Выбрать язык
Книги Ветхого Завета
Книги Нового Завета
с русским текстом1Агай-выныдлэсь йыромем ошсэ яке ыжзэ адӟид ке, асьсэ понназэс эн кельты, агай-выныд доры соосты берыкты;2нош агай-выныд тыныд кыдёкын ке улэ, яке тон сое уд тодӥськы, соку соосты аслад гидад вай, агай-выныд утчаны кутскытозь соосты дорад возь, соку ини соосты солы берыкты;3тазьы ик кар солэн ишакеныз, тазьы ик кар солэн дӥськутэныз но, озьы кар, шедьтӥд ке, агай-выныдлэн ыштэм вань тӥрлыкеныз но, таӵе ужлэсь тон палэнскыны кулэ ӧвӧл.
4Агай-выныдлэсь сюрес вылэ пограм ишаксэ яке ошсэ адӟид ке, вӧзтӥзы эн кошкы, агай-выныныд ӵош соосты ӝут.
5Кышномурт пиосмурт дӥськутэз вылаз медаз дӥся, пиосмуртлы но кышномурт дӥськутэз вылаз дӥсяны уг яра, уго Инмаред Кузё-Инмар азьын тазьы лэсьтӥсь мурт юрӟым.
6Сюрес вылысен писпу борды лэсьтэм тылобурдо карез адӟид ке, яке музъем вылысь адӟид ке, отын пиосыз яке пузъёсыз вань ке, анаез пиосыз вылын яке пузъёсыз вылын пуке ке, анайзэ пиосыныз валче эн басьты:7анайзэ эрике лэзь, нош пиоссэ аслыд басьтыны быгатӥськод. Кузё-Инмарлэсь курон-косонъёссэ быдэсъяса улӥд ке, тыныд умой луоз, улоно нуналъёсыд кузялозы.
8Выль корка пуктыны кутскид ке, липет бордад кутэт пул шуккы: соку липет йылысьтыд кин ке но усёно луиз ке, коркадэ вирен уд сапта.
9Виноград бакчаяд мукет будослэсь кидыссэ но эн кизьы, кизид ке, соку тыныд [аслад] виноград бакчаысьтыд мульыосты но бичаны уг яра, отчы кизем мукет будослэсь емышсэ но бичаны уг яра.10Ошен но ишакен ӵош бусыдэ эн гыры.11Пӧртэм арбериослэсь – ыжгонлэсь, етӥнлэсь – ӵош куыса вурем дӥськутэз вылад эн дӥся.
12Шобыръяськон выл дӥсянэдлэн ньыль сэрегаз ик туго чукъёс лэсьты.
13Кин кышно ваем бераз кышноез доры пыроз но сое адӟемпотостэм кариз ке,14со сярысь умойтэм, урод кылъёс вӧлмытыны кутскиз но тазьы шуиз ке: «Мон та муртэ кышно басьтӥ, со доры пыри, нош со ныллыксэ ыштэмын вылэм ини».15Соку та ныллэн атаеныз анаез нылзы ныллыксэ ыштэмын ӧй вал шуыса возьматӥсь тодметэз мед басьтозы но кар капка доры карлэн тӧроосыз доры сое мед ваёзы;16ныллэн атаез тӧроослы мед шуоз: «Нылме мон та пилы кышнолы сётӥ вал, нош со [али] сое синазькыль каре,17тани табере со [нылы вылэ] пож ву киська но шуэ: ”Тынад нылыд ныллыксэ ыштэмын вылэм ини”; нош мынам нылылэн ныллыкез ыштэмын ӧй вал, тани солэн тодметэз». Соку городысь тӧроос азе дӥськутсэ вӧлдо.18Соку та городысь тӧроос та пимуртэз мед кутозы, вӧсь мед карозы,19израиль ныл сярысь йӧнтэм кылъёс верамез понна та пи вылэ сю сӥкль азвесь пени тырон мед понозы но со дунэз нылашлэн атаезлы мед сётозы; нош та нылаш солы кышно луыса ик мед кылёз, быдэс даураз соин люкиськыны со уг быгаты ни.
20Нош пимуртлэн верамез зэм ке, ныллэн ныллыксэ возьматӥсь тодметэз ӧвӧл ке,21соку та нылэз атаезлэн ӧс выжыяз мед ваёзы но городын улӥсь калык сое, изэн зӥръяса, мед виёз, уго со израиль калык пӧлын юрӟым уж лэсьтӥз, атаезлэн юртаз азыса-калгыса улӥз; озьы ас пӧлысьтыд уродэз-лекез быдты.
22Пиосмуртэз мукет муртлэн кышноеныз кыллемысь учыртӥзы ке, соку кыксэс но виыны кулэ: кышномуртэн кыллись пиосмуртэз но, кышномуртэз но; озьы Израиль бордысь уродэз-лекез быдты.
23Картлы курам нылмуртэз кыӵе ке пиосмурт городысен пумитаса соин артэ выдӥз ке,24нылмуртэз юрттэт курыса кесяськымтэез понна, нош пиосмуртэз матысезлэсь кышнозэ саптамез понна кыкназэс ик кар капка доры вае но, изэн зӥръяса, соосты вие; озьы ас пӧлысьтыд уродэз-лекез быдты.
25Картлы курам нылмуртэз кыӵе ке пиосмурт бусыысен пумитаса кутӥз но сое эриктэмаз ке, соку эриктэмась пиосмуртэз гинэ виыны кулэ,26нош нылашлы номыр но эн кар; нылмурт виыны ярамон йыруж ӧз лэсьты, уго та учыр укша кин ке матысез вылэ урдскыса виён учырлы;27уго пиосмурт нылашен бусыысен пумиськиз но, картлы курам нылаш черекъяз ке но, нокинлы вал сое мозмытыны.
28Курамтэ нылмуртэз пумитаса, пиосмурт сое кутӥз но азон сьӧлык лэсьтыны ас вӧзаз выдтӥз ке, соосты адӟизы ке,29соку нылашен изись пиосмурт нылашлэн атаезлы витьтон [сӥкль] азвесь сётыны кулэ, нылаш солэн кышноез мед луоз, малы ке шуоно со нылмуртэз сантэмаз; вань улытозяз со та нылашлэсь люкиськыны уг ни быгаты.
30Нокин но атаезлэсь кышнозэ кузпаллы басьтыны кулэ ӧвӧл, атаезлэсь дӥськут дурзэ ӝутыны кулэ ӧвӧл.
Глава 22