Выбрать язык
Книги Ветхого Завета
Книги Нового Завета
с русским текстом1 Шымше тылзын коло икымше кечынже пророк Аггей гоч Господьын шомакше лийын:2 «Зоровавельлан, Салафиил эргылан, Иудан кундемтӧражлан, тыгак Иисуслан, Иоседек эргылан, кугу иерейлан, да утаралт кодшо еҥ-влаклан каласе:3 ”Тендан коклаште тиде пӧртын ончычсо чапшым ужшо иктаж еҥ кодын мо? Те кызыт тудым могайым ужыда? Тудо тыланда уке дене иктак ок кой мо?4 Но кызыт чолга лий, Зоровавель, – ойла Господь, – чолга лий, Иисус, Иоседек эрге, кугу иерей! Тиде элын уло калыкше, чолга лийза, – ойла Господь, – да тиде пашам кыртмен ыштыза, вет Мый пеленда улам, – ойла Господь Саваоф. –5 Египет гыч лекмыда годым Мый тыланда сӧренам: Мыйын Шӱлышем тендан дене пырля. Ида лӱд!”
6 Господь Саваоф тыге ойла:
Мый кава ден мландым, теҥыз ден кукшо верым
эше ик гана чытырыктем –
тиде вашке лиеш.
7 Мый чыла калыкым чытырыктен налам,
да нунын поянлыкышт тышке йоген толеш,
тиде пӧртым Мый сӧрал арвер дене темем, –
ойла Господь Саваоф. –
8 Чыла ший Мыйын да чыла шӧртньӧ Мыйын, –
ойла Господь Саваоф. –
9 Тиде уэмдыме храмын чапше ончычсын деч кугурак лиеш, –
ойла Господь Саваоф. –
Тиде верыште Мый тыланда тыныслыкым пуэм, –
ойла Господь Саваоф».
10 Дарийын кокымшо ий кугыжаланымыж годым индешымше тылзын коло нылымше кечынже Аггей пророк гоч Господьын шомакше лийын:11 «Господь Саваоф тыге ойла: йод иерей-влак деч, мом тидын шотышто закон ойла:12 иктаж-кӧ святитлыме шылым урвалтышкыже пыштен нумал наҥгая да урвалтыж дене кинде, шӱр, йошкар арака, олив ӱй але иктаж вес кочкыш деке тӱкна гын, тудыжо святой лиеш мо?» Иерей-влак вашештеныт: «Уке».13 Аггей йодын: «А тиде кочкыш деке колышо дек тӱкнен амыргыше еҥ тӱкна гын, тиде кочкыш ару огыл лиеш мо?» Иерей-влак вашештеныт: «Туге, ару огыл лиеш».14 Тунам Аггей каласен: «Мыйын ончылнем тиде калык, тиде тукым тыгаяк улыт, – ойла Господь. – Мом нуно ыштат, мом надырлан кондат – чылажат ару огыл».
15 «Ончыч кузе илымыда нерген шоналтыза,
кунам Господьын храмыштыже
кӱ ӱмбаке кӱм эше пыштен огыдал.
16 Кунам те коло мешак лийшаш шурно кышыл деке толында,
туштыжо лу мешак веле лийын.
Кунам виноград вӱдым погымо вер деке
витле ате йошкар аракам кошталаш толында,
туштыжо коло ате веле лийын.
17 Мый шуко гана тендан паша лектышдам
шемуржа, когартыше мардеж, шолем дене пытаренам,
но те садак Мый декем савырнен огыдал, – ойла Господь. –
18 Тачысе кече гыч тӱҥалын, варажым мо лиеш, ончыза –
индешымше тылзын коло нылымше кечыж гыч,
тудо кече гыч,
кунам Господьын храмжын негызшым олмыкташ пижында.
Сайын шоналтыза тидын нерген:
19 клатлаште кызыт урлыкаш уло мо,
виноград ден смоква пушеҥге,
гранат ден олив пушеҥге саскам пуат мо?
Но таче кече гыч Мый тендам суапландарем».
20 Тиде тылзын коло нылымше кечынже Аггейлан кокымшо гана Господьын шомакше лийын:
21 «Зоровавельлан, Иудан кундемтӧражлан, каласе:
Мый кава ден мландым чытырыктем,
22 кугыжаныш-влакын престолыштым сӱмырем,
йот калык кугыжаныш-влакын вийыштым пытарем,
сарлык орва ден тушто шинчыше-шамычым кумыктен шуэм.
Имнешке-влак имньышт дене
икте-весыштын кердышт деч йӧрлын пытат.
23 Тудо кечын, – ойла Господь Саваоф, –
Мый тыйым, Зоровавель тарземым, Салафиил эргым,
Шкаланем налам, – ойла Господь, –
тый Мылам печатян шергаш гай лият,
вет Мый тыйым ойырен налынам, –
ойла Господь Саваоф».
Глава 2