Выбрать язык
Книги Ветхого Завета
Книги Нового Завета
с русским текстом1Иов аслэсьтыз чеберлыко веранзэ азьланьтыса шуиз:
2«Э, валляна улон дыръёсам берытскеме луысал ке,
Инмарлэн монэ утьыса возён вакытъёсаз,
3Солэн югдытонэз мынам йыр йылам пиштыса улӥз,
соку мон Солэн сётэм югытэныз
пеймыт пушкытӥ ветлыны быгатылӥ;
4мон кыӵе вал егит дыръям –
Инмарлэн гажан-жалянэз улон интыелэн йылӥяз улон дыръя,
5Дунне Кутӥсь эшшо монэн огазьын луон дыръя –
нылпиосы но ас котырам улӥзы,
6мынам сюресъёсы йӧлын гылтӥськылӥзы,
гурезьысь из мон понна вӧй шур поттылӥз!
7Городлэн капка дораз потылыса,
падвоже пуконме пуктылӥсько вал;
8монэ адӟыса, егит пиос ватӥськылӥзы,
нош пересь визьнодчиос султыса сылӥзы;
9кивалтӥсьёс вераськемысь дугдылӥзы,
чиньыосынызы ымзэс ворсаллязы;
10нимо-даноослэн куараоссы чусомылӥзы,
кылзы гульым бордазы лякиськылӥз.
11Монэ кылзӥсьёс монэ шудо мурт шуылӥзы,
адӟисьёс монэ ушъяллязы,
12уго куараен бӧрдыса курадӟисез мон утьылӥ,
катьтэммем анайтэм-атайтэм нылпиослы юрттӥськылӥ.
13Кулон калэ вуэм мурт мыным тау карыса улӥз,
палкышноослы юрттэме соослы шумпотон вайылӥз.
14Дӥськутэн кадь мон зэмлыкен шобырскылӥ,
шонерлыко улон мантия интыын, йыр керттэт интыын
мон понна вал.
15Синтэмлы мон син вал, чутӥсьлы – пыд;
16кураськисьёслы мон атай вал,
тодмотэм муртъёслэсь судын кыстаськонзэс сак,
пыр-поч эскерылӥ.
17Законлы пумит улӥсьлэсь ангессэ мон пыргытылӥ,
солэн пинь улысьтыз лушкамзэ ишкалтылӥ.
18Мон шуылӥ: ”Аслам карам куло,
улоно нуналъёсы луо кадь трос луозы;
19мынам выжые ву доры вуэ, лысву но мынам вайёсам уйзэ кӧлэ;
20мынам данэ уг пересьмы, пукыӵе киям юн возиське”.
21Лыктэмме возьмаса улӥзы, монэ сак кариськыса кылзӥськылӥзы,
визь-кенеш сётылыкум, чус улӥзы.
22Мынам верам кылъёсы бере куспазы ӧз ни куаретэ;
мынам вераме соос вылэ шапыкен усьылӥз.
23Зорез кадь монэ витизы, тулыс зорлы кадь шумпотыса,
асьсэлэсь ымъёссэс усьтылӥзы.
24Озьы но луылэ вал: мон соослы мынектӥсько, нош соос уг оско;
ымнырылэсь пиштӥсь югытсэ ӝоже уськытыны ӧз дӥсьтэлэ.
25Мон соослы сюрес возьматылӥ,
кузё интыын пуки, ожгарчиослэн пӧлазы эксэй кадь,
бӧрдӥсьёсты буйгатӥсь кадь мон улӥ».
Глава 29