Выбрать язык
Книги Ветхого Завета
Книги Нового Завета
с русским текстом1Ефрем выжыысь адямиос солы шуизы: «Малы тон тазьы лэсьтӥд: мадиан калыкен ожмаськыны мыныкуд, малы милемыз ӧд чорты?» Соин туж даллашизы.2Гедеон, ответ сётыса, соослы шуиз: «Мае ке но сыӵезэ мон лэсьтӥ-а, мае тӥ туннэ лэсьтӥды? Ефремлэн бичам бере кылем виноград пурыосыз ӟечесьгес ӧвӧл-а Авиезерлэн бичам виноградэз сярысь?3Инмар мадиан калыклэсь кивалтӥсьёссэ-эксэйёссэ Оривез но Зӥвез тӥляд кияды сётӥз. Тӥ кадьзэ мае мон лэсьтыны быгатӥ?» Таӵе кылъёсты со верам бере соослэн сюлэмзы буйгаз, солы вожпотонзы сӥяз.
4Гедеон Иордан дуре лыктӥз, ачиз выжиз, соин ӵош ветлӥсь куинь сю мурт но выжизы. Тушмон сьӧрын уйылӥськыса соос катьтэммемын, [сютэмесь но] вал.
5Сокхофын улӥсьёслы со шуиз: «Мон сьӧры лыктӥсь калыклы нянь сётэ; соос жадемын, нош мон уйиськисько мадиан калыклэн эксэйёсыз, Зевеен Салман, сьӧры».6Сокхофлэн кивалтӥсьёсыз шуизы: «Малы ми тынэсьтыд ожгарчиостэ сюдыса возьыны кулэ, оло, Зевеен Салманъёс тынад киулад сюризы ни?»7Гедеон шуиз: «Та понна, Кузё-Инмар Зевеен Салманэз мынам киулам сётӥз ке, мон тӥлесьтыд мугордэс луоё кырын будӥсь бышкись венё будосэн, пинё-пинё кутсаськон пулэн мугордэс кесяло».8Отысен со Пенуэлэ кошкиз, та кылъёсты ик вераз отын улӥсьёслы; Пенуэлын улӥсьёс веразы со кылъёсты ик, кудъёссэ Сокхофын улӥсьёс веразы.9Пенуэлын улӥсьёслы но со шуиз: «Вормон басьтыса, берен татчы вуи ке, та каланчаез куашкато».
10Зевеен Салман Каркорын вал, соосын ӵош ожмаськыны люкаськемъёс ог дас вить сюрс мурт – шундыӝужанысь ожмаськыны лыктэмъёслэн улэп кылем люкетэз; нош сю кызь сюрсэз ожмаськыны меч кутэмъёс быризы.11Гедеон Новалэн но Иогбегалэн шундыӝужан палаз балаганъёсын улӥсьёс доры нуись сюрес кузя мынӥз, сюлэмшугъяськытэк улӥсь ожгарчиосты со ваньзэс погыртӥз.12Зевеен Салман бызьыса кошкизы; со соос сьӧры уйиськиз, кыксэс ик мадиан калыклэсь эксэйёссэ, Зевеез но Салманэз, киулаз басьтӥз, вань ожгарчиоссэс куалекъятӥз-тэтчатӥз.
13Иоаслэн Гедеон пиез ожысь Херев вырйыл вӧзысен дор палаз берытскиз.14Сокхофын улӥсьёс пӧлысь егит пиез кутӥзы но солэсь мар кулэ вал, сое юазы; со гожтыса сётӥз Сокхофын улӥсь сизьымдон сизьым кузёйыръёслэсь но тӧроослэсь нимъёссэс.15Гедеон Сокхофын улӥсьёс доры лыктыса шуиз: «Тани, Зевей но Салман. Соос пумысен, монэ серем карыса, тӥ шуиды вал: ”Тынад катьтэммем ожгарчиосыдлы ми нянь мед сётомы шуыса, Зевеен Салман тынад киулад сюризы ни шат?”»16Городлэсь тӧрооссэ кутӥз, Сокхофын улӥсьёсты бышкись венё будосэн, пинё-пинё кутсаськон пулэн жугиз.17Пенуэлысь каланчаез куашкатӥз, городын улӥсьёсты быдтӥз.
18Соку Зевеен Салманлы шуиз: «Кыӵеесь вал Фаворын виылэм муртъёсты?» Соос шуизы: «Соос тыныд укшасесь вал, ваньзы соос эксэй пиослы кельшо вал».19[Гедеон] шуиз: «Соос мынам агай-вынъёсы вал, анаелэн нылпиосыз! Улэп Кузё-Инмар; тӥ соосты ӧй ке быдтысалды, мон тӥледыз улэп кельтысал».
20Иеферлы, нырысь вордскем нуныезлы, со шуиз: «Султы, виылы соосты». Нош егит пи мечсэ ӧз потты – кышказ, уго со пинал на вал.21Зевеен Салман солы шуизы: «Султы но милемыз ачид ви, уго адямиезъя кужымез но». Гедеон султӥз но Зевеен Салманэз вииз, верблюдъёссылэн чыртыысьтызы чеберъян арбериоссэс басьтӥз.22Соку израиль пиос Гедеонлы шуизы: «Милемлы кузё лу, тынад пиед но, пиедлэн пиез милемын кузёяськыса мед улозы, уго тон милемыз мадиан калыклэн киулысьтыз мозмытӥд».23Гедеон соослы шуиз: «Мон но тӥледын кузёяськыса уг улы, пие но кузёяськыса уз улы; Кузё-Инмар тӥледлы кузё мед луоз».
24Гедеон соослы шуиз: «Одӥгзэ гинэ мон тӥлесьтыд курисько: тушмонлэсь басьтэм ваньбурды пӧлысь ваньды быдэн угы вае». (Тушмонлэн трос вал зарни угыосыз, малы ке шуоно ваньзы соос измаил выжы калык вал.)25Соос шуизы: «Сётомы». Шобыр вӧлдӥзы но котькудӥз ваньбурлы басьтэм тӥрлык пӧлысь одӥгзэ угызэ отчы куштӥз.26Бичам зарни угыоссылэн секталаез сюрс сизьым сю зарни сӥкль*а кыскиз; та сяна, люкамын вал на е бычыос, бирдыос, мадиан эксэйёслэн дарали дӥськутсы, верблюдъёссылэн чыртыязы ошылэм [зарни] жильыоссы.27Талэсь Гедеон ефод*б лэсьтӥз но вордскем Офра городаз интыяз; израиль калык отчы ветлыса, азыса улӥз, Гедеонлы но, солэн ӵыжы-выжыосызлы но со канжаськон макелы пӧрмиз.
28Мадиан калык израиль пиос азьын тэрытскыса улыны кутскиз, йырзэс урдыса ӧз ни ветлэ, Гедеон улон аръёсы ньыльдон ар ӵоже та музъем каньылэн улӥз.29Иероваал (Гедеон), Иоаслэн пиез, бертӥз, ас юртаз улӥз.
30Гедеонлэн сизьымдон пиосыз вал, солэн макес вискысьтыз потэмъёс, – уго трос вал солэн кышноосыз.31Солэн Сӥхемын улӥсь ляльчи кышноез но пи нуны вайиз, Гедеон солы Авимелех ним сётӥз.32Пересь-пересь луэм бераз Гедеон, Иоаслэн пиез, кулӥз; сое Авиезер выжылэн Офра карысьтыз Иоаслэн атаеныз артэ ватӥзы.
33Гедеон кулэм бере израиль пиос нош ик азон сьӧлыке пыризы: ваалъёслы йыбыртъяса улыны кутскизы, Ваал-Верифез асьсэлы инмар каризы.34Израиль пиос асьсэлэсь Инмарзэс Кузё-Инмарез тодазы ӧз ни вае, соосты котыразы улӥсь вань тушмонъёслэсь Утисез.35Иеровааллэн (Гедеонлэн) выжыезлы но тау ӧз каре солэн ас калыкезлы сокем трос ӟеч ужъёс лэсьтэмез понна.
*а 8:26 сюрс сизьым сю зарни сӥкль – ог 20 килограмм
*б 8:27 ефод – архиерейлэн выл дӥсез
Глава 8