысь одӥгез,
адямилы шонер сюрессэ возьматон понна со сётэмын,
24Инмар сое жалялоз но шуоз: ”Шайгулэсь сое мозмытоно;
сое мозмытон понна муг шедиз ини”.
25Соку солэн мугорыз, егит дырыз сярысь, чылкытгес луоз;
егит дырысьтыз улон нуналъёсаз со берытскоз.
26Инмарлы вӧсяськоз но, солы Со ӟеч кароз;
шумпотыса солэн ымныр шораз учкоз но
адямилы шонерлыко улон сётоз.
27Со адямиос шоры учкылыса шуылоз:
”Сьӧлыкалляй мон, шонерлыкез мыдланьтылӥ,
нош пунэмез мыным берыктэмын ӧвӧл;
28Со мынэсьтым лулме шайгулэсь мозмытӥз,
мынам лулы югытэз адӟе”.
29Тани, ваньзэ тае Инмар адямилы кык пол-куинь пол лэсьтэ,
30солэсь лулзэ шайгу дорысь палэнтон понна,
улэпъёслэн югытэнызы сое югдытон понна.
31Валатскы, Иов, монэ кылзы, эн вазьылы, нош мон верало:
32вань ке мар веранэд, ответ сёт;
вера, малы ке шуоно шонере мед потод шуыса, мылкыд карисько;
33нош веранэд ӧвӧл ке, соку монэ кылзы:
шыпыт ул, мон тонэ визьлыклы дышето».
Глава 33