Выбрать язык
Книги Ветхого Завета
Книги Нового Завета
с русским текстом1Моисей вань израиль калыкез люказ но соослы шуиз: «Израиль, туннэ верано пуктон-косонъёсты, законъёсты пеляд пон, дышетэ соосты, тырше соосты быдэсъяны.2Асьмелэн Инмармы Кузё-Инмар Хоривысен асьмемын сӥзён-косон пыр кусып кылдытӥз,3со сӥзён-косонэз Кузё-Инмар атайёсмылы ӧз, асьмелы, али улӥсьёслы, сётӥз.4Гурезь йылысен, тыл пӧлысен, ваче син учкыса, тӥледлы Кузё-Инмар вераз,5нош мон со виын Кузё-Инмарен тӥ вискын сылӥ Кузё-Инмарлэсь кылзэ тӥледлы веран понна, уго тӥ, тыллэсь кышкаса, гурезь йылэ ӧд тубе. Соку Со шуиз:
6”Мон – Кузё-Инмар, тынад Инмаред, Египет музъемысь, ляльчиын улон коркась, тонэ Поттӥсь;7Мынам азям тынад мукет инмаръёсыд медаз луэ.
8Аслыд сульдэр-идол эн лэсьты, мар вань вылӥын – инмын, мар вань улӥын – музъем вылын, мар вань музъемлэн улӥяз – вуын, соослэсь туссэс-суредзэс аслыд эн лэсьты,9соослы эн йыбыртъя, соослы ужаса-тыршыса эн улы, уго Мон тынад Инмаред Кузё-Инмар, кылэз юн юась Инмар, атайёслэн янгышъёссы-сьӧлыкъёссы понна соослэсь нылпиоссэс, Монэ адӟонтэм карисьёсты, куинетӥ, ньылетӥ ёзозь-выжыозь вӧсь карисько,10Монэ яратӥсьёслы, Мынэсьтым курон-косонъёсме быдэсъясьёслы сюрс выжыозь Аслэсьтым гажан-жалянме возьматӥсько.
11Инмаредлэсь Кузё-Инмарлэсь нимзэ юнме эн вера, уго [Инмаред] Кузё-Инмар Солэсь нимзэ юнме верась муртэ вӧсь карытэк уз кельты.
12Суббота нуналэз уть, дун-чылкыт ул со нуналэ, кызьы тонэ улыны косӥз Инмаред Кузё-Инмар;13куать нунал ужа, соку вань ужъёстэ лэсьты,14нош сизьыметӥзэ – суббота нуналэз – Инмаредлы Кузё-Инмарлы сӥзь: [со нуналэ] номыр но эн ужа тон ачид но, пиед но, нылыд но, ляльчиед но, ляльчи кышномуртэд но, ошед но, ишакед но, нокудӥз пудоед но, тон дорын улӥсь сьӧрлось лыктэм мурт но; ляльчи пиед но, ляльчи кышномуртэд но, [ишакед но,] тон кадь ик мед шутэтскозы;15тодад возь: Египет музъемын тон ляльчи адями вал, нош Инмаред Кузё-Инмар Аслаз кужмо киыныз, юн суйбыгытэныз тонэ отысь поттӥз, со понна ик тынад Инмаред Кузё-Инмар тонэ суббота нуналэз утьыны, сое [дун-чылкыт ортчытыны] косӥз.
16Атайдэ но, анайдэ но сӥлы кар, кызьы тонэ косӥз Инмаред Кузё-Инмар, – кема мед улод, музъем вылын тыныд умой мед луоз; та музъемез тыныд Инмаред Кузё-Инмар сётэ.
17Эн виы.
18Азон-калгон сьӧлыке эн пыры.
19Эн лушкаськы.
20Мукет мурт вылэ ӧвӧлзэ вань карыса эн вера.21Муртлэсь кышнозэ аслыд кулэ эн кары; муртлэсь корказэ но, солэсь бусызэ но, солэсь ляльчизэ но, солэсь ляльчи кышномуртсэ но, солэсь ошсэ но, солэсь ишаксэ но, [солэсь нокыӵе пудозэ но] – маиз вань, солэсь номырзэ но аслыд кулэ эн кары”.
22Та кылъёсты Кузё-Инмар гурезь йылысен, тыл пушкысен, пилем, тём пеймыт, [сильтӧл] пушкысен бадӟым куараен вань люкаськем калыктылы вераз, собере ӧз ни вера, кык изпулъёс вылэ гожтӥз но соосты мыным сётӥз.
23Пеймыт пушкысь куара кылэмды бере, гурезь тылын ӝуаса улон дыръя, тӥ мон доры лыктӥды, выжыостылэн вань кивалтӥсьёссы, тӥляд тӧроосты но,24соку тӥ шуиды: ”Тани, асьмелэн Инмармы Кузё-Инмар Аслэсьтыз данлыксэ, Аслэсьтыз быдӟымлыксэ возьматӥз, тыл пушкысь Солэсь куаразэ ми кылӥмы; туннэ ми адӟимы, кызьы Инмар адямиен вераське но кызьы со адями улэп кыле.25Табере малы милемлы кулоно? Со быдӟым тыл милемыз сиёз ук; Инмармылэсь Кузё-Инмарлэсь куаразэ эшшо кылӥмы на ке, соку куломы.26Уго вань меда кыӵе ке но лулмугор, кудӥз тыл пушкысен верась улэп Инмарлэсь куаразэ ми кадь мед кылысал но улэп мед кыльысал?27Тон мын но, мар [тыныд] Инмармы Кузё-Инмар вералоз, сое ваньзэ кылзы, собере сое тон милемлы ваньзэ вера, нош ми кылзомы, ваньзэ сое быдэсъяломы”.
28Тӥлесьтыд монэн вераськем кылъёстэс Кузё-Инмар кылӥз но мыным Кузё-Инмар тазьы шуиз: ”Та калыклэсь тыныд верам кылъёссэ Мон кылӥ; мар гинэ ӧз вералэ, ваньмыз умой вал;29э, соослэн сюлэмзы сыӵе ке луысал, – Мынэсьтым кышканэн мед улысалзы, вань нуналъёсы Мынэсьтым вань курон-косонъёсме быдэсъяса мед улысалзы, соку соослы, соослэн пиоссылы но умой луысал пумтэм вапумъёс ӵоже!30Мын, вера соослы: ”Балаганъёсады берытске”,31нош тон татчы Монэн огазе кыль, соку Мон тыныд вань курон-косонъёсты, пуктон-косонъёсты, законъёсты верало, соослы тон калыкез дышетыны кулэ, соослэн киулазы сётоно музъемам [соосты быдэсъяса] улыны мед быгатозы шуыса”.
32Чаклаське, кызьы косӥз Инмарды Кузё-Инмар, озьы улэ, бурпала но, паллян пала но эн кожылэ;33Инмардылэн Кузё-Инмарлэн ветлыны косэм сюрес вылтӥз ветлэ, мед улоды, тӥледлы ӟеч мед луоз, киулады басьтоно музъемын кема дыр ӵоже мед улоды».
Глава 5