Выбрать язык
Книги Ветхого Завета
Книги Нового Завета
с русским текстом1Иеровааллэн Авимелех пиез Сӥхеме ӵужмуртъёсыз доры мынӥз но ӵужатаезлэн вань выжы-кумыосызлы шуиз:2«Сӥхемын вань улӥсьёслэн сюлмазы таӵе малпан пыртэ: тӥледлы кудӥз умойгес луоз – Иеровааллэн сизьымдон пиосыз тӥледын кивалтӥзы ке-а, яке кудӥз ке огез мед кивалтоз-а? Тодады вае: мон – тӥляд лыды, тӥляд мугорды».
3Ӵужмуртъёсыз Сӥхемын улӥсь калыклэн сюлмаз со сярысь вань та кылъёсты пыртӥзы, соослэн сюлэмзы Авимелех пала берытскиз, уго соос шуо вал: «Со милям братмы».4Ваал-Верифлэн юртысьтыз солы сизьымдон сӥкль азвесь сётӥзы; та азвесен Авимелех ужез яратӥсьтэм, ас эрикенызы улӥсь муртъёсты медъяз, соос со сьӧрын ветлӥзы.5Со Офраысь атаезлэн юртаз лыктӥз но вань агай-вынъёссэ виылӥз, Иеровааллэсь сизьымдон пиоссэ одӥг из вылын виылӥз. Иеровааллэн покчи пиез Иофам гинэ улэп кылиз, ватӥськыса улӥз.6Соку Сӥхемысь, юнматэм Милло изкарысьтыз вань улӥсьёс лыктӥзы но Сӥхем вӧзысь тыпы доры огазе люкаськизы, отын соос Авимелехез эксэе пуктӥзы.
7Та сярысь Иофамлы верам бере со Гаризим гурезь йылэ мыныса султӥз но, бадӟым куаразэ поттыса, кесяськыса вераз: «Сӥхемын улӥсьёс, кылзӥське монэ, соку тӥледыз Инмар кылзоз!8Куке но писпуос асьсэлы вӧйын зырӟыса эксэй пуктыны мынӥллям, вӧйпулы соос шуиллям: ”Милемлы эксэй лу”.9Вӧйпу соослы шуэм: ”Инмарез но, адямиосты но сӥлы карон вӧйтэк асме кельто но мукет писпуосын кузёяськыса улом-а?”
10Соку писпуос смоквапулы шуиллям: ”Лыкты, милемлы эксэй лу”.11Смоквапу соослы шуэм: ”Аслэсьтым ческытлыкме, ӟеч емышме кельто но мукет писпуосын кузёяськыса улом-а?”12Соку писпуос виноградпудлы шуиллям: ”Лыкты, лу милемлы эксэй”.13Виноградпуд соослы шуэм: ”Инмарлэсь но, адямиослэсь но мылкыдзэс шулдыр карись сокме кельто но мукет писпуосын кузёяськыса улом-а?”
14Пумаз ини вань писпуос тёрнпулы шуиллям: ”Лыкты, милемлы эксэй лу”.15Тёрнпу писпуослы шуэм: ”Зэмзэ ик тӥ монэ эксэе пуктӥськоды ке, соку мынэ, мынам вужерам шутэтске; ӧд ке, соку тёрнпуысь тыл потоз но Ливанысь кедырпуосты ӵушкалоз”.
16Озьыен, учкелэ: шонер-а, кызьы кулэ вал, озьы-а лэсьтӥды – Авимелехез эксэе пуктӥды? Ӟеч-а лэсьтӥды Иеровааллы, солэн семьяезлы, солэсь ӟеч ужъёссэ лыдэ басьтыса, пунэмдэс берыктӥськоды-а?17Тӥ понна мынам атае нюръяськиз, улонзэ но ӧз жаля, со тӥледыз мадиан калыклэн киулысьтыз мозмытӥз;18нош тӥ али мынам атаелэн выжыезлы пумит урдӥськиды, атаелэсь сизьымдон пиоссэ одӥг из вылын виылӥды, солэн ляльчи кышноезлэсь Авимелех пизэ Сӥхем калыклы эксэе пуктӥды, малы ке шуоно со тӥляд братты.
19Туннэ тӥ шонер, кызьы кулэ вал, озьы Иеровааллы, солэн выжыезлы лэсьтӥды ке, соку [тӥ вылын дэлетлык мед улоз,] Авимелех понна шумпотэ, нош со тӥ понна мед шумпотоз;20нош тазьы ке ӧвӧл, соку Авимелех бордысь тыл мед потоз но Сӥхемын улӥсьёсты мед сутоз, юнматэм Милло изкарын улӥсьёсты но; Сӥхем карын улӥсьёс бордысь тыл мед потоз, юнматэм Милло изкарысь но, – Авимелехез мед ӵушкалоз».21Иофам бызьыса кошкиз, Беэр каре пегӟиз, Авимелех братэзлэсь со отын пегаса улӥз.
22Израиль музъемын Авимелех куинь ар ӵоже эксэйын пукиз.23Авимелехен Сӥхемын улӥсьёс вискы Инмар урод духез лэзиз, соку Сӥхемын улӥсьёс Авимелехлы тэрытскемысь дугдӥзы.24Тазьы Иеровааллэн сизьымдон пиосыз понна пунэм берыктӥськиз, соослэн вирзы соосты вием Авимелех братсы вылэ вуиз, озьы ик Сӥхемын улӥсьёс вылэ – асьсэлэсь агай-вынъёссэс виыны Авимелехлы юрттӥсьёс вылэ.25Сӥхемын улӥсьёс солы пумит гурезь йылъёсы, лушкем интыосы адямиоссэс пуктылӥзы, соос сюрес кузя вань мынӥсь-ветлӥсьёсты талало вал. Та пумысен Авимелехлы ивортӥзы.
26Аслаз агай-вынъёсыныз Сӥхеме Еведлэн пиез Гаал лыктӥз, соос Сӥхеме улыны выжизы, Сӥхемын улӥсьёс солы оскиськизы.27Бусыосазы потыса, виноград емышсэс бичазы, виноград лёган гуысьтызы вина поттӥзы, шулдыръяськон дыръёс ортчытъязы, инмарзылэн корказ ветлӥзы, сиизы, юизы но Авимелехез каргаса улӥзы.28Еведлэн Гаал пиез тазьы вералляз: «Кин со сыӵе Авимелех, мар со Сӥхем? Малы асьмеос солы ужаса-тыршыса улыны кулэ? Иеровааллэн пиез ӧвӧл-а со, солэн пуктэм кузёйырыз Зевул ӧвӧл-а? Эсьмаса Сӥхемлэн атаезлэн, Емморлэн, пиосызлы ужаса-тыршыса улэ, нош солы малы бен асьмеос тэрытскыса улыны кулэ?29Кин ке но та калыкез мынам киулам сётысал ке, мон Авимелехез уллясал». Авимелехлы верамын вал: «Ожгарчиостэс люка но ожмаськыны пот».
30Городлэн кивалтӥсез Зевул Еведлэн Гаал пиезлэсь верам кылъёссэ кылӥз но йыркурен ӝуатскиз.31Со кескич амалэн Авимелех доры адямиоссэ тазьы вераны ыстылӥз: «Тани, Еведлэн пиез Гаал агай-вынъёсыныз Сӥхеме лыктӥзы но городын улӥсьёсты тыныд пумит узато;32соин ик уйин ачид но, ас котырысьтыд калык но султыса бусые лушкемен возьмаськисьёсты пуктэ;33ӵукна, шунды ӝужам бере, вазь ик султыса, город котыре лыктэ, нош со ас котыраз люкам калыкен тон доры потӥз ке, лэсьты солы сое, мар лэсьтыны кужымез вань киыдлэн».
34Авимелех но соин ӵош люкаськем калык уйин султӥзы но Сӥхем вӧзы ватӥськем ньыль отряд пуктӥзы.35[Ӵукна вазь ик] Еведлэн пиез Гаал султӥз но кар капка доры интыяськиз; соку Авимелех но соин огазе люкаськем калык ватӥськон интыысьтызы султӥзы.36Калыкез адӟыса, Гаал Зевуллы шуиз: «Тӥни, гурезь йылысь калык ваське». Нош Зевул солы шуиз: «Гурезьёслэсь вужеръёссэс тон адямиос кожаськод».37Гаал нош ик солы шуиз: «Тӥни, калык вырйылысь ваське, одӥгез отряд Меонним тыпы дорысь лыктэ».38Зевул солы шуиз: «Кытын али тынад тазьы шуись ымыд: ”Кин со сыӵе Авимелех, малы ми солы ужаса-тыршыса улыны кулэ?” Та тынад кулэтэм карем калыкед; табере султы но кутскы соин нюръяськыны».
39Гаал Сӥхемын улӥсьёслэн азьпалазы мынӥз, со Авимелехен ожмаськыны кутскиз.40Авимелех со сьӧры уйиськиз, Гаал солэсь бызьыса кошкиз, кар капка доры вуытозь, трос калык быриз.41Авимелех Арумае улыны кылиз, нош Гаалэз но солэсь агай-вынъёссэ Зевул улляз, Сӥхемын улыны ӧз лэзьы.
42Мукетаз нуналэ калык бусые потӥз, со сярысь Авимелехлы ивортӥзы.43Со аслэсьтыз калыксэ люказ но куинь отрядлы люкиз, бусые ватӥськон инты дасяз. Калык городысь потэм шуыса адӟиз но соос вылэ урдскиз, соосты виылӥз.44Со куспын, Авимелех ас отрядэныз кар капка доры вуэм бере, мукетыз кык отрядъёс бусые потэм калык вылэ урдскизы, соосты соос виылӥзы.45Авимелех быдэс нунал ӵоже городэн ожмаськиз, сое киултӥз, отчы кылем калыкез виылӥз, городэз куашкатӥз, бервылаз сылал пызьназ.
46Та сярысь кылэм беразы ваньзы Сӥхем каланчаысь муртъёс Ваал-Верифлы сӥзем вӧсяськон интыын сылӥсь каланчае мынӥзы.47Авимелехлы ивор вуттӥзы, отчы, пе, Сӥхем каланчаысь вань калык люкаськиз.48Авимелех Селмон гурезе мынӥз, со сьӧры вань калык мынӥз; Авимелех бордаз тӥр кутӥз, писпу вайёсты кораз но пельпумаз ӝутӥз, соку со бӧрсяз лыктэм калыклы шуиз: «Адӟиды, мар мон лэсьтӥ, ваелэ, ӝоггес тӥ но озьы ик лэсьтэ».49Вань калык улвай кораз но, Авимелех сьӧры мыныса, улвайёссэс каланча вӧзы тыризы, собере тыл понӥзы но каланчаез сутӥзы; Сӥхем каланчаысь вань калык, ог сюрс пала пиосмуртъёс но, кышномуртъёс но ваньзы быризы.
50Собере Авимелех Тевеце мынӥз, Тевецез котыртӥз но киулаз басьтӥз.51Город шорын юн каланча сылэ вал, вань пиосмуртъёс, кышномуртъёс, городысь вань улӥсьёс отчы пырыса ворсаськизы но каланча липет йылэ тубизы.52Каланча доры вуэм бераз Авимелех сое котыртӥз, каланчае пырон ӧс доры вуыса, малпаз отчы тыл поныны.53Соку одӥг кышномурт изон кӧлэсь люкетсэ Авимелехлэн йыр вылаз куштӥз но йыркобызэ сузмытӥз.
54[Авимелех] со куспын ик ӧтиз бӧрсяз ожмаськон тӥрлыксэ нуллӥсь егит пиез но солы шуиз: «Потты мечтэ но ви монэ, нокин медаз шуы, монэ, пе, кышномурт вием».55Авимелехлэсь кулэмзэ адӟем беразы израиль пиос ваньзы ас доразы кошкизы. Егит пи сое бышкалтӥз, со кулӥз.
56Озьы Инмар Авимелехлы лек ужъёсыз, атаезлы пумит улэм, аслэсьтыз сизьымдон агай-вынъёссэ виемез понна пунэмзэ берыктӥз.57Сӥхемын улӥсьёслэсь вань сьӧсь ужъёссэс Инмар соослэн йыр вылазы берыктӥз; соос доры Иеровааллэн Иофам пиезлэн каргамез вуиз.
Глава 9