Выбрать язык
Книги Ветхого Завета
Книги Нового Завета
с русским текстом1Ломаттне няемок, Моисей ламос аф мрдай панда пряста, кочкавсть Аарононди и мярьгсть тейнза: «Тик тейнек шкай, кона молель инголенк, сяс мес минь аф содасаськ, мезе лиссь ся алять, Моисеень, мархта, кона лихтемазь минь Египетонь масторста».2Аарон мярьгсь тейст: «Валхтость зрнянь пилькснень рьвянтень, цёрантень и стирентень пилестост, и кандость тейне».3Сембе ломаттне валхтозь зрнянь пилькснень эсь пилестост и кандозь Аарононди.4Сон сявозень кядьстост, валсь эздост бука и петезе лангонц оржа керомбяльса. Ломаттне мярьгсть: «Израиль, вага шкайце, кона лихтензе тонь Египетонь масторста!»5Тянь няемста Аарон путсь букать инголе алтарь и ювадсь: «Ванды ётафттама Азорти ила».6Омбоце шиня ломаттне сргозсть варьхмодемшовор и кандсть марнек плхтамань озксказнет и сетьмошинь озксказнет. И ломаньтналсь озась ярхцама и симома, а сяльде прянь аф кирдезь тиендсть визьксонь тефт.
7Азорсь мярьгсь Моисеенди: «Эряскотт валгомс алу, сяс мес гастявсь ломаньтналце, конань тон лихтить Египетонь масторста.8Пяк курок синь пувордасть кить лангста, конанди Мон ладяйне синь. Синь валсть эстейст зрняста бука и сюконясть инголенза, кандсть тейнза озксказнет и мярьгсть: "Израиль, вага шкайце, кона лихтензе тонь Египетонь масторста!"»9Азорсь тага мярьгсь Моисеенди: «Мон няйса тя ломаньтналть, и няйса – сон пяк каршек моли.10Тяни кадомак Монь, катк Монь кяжезе крьвязи лангозост, и Мон машфтсайне синь. Меле Мон тиян пяк оцю ломаньтнал тонь эздот».11Но Моисей ёразе ляпомфтемс Азорть, эсь Шкаенц, сон мярьгсь: «Азор, тяза крьвязе кяжце Эсь ломаньтналцень лангс, конань Тон лихтить Египетонь масторста Эсь оцю вийсот и кеме кядьсот.12Афольхть мярьге египтяттне: "Сон кальдявонь арьсезь лихтезень синь, мялец юмафтомс-арафтомс синь, шавомс панттнень лангса и нардамс синь мода лангста". Сявк эздост плхтай кяжцень и полафтк мяльцень – тяк машфне Эсь ломаньтналцень.13Лятфтайть Авраам, Исаак и Израиль покодихнень, конатненди Тон варать Эсь пряцень мархта, корхтамок: "Мон сяшкава ламолгофтсайне тинь юромонь поладыентень, нльне синь лувкссна ули менелень тяшттнень лаца, и сембе ся модать, конань колга Мон мярьгонь, Мон максса тинь юромонь поладыентенди, и синь кармайхть азорондама лангсонза пефтома пингс"».14Азорсь полафтозе мяленц, ашезе тие ся кальдявть, конань ёразе кучемс Эсь ломаньтналонц лангс.
15Моисей шарфтсь и кармась валгома панда пряста. Кядьсонза сон кирдсь сотксонь няфти кафта седяфт, конатнень лангса сёрматфоль кафцьке пяльде: ингольденге, фталдонга.16Кевонь седяфнень тиезень Шкайсь, сёрматфксненьге седяфнень лангса сёрмадозень Шкайсь.17Мзярда Иисус*а кулезе, кодама увф кеподсь юватькшни ломаньтналсь, сон мярьгсь Моисеенди: «Лоткама вастста кулеви тюремань вайгяль».18Но Моисей мярьгсь:
«Тя ювадихть аф сяськихне,
и афи сяськфне.
Мон кулян морама».
19Маладомок ломаньтналть лоткама вастонцты, Моисей няйсь бука и пяляз кштимат. Эста сон лаказевсь кяжса и ёрдазень кядьстонза кевонь седяфнень, и синь лазовсть пандала.20Моисей сявозе букать, конань синь тиезь, плхтазе толса, тапазе пулькс и почедозе ведть лангс. И тя ведьта симдезень Израилень ломаттнень.21Моисей мярьгсь Аарононди: «Мезе ня ломаттне тисть тейть, мезенкса тон сувафтыть синь тяшкава оцю пежес?»22Но Аарон мярьгсь: «Тяза крьвязе монь азорозень кяжец. Тон содасак тя ломаньтналть, сон пяк тёждяста сувай пежес.23Синь мярьгсть тейне: "Тик тейнек шкай, кона молель инголенк. Минь аф содасаськ, мезе лиссь Моисеень мархта, ся ломанть мархта, кона лихтемазь минь Египетонь масторста".24Мон мярьгонь тейст: "Кинь ули зрняц, валхтость лангстонт", и синь максозь тейне. Мон ёрдайне зрнять толти, и лиссь тя букась».25Моисей няезе: тя ломаньтналсь лиссь кедьстонза. Аарон макссь тейст воляши вятемс пряснон кода мяльсна, и сяс синь арасть пеедема вастокс душманцнон сельмоса.26Моисей арась лоткама вастть ортанзон ваксс и мярьгсь: «Кие Азорть инкса, ся саза тейне!» И кочкавсь вакссонза Левиень сембе юромоц.27Сон мярьгсь тейст: «Тяфта корхтай Азорсь, Израилень Шкайсь: "Тонгость перьфозонт эсь торонтень. Ётасть ломаньтналть лоткама вастонц фкя песта сявомок омбоцети, и меки. Катк эрсь шавсы эсь брадонц, эсь ялганц и эсь мала ломаненц"».28Левиень юромста ломаттне тисть Моисеень валонц коряс, и ся шиня ломаньтналста шавфоль колмошка тёжянь ломань.29Моисей мярьгсь: "Тячи максость прянтень Азорти покодеманди, эрсь цёранц и брадонц эряфснон питнеса, и Сон кучи тейнть бславама тячи".
30Омбоце шиня Моисей мярьгсь ломаньтналти: «Тинь тиеде оцю пеже. Но мон куцян Азорти, пади, монь лиси ляпомгофтомс пежентень сталмонц Азорть инголе».31Моисей мрдась Азорти и мярьгсь: «Вай, тя ломаньтналсь сувась оцю пежес: сон тись эстейнза зрнянь шкай.32Нолдак синь пежеснон, а кда аф нолдасак, эста моньге нардамак Эсь книгастот, коза сёрмадомайть».33Но Азорсь мярьгсь Моисеень каршес: «Мон нардаса книгастон сянь, кие тись пеже Монь инголен.34А тяни архт, и вятьк ломаньтналть тов, коза Мон мярьгонь тейть. Ватт, Монь ангелозе кармай молема инголет. Но мзярда сай пингсь, Мон пантфтса ня ломаттнень кядьста шумоснон тя пежеть инкса».35Азорсь кучсь пелькс урма ломаньтналть лангс сянкса, мес синь кошардозь Аарононь тиемс тейст зрнянь бука.
*а 32:17 Тяса корхтави Иисус Навинонь колга.
Глава 32