Выбрать язык
Книги Ветхого Завета
Книги Нового Завета
с русским текстом1«Израиль, кылзы: пуктон-косонъёсты, законъёсты [туннэ] мон тӥледыз быдэсъяны дышето, улэп мед кылёды, [мед йылоды] но мыныса Кузё-Инмарлэсь, тӥляд атайёстылэн Инмарзылэсь, тӥледлы сётоно музъемзэ люкетлы мед басьтоды;2кыӵе курон-косон мон тӥледлы сёто, со борды номыр но эн ни ватсалэ, номырзэ но со бордысь эн куштэ; Инмардылэсь Кузё-Инмарлэсь курон-косонъёссэ быдэсъяса улэ, соосты мон [туннэ] тӥледлы верало.
3Тӥ ас синмыныды адӟиды [ваньзэ], мар кариз асьмелэн [Инмармы] Кузё-Инмар Ваал-Фегорен: Ваал-Фегор сьӧры мынӥсь вань адямиосты Инмаред Кузё-Инмар тынад калыкед пӧлысь быдтӥз;4нош тӥ, Инмарды Кузё-Инмар борды сюлмыныды лякиськемъёс, туннэ нуналозь но ваньды улэпесь.
5Тани, мон Инмарелэн Кузё-Инмарлэн косэмезъя тӥледыз пуктон-косонъёслы, законъёслы дышетӥ, тӥляд улыны пыроно, киултоно музъемады тӥ соосты быдэсъяса улыны мед быгатоды;6озьыен, тӥ соосты уте, быдэсъялэ, уго со бордын тӥляд визьлыкты, визьнодды мурт калыкъёс азьын адӟиськозы, соос вань та пуктон-косонъёс сярысь кылозы но шуозы: ”Одӥг та гинэ быдӟым калык визьлыко, визьнодо”.7Вань на меда мукетыз быдӟым калык, кин дорын инмаръёсыз сокем матын мед улысалзы, кызьы асьмелэн Инмармы Кузё-Инмар асьмелы матын улэ? Ку гинэ Солы медам вазиське, Со кылэ.8Вань на меда мукетыз быдӟым калык, кинлэн мед луысалзы такем шонерлыкоесь пуктон-косонъёсыз, законъёсыз, быдэс та закон кадез, кудзэ мон туннэ тӥледлы ӵектӥсько?
9Но одно ик чакласькы, туж тыршыса лулдэ уть, ас синмыныд адӟем ужъёсты эн вунэты, вань улон дауред ӵоже соос сюлмысьтыд медаз потэ. Соос сярысь аслад пиосыдлы, пиосыдлэн пиосызлы вера-тодыты, –10со нунал сярысь, куке тон Хорив дорын, [люкаськон нуналэ,] Инмаред Кузё-Инмар азьын сылӥд, куке Кузё-Инмар мыным шуиз: ”Мон доры калыкез люка, Мон соослы Аслэсьтым кылъёсме иворто, соосты кылыса, соос музъем вылын вань улоно нуналъёссы ӵоже Мынэсьтым кышкаса улыны дышетскозы, солы ик асьсэлэсь пиоссэс но дышетозы”.11Тӥ гурезьлэн матаз лыктӥды, гурезь выжые вуыса дугдӥды, нош гурезь инмозь ик ӝутскись тылын ӝуаса улӥз, пеймыт вал, пилемъёс ӝокатӥзы, тём-тём пеймыт улӥз.12Соку Кузё-Инмар тӥледын [гурезьысен,] тыл пӧлысен, вераськыса улӥз; [Солэсь] куаразэ тӥ кылӥды, нош тусбуйзэ ӧд адӟе, куаразэ гинэ кылӥды.13Со тӥледлы Аслэсьтыз сӥзён-косонзэ ялӥз, дас куронзэ-косонзэ сётӥз, сое тӥледыз быдэсъяны косӥз, сое кык изпулъёс вылэ гожтӥз;14со виын Кузё-Инмар монэ тӥледыз пуктон-косонъёсты, законъёсты дышетыны косӥз, киултыны пыроно музъемады соосты быдэсъяса мед улоды.
15Лулады-сюлмады тае юн возе: Кузё-Инмар Хорив [гурезьын], тыл пӧлысен, тӥледлы веракуз, со нуналэ тӥ нокыӵе но тусбуез ӧд адӟе.16Тӥ медад сӧриське но пиосмуртлы яке кышномуртлы укшась, вӧлыса, суредаса асьтэлы кыӵе ке но сульдэр-идол медад лэсьтэ,17музъем вылысь кыӵе ке но пудолэсь сульдэрзэ, инбам ултӥ лобась кыӵе ке но тылобурдолэсь сульдэрзэ,18музъем вылтӥ нюж кыстӥськыса ветлӥсь кыӵе ке но сыӵе макелэсь сульдэрзэ, музъем улысь вуын уясь кыӵе ке но чорыглэсь сульдэрзэ эн лэсьтэ;19инме учкид ке, шундыез, толэзез, кизилиосты, вань ин кужымъёсты адӟид ке, визь сынаськонэ медад сюры но соослы йыбырттоно, ужано-тыршоно медад луы, уго Инмаред Кузё-Инмар соосты инбам улысь вань мукет калыкъёслы висъяз.20Нош [Инмар] Кузё-Инмар тӥледыз корт ӵыжатон гурысь, Египетысь, поттӥз, Солэн Аслаз быръем калыкез тӥ мед луоды шуыса, – кызьы со туннэ быдэсмиз но.21[Инмар] Кузё-Инмар тӥледлы луыса мыным вожзэ поттӥз но кыл сётӥз: Иордан тупала уд поты, Инмаредлэн Кузё-Инмарлэн тынад калыкедлы люкетлы сётоно ӟечлыко музъемаз уд пыры, шуиз;22Иордан тупала потытэк мон та музъеме кулыса кылё, нош тӥ Иордан тупала выжоды но со ӟечлыко музъемез киулады басьтоды.23Утиське-чаклаське, Инмардылэсь Кузё-Инмарлэсь тӥледын ӵош пуктэм-кутэм сӥзён-косонзэ медад вунэтэ, мае ке но суредась-возьматӥсь сульдэръёсты-идолъёсты асьтэлы медад лэсьтэ, кызьы тонэ косӥз-куриз Инмаред Кузё-Инмар;24уго тынад Инмаред Кузё-Инмар – тыл кадь ньылӥсь, кылэз юн юась Инмар.
25Тынад пиосыд вордскизы ке, пиосыдлэн пиоссы вордскизы ке, музъем вылын кема улэмды бере сӧриськиды ке – мае ке возьматӥсь сульдэр-идол лэсьтӥды ке, та ярантэм-лек ужез Инмардылэн Кузё-Инмарлэн азяз лэсьтыса, Солэсь вожзэ поттӥды ке,26туннэ мон, инмез но музъемез адӟисе ӧтьыса, тӥ азьын ялӥсько: Иордан вамен выжыса люкетлы басьтэм музъемдэс ӝоген ыштоды; со музъемын кема улыса уд вуэ, кулоды-быроды;27Кузё-Инмар тӥледыз [вань] калыкъёс пӧлы пазьгоз, Кузё-Инмар тӥледыз пӧртэм калыкъёс пӧлы нуоз, соос пӧлын тӥляд лыдды ӧжыт луоз;28отын тӥ пулэсь, излэсь киын лэсьтэм [мурт] инмаръёслы йыбыртъяса улоды, – соос уг но адӟо, уг но кыло, уг но сисько, нырынызы но уг шӧдо.
29Отысен Инмардэ Кузё-Инмарез утчад ке, вань сюлмыныд, вань лулыныд Сое утчад ке, тон [Сое] шедьтод.30Кӧтӝожен улыкуд, дыр ортчыса, ваньмыз та тон доры вуиз ке, соку тон Инмаред Кузё-Инмар пала берытскод, Солэсь верам кылзэ кабыл басьтыса улод.31Тынад Инмаред Кузё-Инмар – [ӟечлыко,] гажась-жалясь Инмар; Со тонэ уз кушты, уз быдты тонэ, атайёсыдлы сётэм сӥзён-косонзэ уз вунэты, сое Со кыл сётыса юнматӥз.
32Тынэсьтыд азьвыл луэм дыръёслэсь-вапумъёслэсь юа, Инмарлэн музъем вылэ адямиез кылдытэм нуналысеныз кутскыса луэм дыръёслэсь-вапумъёслэсь юа, инлэн пумысеныз инлэн пумозяз юа: та кадь мукет кыӵе ке но быдӟым уж вал-а, таӵеез сярысь кытын ке но, куке но кылэмын вал-а?33[Кыӵе ке но] калык тон кадь тыл пушкысь верась [улэп] Инмарлэсь куаразэ кылӥз-а, но со улэп кылиз шуыса, тон кылӥд-а?34Мурт калык пӧлын улӥсь калыкез доры лыктыса, кыӵе ке но инмар сое ас дораз басьтыны утчаз-тыршиз-а, – курадӟонъёс, паймымон тодметъёс, паймымон ужъёс, ожмаськон-жугиськонъёс ыстылыса, аслаз кужмо киыныз, вӧлъям бур киыныз быдӟымесь, кышкытэсь ужъёс возьматыса, кызьы тӥляд Инмарды Кузё-Инмар тӥ понна Египетын тынад син азяд лэсьтӥз?35Тыныд тае адӟыны сётэмын, тон мед тодод [тынад Инмаред] Кузё-Инмар гинэ Инмар луэ, Со сяна, мукетыз ӧвӧл;36тыныд Со инмысен тонэ дышетон-нодъян понна Аслэсьтыз куаразэ кылытӥз, музъем вылын Аслэсьтыз быдӟым тылзэ тыныд возьматӥз но, тон тыл пушкысь Солэсь верам кылъёссэ кылӥд;37тынэсьтыд вашкала атайёстэ Со яратӥз, соос бере вордскем калыкез, [тӥледыз], Со Аслыз бырйиз, соин Со Аслаз быдӟым кужыменыз Ачиз тонэ Египетысь поттӥз,38тынад азьысьтыд тынэсьтыд кужмоесьсэгес, тросгес лыдо калыкъёсты улляны но соослэсь музъемзэс тыныд люкетлы сётон вылысь тонэ отчы пыртыны, кызьы али но адӟиськомы.39Озьыен, туннэ тод, сюлмад пон: [тынад Инмаред] Кузё-Инмар – со Инмар вылӥын – инмын, улӥын – музъем вылын; [Со сяна,] мукетыз ӧвӧл;40Солэсь пуктон-косонъёссэ, курон-косонъёссэ, кудъёссэ туннэ мон тыныд сётӥсько, быдэсъяса ул, соку тыныд, тон бере улыны кылёно нылпиосыдлы ӟеч мед луоз, Инмаредлэн Кузё-Инмарлэн пумтэм дыръёслы сётэм музъемаз тон кема улоно мед луод».
41Соку Моисей Иорданлэн тупалаз, шундыӝужан палысьтыз куинь городъёсты висъяз,42отчы матысь муртсэ янгышен виись мурт пегӟыны-ватӥськыны мед быгатоз, кудӥз толон но, толон валлян но вием муртэн тушмонъяськыса ӧз улы вал, – та городъёс пӧлысь одӥгаз со ватӥськыса, улэп кыльыны мед быгатоз:43Бецере – ӵошкыт луоё кыр дуннеысь Рувим выжылэн музъемаз интыяськем городэ; Рамофе – Галаадысь, Гад выжылэн музъемаз интыяськем городэ, Манассия выжылэн Васанэ интыяськем Голан городаз.
44Тани Моисейлэн израиль пиослы ялэм законэз;45тани Моисейлэн верам косонъёсыз, пуктон-косонъёсыз, уставъёсыз, соосты со Египетысь потэм беразы [луоё кыр дуннеысен] израиль пиослы вераз,46Иордан шур сьӧрысен, Есевонын улӥсь аморрей калыклэн Сӥгон эксэезлэн музъемаз, Беф-Фегорлэн ваче беринысьтыз нёжалысен вераз, Египетысь потэмзы бере Моисей отысен израиль пиосын ӵош аморрей эксэез вииз.47Киултӥзы солэсь музъемзэ, Васанлэн Ог эксэезлэсь музъемзэ, Иорданлэн шундыӝужан палысьтыз кык аморрей эксэйёслэсь музъемзэс киултӥзы,48Арнон ӧрлэн ярдураз сылӥсь Ароер дорысен кутскыса Сӥон, со ик Ермон, гурезь дорозь,49Иорданлэн сопалысьтыз, шундыӝужан палысьтыз, быдэс ӵошалэз ӵошаллэн зарезь дорозяз, Фасги гурезь выжыозь кыстӥськись музъемез киултӥзы.
Глава 4