Выбрать язык
Книги Ветхого Завета
Книги Нового Завета
с русским текстом1Эста Иисус озась венчти, уезе меки эрьхкть и пачкодсь ся ошти, коса эрясь*а.2И вов, Тейнза кандсть ацам лангса сяряди, кона колафоль параличса. Мзярда Иисус няезе кемамаснон, мярьгсь сярядити: «Тят пеле, цёрай, тонь пежетне нолдафт».
3Эста койти тонафтыхнень эзда кой-конат арьсесть: «Тя ломанць рахси Шкайть лангса».4Но Иисус шарьхкодезень синь арьсемаснон и мярьгсь: «Мес тинь тяфта кальдявста арьсетяда?5Мезсь сяда тёждя азомс: "Тонь пежетне нолдафт" али: "Стяк и якак"?6Но тяни содасть: Ломанень Цёрать*бмодать лангса ули азорксшиц нолямс пежет». Эста Иисус мярьгсь параличса колафти: «Стяк, сявк ацамцень и архт эсь кудозт».7Ся стясь и тусь эсь кудозонза.8Тянь няемста сембе дивандасть и кармасть шнамонза Шкайть, кона макссь ломаттненди тяшка азорксши.
9Сяда тов молемста, Иисус няйсь ломань, кона озадоль каяфксонь кочкама вастть ваксса. Сонь лемоцоль Матфей. Иисус корхтай тейнза: «Мольхть Монь мельган». Матфей стясь и тусь Иисусонь мельге.
10Мзярда Иисус ярхцась Матфеень пяле, тоза састь ламоц каяфксонь кочкайхне и лия пежуфне и озасть*в фкя шра ваксс Иисусонь и Сонь тонафниензон мархта.11Фарисейхне няезь тянь и кармасть тонафнихнень кизефнема: «Мес тинь Тонафтыенте ярхцай каяфксонь кочкайхнень и лия пежуфнень мархта?»12Иисус марязе тянь и мярьгсь: «Пчкафтысь эряви аф шумбрати, а сярядити.13Арда шарьхкодесть, кодама смузь кандыхть Сёрматфксонь*г ня валхне: "Мон учан эздонт кельгозь ужяльдема*д, а аф озксказнень каннема". Мон сань пежу ломаттнень Шкайти шарфтоманкса, а аф видексшиса эряйхнень».
14Эста Иисусти маладсть Иоаннонь тонафниенза и кизефтезь: «Мес минь и фарисейхне сидеста кирттяма пост, а Тонь тонафнихне – аф?»15Иисус мярьгсь тейст: «Кали пичедихть рьвяяма илань инжихне, мзярда рьвяяйсь мархтост? Но сайхть шит, мзярда рьвяяйть сявсазь ёткстост, и эста синь кармайхть поставама.
16Кивок аф панни ташта щамти од щамста сязьф панкс; сяс мес од панкссь озай и варясь сядонга келеми.17Стане жа аф кайсихть и од вина кедень ташта кяскавс, сяс мес кедень кяскафне сязевихть, винась шуди и кяскафне юмайхть. Од винать кайсесазь кедень од кяскавс, эста и винаське и кяскафневок ванфтовихть».
18Мзярда Иисус корхтась тейст тянь колга, Тейнза маладсь фкя оцюня, прась пильгозонза и кармась корхтама: «Монь стирезе аньцек тяни кулось. Сак, путыть лангозонза кяттнень, и сон кармай эряма».19Иисус стясь и тусь мельганза, тонафниензовок мольсть мельгаст.
20Тя пингоня фкя авась, кона кемгафтува киза сярядсь веронь шудемаса, фталда маладсь Иисусонди и токазе Сонь щамонц пенц.21Авась эсь пачканза арьсесь: «Кда аньцек токаса Сонь щамонц, пчкан».22Иисус шарфтсь, няезе сонь и мярьгсь: «Стирняй, тят пеле, кемамаце пчкафтонзе*е тонь». И авась эстокиге пчкясь.
23Мзярда Иисус сувась оцюнять кудс и няезень нюдиса*ж морайхнень и явсихнень,24Сон мярьгсь тейст: «Лиседа тяста. Стирнясь ашезь кула, сон уды». Иисусть лангса кармасть пеетькшнема.25Мзярда ломаттнень лихтезь, Сон сувась тоза, косоль кулофсь. Сявозе стирнять кядьта, и ся стясь.26Тянь колга кулясь срадсь сембе ся аймакова.
27Мзярда Иисус тусь тоста, мельганза мольсть кафта сокорхт и юватькшнесть: «Иисус, Давидонь Цёрац, ужяльдемасть минь*з!»28Мзярда Иисус сувась кудботмос, сокорхне маладсь Тейнза. Иисус кизефтезень синь: «Тинь кематада, Тейне тиеви тя?» Сят корхтайхть Тейнза: «Кематама, Азор!»29Эста Сон токазень сельмоснон и мярьгсь: «Катк ули тейнть кемамантень коряс», –30и сокорхне кармасть няема. Иисус кемоста мярьгсь: «Ваность, катк тянь колга кивок аф кармай содама».31Синь лиссть тоста и сембе сяка азондсть Иисусонь колга сембе ся аймакова.
32Ашесть кенере сят лисемс, кода Иисусти вятсть аф корхтай аля, конань колазе кяжи ваймопожфсь.33Мзярда эздонза паньфоль кяжи ваймопожфсь, аф корхтайсь корхтазевсь. И ломаттне дивандазевсть: «Израильса тяфтама нинге мзярдовок ашель».34А фарисейхне тянь каршес корхнесть: «Сон кяжи ваймопожфнень оцюняснон вийса панцесыне кяжи ваймопожфнень».
35Иисус якась сембе ошева и велева, тонафтсь тостонь синагогава, азондсь Пара куля Оцязорксшить колга, пчкафнезень ломаттнень эрь кодама урмада и сярятьфта.36Мзярда Иисус няезень пуромф ломаттнень, синь ужялькс арасть Тейнза, сяс мес ульсть пяк сизефт и сратфт, кода учат, конатнень аш ванысна.37Эста Сон корхтай Эсь тонафниензонды: «Нумада лама, а покайда кржа;38ина эняльдеда нумать Азоронцты, кучеза сёронь кочкайхть Эсь паксянц лангс».
*а 9:1 Ся ошсь ульсь Капернаум.
*б 9:6 Ломанень Цёра – тя Иисусонь лемоц, кона няфнесы: Сон Шкаень кучф Иди.
*в 9:10 Ся пинкнень синь ярхцсесть шра ваксса пялес велязь.
*г 9:13 Сёрматфкс – Писание, книги Библии
*д 9:13 кельгозь ужяльдема – милость
*е 9:22 Тя валсь греконь кяльста нинге ётафневи кода: идензе.
*ж 9:23 нюди – свирель
*з 9:27 Давидонь Цёра – лемнемок Иисусонь тя лемса, сокорхне лувозь Сонь Шкайть эзда кучф Идикс, кона пророкнень азондомаснон коряс лиси Давид оцязорть юромста.
Глава 9