Выбрать язык
Книги Ветхого Завета
Книги Нового Завета
с русским текстом1Ушетксста*а Шкайсь тиезе менельть и масторть.2Масторсь шаволь и лангсонза мезське апак ладяколь; шобда ульсь потмаксфтома веттнень вельхксса, и Шкаень Ваймопожфсь лиендсь веттнень вельхкска.
3Шкайсь мярьгсь: «Улеза валда». И эвондась валдсь.4Шкайсь няезе: валдсь пара, и явфтозе валдть шобдать эзда.5Шкайсь лемдезе валдть шикс, а шобдать векс. И ульсь илядь, и ульсь шобдава – васенце шись.
6И Шкайсь мярьгсь: «Улеза менелень перяфкс*б веттнень ёткса, и катк сон явфнесы ведть эзда ведть».7Шкайсь тиезе менелень перяфксть и явфтозе ведть, кона менелень перяфксть ала, ся ведть эзда, кона менелень перяфксть вельхксса. И тиевсь тяфта.8Шкайсь лемдезе тя перяфксть менелькс. И ульсь илядь, и ульсь шобдава – омбоце шись.
9И Шкайсь мярьгсь: «Катк веттне, конат менельть алот, кочкавихть фкя вастс, и катк эвондай коське васта». И тиевсь тяфта.10Шкайсь лемдезе коське вастть модакс, а марс кочкаф веттнень оцюведькс*в. И Шкайсь няезе: тя пара.11Шкайсь мярьгсь: «Катк модась шачфты сянгярь: видьмонь пяярди тишет и иможень шуфтт, конат модать лангса кандыхть эсь коряваст видьме мархта имошт». И тиевсь тяфта.12Модась шачфтсь сянгярь: эрь кодама видьмонь пяярди тишет и шуфтт, конатнень иможсна эсь коряваст видьме мархтот. И Шкайсь няезе: тя пара.13И ульсь илядь, и ульсь шобдава – колмоце шись.
14Шкайсь мярьгсь: «Катк менелень перяфксса эвондайхть валдоптомат шить и веть явфнеманди, и катк синь няфнесазь илань пинкнень, шитнень и кизотнень молемаснон.15Катк синь валдоптыхть менелень перяфксста и валдопнесазь масторть». И тиевсь тяфта.16Шкайсь тись кафта оцю валдоптомат: сяда оцюсь вятезе шить, сяда ёмлась вятезе веть; и нинге Сон тись тяштть.17Сон путозень синь менелень перяфксти масторть лангс валдоптоманди,18вятемс шить и веть и явфнемс валдть шобдать эзда. И Шкайсь няезе: тя пара.19И ульсь илядь, и ульсь шобдава – нилеце шись.
20Шкайсь мярьгсь: «Эвондаза ведьса ламодонга лама ведень эряйда, эряй ваймода; и лийкстаст нармоттне масторть вельхксса менелень перяфксова».21И Шкайсь тись оцюведень пяк оцю жуватат и ведьге шашни-кзмолды эрь кодама эряйхть, эрть эсь юромонц коряс, и эрь кодама пацяв нармотть, эрть эсь юромонц коряс. И Шкайсь няезе: тя пара.22Шкайсь бславазень синь и мярьгсь: «Раштада и ламолгодода, пяшкодесть оцюведень веттнень, а нармоттне катк ламолгодыхть масторлангса».23И ульсь илядь, и ульсь шобдава – ветеце шись.
24Шкайсь мярьгсь: «Катк модась шачфты эрь кодама эряй ваймот: кудонь жуватат, куйхть-ёзмолдыхть и масторлангонь лия жуватат, эрь жуватать эсь юромонц коряс». И тиевсь тяфта.25Шкайсь тиезень эрь кодама масторлангонь жувататнень, эрь кодама кудонь жувататнень и сембе эрь кодама куйхнень-ёзмолдыхнень. И Шкайсь няезе: тя пара.
26Шкайсь мярьгсь: «Тихтяма ломань, кона ули Минь лацонк и конань эса Минь карматама няевома. Катк сон азорондай оцюведень калхнень, менелень нармоттнень, кудонь жувататнень, марнек масторть и сембе куйхнень-ёзмолдыхнень лангса, конат шашнихть модать ланга».27И Шкайсь тиезе ломанть Эсь лацонза, няфтемок ломаньца Эсь прянц; алякс и авакс тиезень синь.28Шкайсь бславазень синь и мярьгсь тейст: «Шачфнеда и ламолгодода, пяшкодесть масторлангть и сявость сонь эсь азорксшинтень алу. Азорондода оцюведень калхнень, менелень нармоттнень и сембе жувататнень лангса, конат шашнихть модать ланга».
29Шкайсь мярьгсь: «Вага, Мон максыне тейнть ярхцамбяленди масторлангонь сембе тишеть, кона пяярди видьмот, и сембе шуфттнень, конат кандыхть видьме мархта имошт.30А масторлангонь сембе жувататненди, менелень сембе нармоттненди и модава сембе шашнихненди, конатнень эса ули эряй вайме, ярхцамбяленди Мон максыне сембе сянгяря тишеть». И тиевсь тятфа.31И Шкайсь няезе: сембось, мезе Сон тись, ульсь пяк пара. И ульсь илядь, и ульсь шобдава – котоце шись.
*а 1:1 «Ушетксста» валсь няфти ся пингть лангс, мзярда Шкайсь ушедсь семботь тиемонза.
*б 1:6 менелень перяфкс – тяса: небосвод
*в 1:10 оцюведь – море
Глава 1