Выбрать язык
Книги Ветхого Завета
Книги Нового Завета
с русским текстом1Но Азорсь мярьгсь Моисеенди: «Тяни тон няйсак, мезе Мон тиян фараонть мархта. Монь вии кядезе кошардсы сонь нолдамс Израилень ломаттнень, и Монь вии кядезень кошардоманц вельде сон мянь паньцыне синь эсь масторстонза».2Шкайсь мярьгсь Моисеенди: «Мон Азорсь.3Мон эвондакшнень Авраамонди, Исааконди и Иаковонди кода Сембонь Кирди Шкай, но «Азор»*а лемозень ашине панжа тейст.4Мон ладяйне мархтост Эсь сотксозень и надияфтонь тейст максомс Ханаанонь модать, ся модать, коса синь эрясть ширде саф ломанькс.5И тяни Мон кулине Израилень ломаньтналть куфцеманц Египетонь урексшить ала; и Мон лятфтайне сотксозень.6Сяс азк Израилень ломаньтналти: "Мон Азорсь, и Мон лихттядязь тинь египтяттнень ашкснон алда, мянтьфттядязь синь урексшидост и идетядязь кепотьф кядезень и инь оцю суднень вельде.7Мон сяфтядязь тинь Эстейне ломаньтналкс и улян тейнть Шкайкс, и тинь содасасть: Мон Азорсь, тинь Шкаенте, кона лихтедязь тинь Египетонь урексшить ашконц алда.8Мон сувафттядязь тинь ся модав, конань Мон кепотьф кятть варань максомс Авраамонди, Исааконди и Иаковонди. Мон максса сонь тейнть уликс-парокс. Мон Азорсь"».
9Моисей азозень ня валхнень Израилень ломаттненди, но синь ашезь кулхцонда сонь, сяс мес синь ваймосна тапафоль пяк стака покодемаса.10Эста Азорсь мярьгсь Моисеенди:11«Мольхть и мярьк фараонти, Египетонь оцязорти, катк нолдасы Израилень ломаньтналть эсь масторстонза».12Моисей мярьгсь Азорть каршес: «Ватт, Израилень ломаньтналське аф кулхцонды эсон, кода эста фараонць кулхцондсамань? Мон корхтамонга мазыста аф маштан».13Но Азорсь кошардозень Моисеень и Аарононь молемс Израилень ломаньтналти и фараонти, Египетонь оцязорти, и лихтемс Израилень ломаньтналть Египетонь масторста.
14Вагот израильтяттнень юромснон ушедысна: Рувимонь, Израилень васень цёранц, ульсть цёранза Ханох, Фаллу, Хецрон и Харми. Тя Рувимонь тналонза.15Симеононь цёранза ульсть Иемуил, Иамин, Огад, Иахин, Цохар и Саул, ханаанеянь авать цёрац. Тя Симеононь тналонза.16Вага Левиень цёранзон лемсна, шачема юромснон коряс: Гирсон, Кааф и Мерари. Левий эрясь сяда колмогемонь сисем киза.17Гирсононь цёранза: Ливни и Шимеи, и синь тналсна.18Каафонь цёранза: Амрам, Ицгар, Хеврон и Узиил. Кааф эрясь сяда колмогемонь колма киза.19Мераринь цёранза: Махли и Муши. Тя Левиень тналонза эсь шачема юромснон коряс.20Амрам сявозе рьвакс эсь аканц, Иохаведань. Сон шачфтозень тейнза Аарононь и Моисеень. Амрам эрясь сяда колмогемонь сисем киза.21Ицгаронь цёранза: Корей, Нефег и Зихри.22Узиилонь цёранза: Мисаил, Елцафан и Сифри.23Аарон сявозе рьвакс Елисаветань, Аминадавонь стиренц и Наассононь сазоронц. Сон шачфтозень Аарононди Надавонь, Авиудонь, Елеазаронь и Ифамаронь.24Кореень цёранза: Асир, Елкана и Авиасаф. Тя Кореень тналонза.25Елеазар, Аарононь цёрац, сявсь эстейнза рьвя Футиилонь стирензон эзда, и сон шачфтозе тейнза Финеесонь. Нят левиеннетнень юромснон ушедысна эсь тналснон коряс.
26Аарон и Моисей – нят сят, конатненди Азорсь мярьгсь: «Лихтесть Израилень ломаньтналть Египетонь масторста юромснон коряс».27Тя синь, Аарон и Моисей, корхтасть фараонти, Египетонь оцязорти, Израилень ломаньтналть Египетста лихтеманц колга.
28И ся пингть, мзярда Азорсь корхтась Моисеенди Египетонь масторса,29Азорсь мярьгсь Моисеенди: «Мон Азорсь! Азк фараонти, Египетонь оцязорти, семботь, мезе Мон корхтан тейть».30Но Моисей мярьгсь Азорть каршес: «Мон аф маштан мазыста корхтама, кода фараонць кармай кулхцондомон?»
*а 6:3 Ванк Лисема (Исход) 3:14.
Глава 6