Выбрать язык
Книги Ветхого Завета
Книги Нового Завета
с русским текстом1Сяс тейнек эряви кемоста кирдемс мяльсонк сянь, мезе кулеме: афолеме усков виде киста.2Вдь, кда ангелхнень вельде азф валсь ульсь кеме и коень эрь кодама коламась и аф кулхцондомась кандсть кодама эряви пандома,3эста дяряй минь мянттяма пандомада, кда тя инь оцю идемать лувсаськ аф питникс? Тя идемать колга васенцекс корхтась Сонць Азорсь, и сят, конат кулезь Сонь валонц, кемокстазь сонь и пачфтезь сонь тейнек.4Сонцьке Шкайсь синь мархтост марса кемокстазе тя валть тяштькснень, дивань тефнень и эрь кодама вии тефнень вельде, и Иняру Ваймопожфть казнензон вельде, конатнень Сон явондсыне Эсь мяленц коряс.
5Сай пингонь масторлангть, конань колга минь тяса корхтатама, Шкайсь максозе аф ангелхнень кядялу.6Меколанкт, кие-бди коса-бди Сёрматфксса корхтась:
«Кие стамсь ломанць, мес Тон арьсят колганза?
Али ломанень цёрась, мес Тон ванат мельганза?
7Нюрьхкяня пингонди*а
Тон путыть сонь ангелхнень коряс сяда алу.
Тон щафтыть сонь прязонза иневалдонь и шнамань каштазть
и путыть сонь азоркс Тонь тефнень лангса.
8Тон семботь путыть сонь пильгонзон алу»*б.
Мзярда Шкайсь ладязе сонь азоркс семботь лангса, эста Сон мезевок ашезь када сонь азорксшифтомонза. Тяни минь нинге аф няйсаськ сонь азорксшинц семботь лангса.9Но минь няйсаськ Иисусонь, конань прязонза щафтф иневалдонь и шнамань каштаз маятамаса куломанц инкса. Сон нюрьхкяня пингонди путфоль ангелхнень коряс сяда алу, сяс мес Шкаень пароказнеть коряс Иисусонди эрявсь куломс эрь ломанть инкса.
10Тяфта улемаль: Шкайсь, конань инкса и конань вельде сембось ули-эряй, и кона лама идь вятни Эсь иневалдонцты, маятаматнень вельде тиезе афсатыксфтомокс Сянь, кие тюрсь инксост и вятьсыне синь идемати.11Вдь и Ся, кие иняруяфты и сят, конат иняруяфтовихть, синь сембонь фкя Алясна. Сяс Иисус аф визди лемнемс синь брадкс. Сон корхтай:12
«Мон пачфтьса Тонь лемцень брадненди,
пуромксса моразь шнате Тонь»*в.
13И нинге корхтай:
«Мон карман надияма Сонь лангозонза»*г,
и нинге:
«Ваган Мон и иттне, конатнень максозень Тейне Шкайсь»*д.
14Ня иттне ащихть ронгста и верста, сяс Иисусовок арась синь лацост. И тяфта, куломать вельде Сон машфтозе вийда сянь, конань ули азорксшиц куломать лангса, лиякс мярьгомс, идемэвозть,15и нолдазень воляшис сембонь сятнень, конат куломада пелеманкса кирневсть эряфоньберьф урексшиса.16Вдь Сон лезды аф ангелхненди, а Авраамонь идензонды.17Сяс Иисусонди эрявсь сембоса арамс брадонзон лаца. Эста Сон маштоль покодемс кельгозь ужяльди озксвятиень оцюнякс, кона тиенди Шкайть мяленц коряс, и маштоль максомс Эсь прянц озксказнекс ломаттнень пежеснон идемаснон-рамамаснон инкса.18Сяс мес Сон ётазень маятаматнень и ульсь варчсев, Сон машты лездомс сятнендинге, конат повондыхть варчсемас.
*а 2:7 Сёрмадысь корхтай Христость эряфонц колга тя масторлангса. Евреень Сёрматфксса кафксоце псаломса тя валсь канды лия смузь: «аф ламода».
*б 2:6-8 Псалтирь 8:5-7
*в 2:12 Псалтирь 21:23
*г 2:13 Исаия 8:17
*д 2:13 Исаия 8:18
Глава 2