Выбрать язык
Книги Ветхого Завета
Книги Нового Завета
с русским текстом1Ётай пинкнень Шкайсь ламоксть и эрь кода корхнесь минь аляньконди пророкнень вельде, пяльксонь-пялькс няфнемок тейнек Эсь прянц.2А ня мекольдень шитнень Сон корхтась тейнек Эсь Цёранц вельде, конань вельде тиезень менельхнень-масторхнень и конанди Сон макссы семботь.3Цёрась – Шкаень иневалдть вандолфоц и Сон Эсьсонза няфнесы афкукс кодама Шкайсь, и Сон семботь кирдьсы Эсь валонц виенц вельде. Сон аруяфтомазь минь пеженьконь эзда и тяда меле озась менельса инь оцю Шкайть озама вастонц види ширезонза.
4Цёрац арась ангелда оцюкс сяшкада, конашкада оцю Тейнза максф лемсь ангелхнень лемснон коряс.5Вдь Шкайсь мзярдонга фкявок ангелти ашезь мярьге:
«Тон Монь Цёразят, тячи Мон шачфтыхтень Тонь»*а
али тяфта:
«Мон улян Тейнза алякс, а Сон ули Тейне Цёракс»*б.
6И тага, Эсь васень Цёранц масторти сувафтомста, Сон мярьгсь:
«Катк сембе Шкаень ангелхне комайхть Сонь инголенза»*в.
7Ангелхнень колга азф:
«Сон тиендьсыне Эсь ангелонзон вармакс*г
и Эсь покодиензон толгялькс»*д.
8А Цёранц колга азф:
«Шкай, Тонь оцязоронь озама вастце кирдеви пефтома пинге
и Тонь азорондамань вийце няфневи видексшить вельде.
9Тон кельгить видешить
и прокс ашить кельге койфтома тефнень,
сянкса Шкайсь, Тонь Шкайце, вадензе Тонь кеняртьксонь елейса
сядонга пяк сятнень коряс, конат мархтот»*е.
10И нинге азф:
«Азор, ушетксса Тон путыть тя масторть юронц,
и менельхне тифт Тонь кядьсот.
11Синь сембе юмайхть, аньцек Тон илядат.
Синь сембе таштомихть, кода щапт.
12Тон ашкордасайть синь сире щам лаца, и синь полафтовихть.
Аньцек Тон фалу стамкат, и кизотне Тонь аф аделавихть»*ж.
13Фкявок ангелонди Шкайсь ашезь мярьге:
«Озак Монь види ширезон,
мзярс аф путсайне Тонь пильгалот
Тейть каршек ащихнень»*з.
14Дяряй аф сембе ангелхне – тя лезды ваймопожфт? Синь кучфт лездома сятненди, кинди максови идемась.
*а 1:5 Псалтирь 2:7
*б 1:5 Вторая Книга Царств 7:14
*в 1:6 Псалтирь 96:7
*г 1:7 Греконь кяльса тя валсь кафта смузьса: варма али ваймопожф.
*д 1:7 Псалтирь 103:4
*е 1:8-9 Псалтирь 44:7-8
*ж 1:10-12 Псалтирь 101:26-28
*з 1:13 Псалтирь 109:1
Глава 1