Выбрать язык
Книги Ветхого Завета
Книги Нового Завета
с русским текстом1 Господьын пророк шомакше. Тудо Хадрах мланде ден Дамаск нерген ойла, вет чыла еҥ да Израильын чыла тукымжо Господь ӱмбак ончат.2 Ты шомак Дамаск воктене улшо Емаф, мунло Тир ден Сидон нергенат ойла.
3 Тир шкаланже карманым ыштен,
пурак наре шийым поген,
уремысе лавыра наре – шӧртньым.
4 Но Господь тудым йорлым ышта,
вий-куатшым теҥызыште шалата,
а олам тул йӱлалта.
5 Тидым ужын, Аскалон чот ӧртка,
Газа лӱдмыж дене чытыраш тӱҥалеш,
Екронат инанымыжлан намысыш пура.
Газан кугыжажым пуштыт,
Аскалонышто илыше-влак огыт код.
6 «Азотышто ситмыж*а тукым илаш тӱҥалеш,
филистим-влакын кугешнымашыштым Мый пытарем.
7 Умшашт гыч вӱран шылым кораҥдем,
пӱй коклашт гыч йырнык кочкышым луктам.
Утаралт кодшо филистим-влак Мыйын лийыт,
Иудан ик тукымжо семын нуно лийыт,
а Екрон лиеш иевусей-влак*б гай.
8 Мый Шке оролаш тӱҥалам элемым:
ӧрдыжъеҥ-шамычым ом пурто,
шыгыремдылше-влак тетла огыт тол,
вет Мый шинчам ӱмбачышт ом кораҥде».
9 Йывырте, Сион ӱдыр!
Куанен кычкыре, Иерусалим ӱдыр!
Теве тый декет Кугыжат толеш,
Тудо – чыным ыштыше, утарыше,*в
Тудо – ӱҥышӧ, шинча осёл ӱмбалне,
вӱльӧ осёлын шочшыж ӱмбалне.
10 «Тунам Мый Ефремын сарлык орваже-влакым,
Иерусалимын имньыже-шамычым пытарем,
сарлык йоҥеж-влак пудыртымо лийыт».
Тудо калык-влаклан тынысым увертара,
теҥыз деч теҥыз марте озаланаш тӱҥалеш,
эҥер*г деч мланде тӱр марте оза лиеш.
11 «А пленыште улшо еҥет-влакым, Сион,
тый денет ыштыме да вӱр дене пеҥгыдемдыме ойпидышемлан кӧра
Мый кукшо кугу вынем гыч луктам.
12 Пленыште улшо-влак,
те, кӧмытын эше ӱшанышт уло,
шке карманышкыда пӧртылза!
Таче увертарем: тылат, Сион, кок пачаш пӧртылтем.
13 Йоҥеж семын Мый чымалтарем Иудам,
пикш семын Ефремым пыштем.
Тыйын эргыч-влакым, Сион,
Ионий эрге-влак*д ваштареш кынелтем,
тыйым тале сарзын кердышкыже савырем».
14 Тунам нунын ӱмбалне Господь конча,
Тудын пикшыже волгенче семын чоҥешта.
Господь Юмо шке пучшым пуалта,
кечывалвел тӱтан коклаште толеш.
15 Господь Саваоф нуным арален налеш,
да нуно шӱштӱштӧ дене кышкыме кӱ-влакым шалатат да тошкат.
Нуно йӱыт да йошкар арака деч руштшыла лӱшкаш тӱҥалыт,
надыр корка-влак семын, жертвенникын ныл лукшо семын темыт.
16 Тудо кечын Господь Юмышт нуным утара,
вет нуно Тудын кӱтӱжын шорыкшо улыт.
Вуйшӱдышысӧ шергакан кӱ семын нуно
Тудын мландыштыже йолгаш тӱҥалыт.
17 Могай мотор, могай сай нуно лийыт!
Кинде рвезе-влаклан вийым пуа,
йошкар арака деч ӱдыр-влак пеледыт!
*а 9:6 Ситмыж – внебрачный.
*б 9:7 Иевусей-влак – Израиль эрге-влакын толмышт деч ончыч Иерусалимыште илыше калык.
*в 9:9 «Утарыше»: тидым «сеҥымашым кондышо» манынат кусараш лиеш.
*г 9:10 Эҥер – тыште Евфрат нерген ойлалтеш.
*д 9:13 Ионий эрге-влак – грек-влак.
Глава 9