Выбрать язык
Книги Ветхого Завета
Книги Нового Завета
с русским текстом1Инмаредлэн Кузё-Инмарлэн тынад киулад улыны сётэм музъем вылысьтыз сюй вылын кыллись вием мурт шедьтэмын луиз ке, тодмо но ӧвӧл ке, кин сое вием,2соку тынад тӧроосыд, судьяосыд мед потозы но вием муртлэн котырысьтыз городъёсы мынӥсь сюресъёслэсь кузьдалазэс мед мерталозы;3кулэм муртлы тужгес но матысь городысь тӧроос ужамтэ, чыртыяз сиес тырылымтэ ветылэз мед басьтозы,4со городысь тӧроос та ветылэз кыр нёжалэ мед нуозы, кытын музъемез но гырымтэ, кизьымтэ, со нёжалын та ветылэз мед вандозы;5соку Левий пиос, священникъёс, лыктозы, уго соосты Инмарды Кузё-Инмар бырйиз Аслыз ужатыны-тыршыны, Кузё-Инмарлэн нимыныз бакель карыны, соослэн верам кылзыя вань ченгешон ужпумъёсты сэрттыны-пертчыны, вань изъян ваемъёсты эскерыны кулэ,6со городысь вань тӧроос, кулэм муртлэн матаз улӥсьёс, нёжалын вандэм ветыллэн [йыр] вылаз кизэс мед миськозы,7тазьы вераса мед ялозы: «Та вирез милям киосмы ӧз кисьтэ, синъёсмы но ӧз адӟе;8Аслэсьтыд израиль калыктэ, Кузё-Инмаре, кудзэ Тон [Египет музъемысь] мозмытӥд, сузя-чылкытаты, янгыштэм вир кисьтӥськем понна Аслэсьтыд израиль калыктэ янгыше эн уськыты». Соку соос вирлэсь сузяськозы.9[Инмаред] Кузё-Инмар азьын [ӟечлыко,] шонерлыко ужъёс лэсьтыса улэмед потэ ке, янгыштэм муртлэн кисьтӥськем вирызлэсь чылкытатӥськы.
10Тушмонъёсыдлы пумит ожен потӥд ке, Инмаред Кузё-Инмар соосты тынад киулад сётӥз ке, соосты тон пленэ басьтӥд ке,11пленэ шедемъёс пӧлысь чебер кышномуртэз адӟид ке, сое яратӥд ке, сое аслыд кышнолы басьтэмед потӥз ке,12соку сое тон дорад вай, нош со йырзэ мед ӵышкоз, гижыоссэ мед вандылоз,13пленын улэм дӥськутсэ мед воштоз, тынад коркад мед улоз, толэзь ӵоже атаез понна, анаез понна жаляса мед бӧрдоз; собере ини тон со доры пырыны но солы кузпал луыны быгатӥськод, со тынад кышноед луоз;14нош бӧрысь со тыныд кельшемысь дугдӥз ке, соку тон сое кошкыны лэзь, мед мыноз, кытчы мынэмез потэ, азвесен сое эн вуза, ляльчи-вар кышно эн кары, малы ке шуоно тон сое ултӥяд.
15Кинлэн ке кык кышноез луиз ке, соос пӧлысь одӥгзэ яратӥз, нош мукетсэ ӧз ке яраты, яратоноез но, яратымтэез но кышноосыз пи нуны вайизы ке, нырысь ик яратымтэ кышноезлэсь пиез вордскиз ке,16соку, ваньбурзэ пиосызлы люкылон дыръя, яратоно кышноезлэсь пизэ яратымтэ кышноезлэсь нырысь вордскем пиезлэсь вылӥегес пуктыны уг быгаты.17Та учыре со яратымтэ кышноезлэсь пизэ аслаз нырысь вордскем пиез шуыса мед лыдъялоз, ваньбурез пӧлысь солы кык полэс мед сётоз, уго со кужымезлэн кутсконэз луэ, нырысь вордскем пилэн правоез со кие сюре.
18Нош кинлэн ке пиез керетӥсь-бугыръяськись, тэрытскисьтэм луиз ке, атаезлэсь но, анаезлэсь но верамзэс санэ понӥсьтэм луиз ке, сое вӧсь карыса но утчазы, нош со таослэсь верамзэс пеляз но уг ке поны, –19соку талэн атаеныз анаез сое мед кутозы но асьсэ городзылэн тӧрооссы доры мед ваёзы, улон городзылэн капкаез доры,20татысен городзылэн тӧрооссылы тазьы мед шуозы: «Милям та пимы керетӥсь-бугыръяськись, тэрытскисьтэм, милесьтым верам кылъёсмес санэ уг поны, ваньбурез быдтӥсь, юись»,21соку та городын улӥсьёс та пиез, изэн вылаз зӥръяса, мед виёзы; озьы ас пӧлысьтыд уродэз-лекез быдты, та сярысь вань израиль калык кылоз но куалектоз.
22Кин виыны ярамон йыруж лэсьтӥз, сое виизы но солэсь шӧйзэ тон писпуэ ошид ке,23солэн мугорыз писпу бордын уйзэ потыны кулэ ӧвӧл, солэсь шӧйзэ со нуналэ ик сюе ват, уго [котькудӥз но писпуэ] ошем мурт Инмар азьын каргамын, Инмаредлэсь Кузё-Инмарлэсь тыныд люкетлы сётэм музъемзэ эн сапта.
Глава 21