Выбрать язык
Книги Ветхого Завета
Книги Нового Завета
с русским текстом1«Озьы! Азвесьлэн потон интыез вань,
зарнилэн но ӵыжатон интыез вань.
2Корт музъемысь потэ, ыргон изысь ӵыжатӥське.
3Адями пеймыт азез югдытэ но пеймыт азьысь,
тём-тём пеймыт азьысь, изэз пыр-поч утча.
4Пыдын ветлыны вунэтэм интыосысь корт поттон понна гу гудо,
пыдлояз лэзисько но адямиослэсь палэнын,
гозы борды шӧдьытскыса, шонаськыса уло.
5Нянь будэтоно музъем пушласянь тылын сутыса гудӟемын кадь.
6Солэн изъёсыз пушкын сапфир вань,
со пушкы зарни пырыос интыяськемын.
7Сьӧсь тылобурдо отчы сюресэз уг тоды,
душеслэн но синмыз сое уг адӟы;
8лев пиос но сое ӧз лёгалэ, со вылтӥ шакал но ӧз ветлы.
9Гранит из борды кутӥське, гурезьёсты выжыенызы кымалтэ;
10гурезьысь изъёсты кораса, пыран-потан сюрес лэсьтэ но
вань дуно арбериосты солэн синмыз соку адӟе ни;
11ӧрысь вуэз быземысь дугдытэ но,
мар ватӥськыса улӥз ву улын,
со адӟиськыны кутске.
12Нош кытысь, кызьы бадӟым визьлыкез шедьтод?
Кытын визьлэн улон интыез?
13Адями солэсь дунзэ уг тоды,
улэпъёслэн музъем вылысьтызы сое шедьтыны уг луы.
14Пыдэстэм дунне шуэ: ”Со мон бордын уг улы”;
зарезь но шуэ: ”Мон дорын со ӧвӧл”.
15Зарниен сое басьтыны уг луы,
азвесьлэн дуныныз но сое басьтыны уг луы;
16Офирысь зарниен но сое дунъяны уг луы,
дуно ониксэн но, сапфирен но сое уд басьты.
17Зарниен но, хрустален но сое ӵошатыны уг луы,
чылкыт зарни сосудэн но сое уд вошты.
18Нош коралл но марӟан сярысь веранэз ик ӧвӧл ни,
бадӟым визьлык рубинлэсь но дуногес.
19Эфиопияысь топазэз но соин оградэ пуктыны уг луы;
чылкыт зарниен но сое уд басьты.
20Кытысь бен визьлык потэ? Кытын визьлэн улон интыез?
21Вань улэп макеослэн син азьысьтызы со ӵоксамын,
ин тылобурдоослэсь но ватэмын.
22Аваддон но кулон шуо:
”Асьме пельёсын ми со сярысь веранэз кылӥмы”.
23Инмар визьлык доры нуись сюресэз тодэ,
Со солэсь интызэ но тодэ.
24Уго Со музъемлэн пумысьтыззэ но синйылтэ, ин улысь ваньзэ адӟе.
25Тӧлэз мерталлякуз, кытчы кулэ, отчы вуэз интыяллякуз,
26зорлы пуктон-косон висъякуз,
гудыри куараен чилектонлы сюрес возьматъякуз,
27соку Со визьлыкез адӟиз, дасяз, возьматӥз,
эшшо эскериз-чаклаз на сое но
28адямилы шуиз:
”Кузё-Инмарлэсь кышкан – со зэмос бадӟым визьлык,
уродлэсь-леклэсь палэнскон – тӥни кытысь потэ визь”».
Глава 28