Выбрать язык
Книги Ветхого Завета
Книги Нового Завета
с русским текстом1 Господь Саваоф деч тыгай шомак лийын:
2 «Господь Саваоф тыге ойла:
Сионлан кӧра чонем моткоч йӱла,
тудлан верч Мыйын шыдем ылыжын!
3 Тыге Господь ойла:
Мый Сионыш пӧртылам
да Иерусалимыште илаш тӱҥалам.
Лӱмдаш тӱҥалыт Иерусалимым ”Ӱшанле ола”,
Господь Саваофын курыкшым – ”Святой курык”.
4 Тыге ойла Господь Саваоф:
пондылан эҥертен коштшо,
чот кугу ийготан пӧръеҥ ден ӱдырамаш-влак
угыч Иерусалимын уремлаштыже шинчаш тӱҥалыт.
5 Оласе урем-влак эрге-ӱдыр-шамыч дене темыт,
тушто нуно модаш тӱҥалыт.
6 Тыге ойла Господь Саваоф:
тудо кечылаште утаралт кодшо калыкын шинчаштыже
тиде лийын кертдымыла чучеш гынат,
Мылам тиде ыштен кертдыме мо? –
ойла Господь Саваоф.
7 Тыге ойла Господь Саваоф:
Эрвел мланде гыч да касвел мланде гыч
Мый шке калыкем утарем.
8 Мый нуным кондем,
нуно Иерусалимыште илаш тӱҥалыт.
Нуно Мыйын калыкем лийыт,
а Мый – нунын Юмышт,
чылажат чын да ӱшанлын ышталташ тӱҥалеш.
9 Тыге ойла Господь Саваоф:
те, пророк-шамычын шомакыштым кызыт колшо-влак,
вуйдам ида саке!
Кунам Господь Саваофын пӧртшылан негызым пыштеныт,
храмым угыч нӧлтеныт,
1 тунам нине пророк-влак тушто лийыныт.
10 Вет тидын деч ончыч айдеме паша деч нимогай лектыш лийын огыл,
вольыкын пашам ыштымыж дечат лектыш лийын огыл.
Толшо-кайыше еҥлан тушман тыныслын илаш пуэн огыл,
еҥ-влакым Мый икте-весышт ваштареш савыренам.
11 Но калыкын утаралт кодшыжо-влак дене
кызыт Мый ончычсо семын ом ыште, –
ойла Господь Саваоф. –
12 Те тыныс жапыште ӱдаш тӱҥалыда,
виноград вондо саскам конда,
мланде лектышым пуа,
тыгак кава шке лупсыжым вела –
чыла тидым Мый утаралт кодшо-влаклан пуэм.
13 Тендам, Иуда тукым ден Израиль тукым,
калык-влак каргымылан шотленыт,
но Мый тендам утарем,
да тендам суапландарыме калыклан шотлаш тӱҥалыт.
Ида лӱд, вуйдам ида саке!
14 Тыге ойла Господь Саваоф: кунам ача-кочада-влак шыдем луктыныт, Мый шке калыкем мут кучыкташ шонен пыштенам да пунчалем вашталтен омыл, – ойла Господь Саваоф, –15 но кызыт Мый Иерусалимлан да Иуда тукымлан угыч сайым ышташ шонен пыштенам. Ида лӱд!
16 Теве мом те ыштышаш улыда:
икте-весылан чыным ойлыза,
тынысым кондышо чын судым ола капка воктене ыштыза.
17 Нигӧ шке лишылъеҥжылан шӱмыштыжӧ осалым ынже шоно,
шояклен товатлымым ынже йӧрате.
Чыла тидым Мыйын ужмем ок шу», – ойла Господь.
18 Мылам Господь Саваофын шомакше лийын:19 Господь Саваоф тыге ойла: «Нылымше, визымше, шымше да луымшо тылзын кучымо пӱтӧ-влак Иуда тукымлан пайремыш, куан ден веселитлыме кечыш савырнат. Лач чын ден тынысым йӧратыза.20 Господь Саваоф тыге ойла: калык-влак толыт, шуко ола гыч еҥ-шамыч погынат.21 Ик олаште илыше-влак вес олашке каят да каласат: ”Каена, Господьым мемнан дек поро лияш йодына, Господь Саваофын чурийжым кычалына!” Тунам кажныже каласа: ”Мыят мием!”22 Шуко тукым ден виян калык Господь Саваофын чурийжым кычалаш да Тудо поро лийже манын йодаш Иерусалимыш толыт.23 Господь Саваоф тыге ойла: тудо кечылаште тыге лиеш – тӱрлӧ калык гыч улшо да тӱрлӧ йылме дене кутырышо лу еҥ Иуда тукым еҥын вургем урвалтыжым пӱтырен куча да каласа: ”Ме тый денет пырля каена, вет ме колынна: Юмо тендан дене пырля”».
Глава 8