Выбрать язык
Книги Ветхого Завета
Книги Нового Завета
с русским текстом1Кузё-Инмарлэн ляльчиез Моисей кулэм бере Навинлэн Иисус пиезлы, Моисейлэн ужась-тыршисезлы, Кузё-Инмар шуиз:2«Моисей, Мынам ляльчие, кулӥз: султы но Иордан вамен выж, тон но, тынад вань калыкед но израиль пиослы Мынам сётэм музъемам пыре.3Кыӵе гинэ инты вылэ пыдтышты уз лёгиськы, сое Мон тӥледлы сёто, кызьы Мон Моисейлы верай:4луоё кыр дунне бордысен кутскыса, Ливанысен кутскыса быдӟым шур дорозь, Евфрат шур дорозь, хеттейёслэн быдэс музъемзы, быдӟым зарезьлэн, шундылэн пуксён палыз, тӥляд улон интыды луоз.5Вань улон нуналъёсыд ӵоже тыныд пумит сылыны нокин но уз чида. Кызьы Мон Моисеен огазьын вал, озьы ик тонэн но валче луо: тон дорысь уг палэнскы, тонэ огнаддэ уг кельты.6Юн сыл, кышкасьтэм лу; уго тон та калыклы киулаз музъем сётод, сое Мон соослы сёто шуыса, атайёссылы кыл сётыса сӥзи.7Тон гинэ юн сыл, чик кышкасьтэм лу, Моисей ляльчиелэсь тыныд сётэм быдэссэ законэз туж тыршыса уть, быдэсъяса ул; со бордысь бурпала но, паллян пала но эн кожылы, ваньзэ быдэсъяно ужъёстэ визьлыко мед лэсьтод шуыса.8Та законэн книгаез кылыд-ымыд верамысь медаз дугдылы; нош тон соя уй но, нунал но дышетскы, мар отын гожтэмын, ваньзэ сое ӝик-ӝик быдэсъяса мед улод: соку тынад улон сюресэд азинлыко мыноз, визьлыко улод-вылод.9Тани Мон тыныд косон сётӥсько: юн сыл, кышкасьтэм лу, эн курда, эн куалекъя; уго кытчы гинэ тон уд мыны, котьку но тонэн огазьын луоз Инмаред Кузё-Инмар».
10Соку Иисус калыклэн эскерись-чакласьёсызлы косон сётыса шуиз:11«Стан пыр ортче но калыклы косон сётыса шуэ: ”Сюрес вылэ потыны асьтэлы сиён дасялэ, уго куинь нунал ортчыса, [атайёстылэн] Инмарзылэсь Кузё-Инмарлэсь тӥледлы люкетлы сётэм музъемзэ басьтон понна тӥ Иордан сьӧры мыноды”».
12Нош Рувимен Гад выжыослы, Манассия выжылэн ӝыны люкетэзлы Иисус шуиз:13«Тодады вае али Кузё-Инмарлэн ляльчиезлэсь Моисейлэсь тӥледлы тазьы вераса косэмзэ: ”Инмарды Кузё-Инмар тӥледлы та музъемез сётӥз, отын каньылэн, кышкатэк улыны мед быгатоды шуыса”.14Кышноосты, нылпиосты, пудо-животты мед кылёз Иордан сьӧры, Моисейлэн тӥледлы сётэм музъемаз; нош тӥ ваньды, ожмаськыны быгатӥсьёс, ожмаськон тӥрлыкъёс кутыса, агай-вынъёстылэн азьпалазы мыныса, Иордан шур вамен потэ но соослы юрттӥське,15[Инмарды] Кузё-Инмар агай-вынъёстылы но тӥледлы кадь ик каньыл улон сётытозь; Инмардылэсь Кузё-Инмарлэсь соослы сётоно музъемез соос но люкетлы басьтытозь; соку тӥ асьтэлэн люкет музъем вылады берытске но Кузё-Инмарлэн Моисей ляльчиезлэсь Иордан сьӧры, шундыӝужан пала тӥледлы сётэм музъемзэ киулады басьтэ».
16Соос Иисуслы ответ сётыса шуизы: «Мар гинэ тон милемлы уд косы, ваньзэ быдэстомы, кытчы гинэ тон милемыз уд ысты – мыномы;17кызьы ми Моисейлэсь котьку но кылзӥськыса улӥмы, озьы ик тынэсьтыд но верамъёстэ кылзӥськыса уломы: Инмаред Кузё-Инмар гинэ тонэн валче мед луоз, кызьы Со Моисеен огазьын вал;18кин ке тынад косонэдлы пумит султӥз ке, тынэсьтыд солы быдэстыны косыса верам кудзэ ке но кылдэ ӧз ке быдэсты, – ваньзы сыӵе муртъёс виемын луозы. Но юн сыл, кышкасьтэм лу!»
Глава 1