Библия
Выбрать язык
Книги Ветхого Завета
Книги Нового Завета
с русским текстом
ПРОРОК НАУМЫН КНИГАЖЕ
3 Глава
1 Ойго Ниневийлан! 8 Ниневийым воштылмо муро.1 Вӱрым йоктарыше олалан ойго!
Темын тудо ондалчык да поген налме поянлык дене,
уке тушто агымашлан мучаш.
2 Солам лупшымо да орава колдыртатыме йӱк шокта,
имне-влак рокмат, орва-влак кылдыртен каят.
3 Тӧрга имнян сарзывий,
керде йылгыжеш, умдо йолга!
Шукын пытат, колышо кап-влак ора дене кият –
ок лий нуным шотлен пытараш,
кайышыштла нине капыш шӱртнят.
4 Тиде яжар ола шуко курваланен,
*а тудо мотор сынан, юзыланаш мастар,
яжарланымыж дене калык-влакым ужален,
юзыланымыж дене – тукым-шамычым.
5 «Сандене Мый тыйын ӱмбакет толам, –
ойла Господь Саваоф. –
Вургем урвалтетым чурий декет нӧлталам
да калык-шамычлан чара улметым ончыктем,
кугыжаныш-влаклан намысле веретым почам.
6 Ӱмбакет тӱрлӧ йырныкым кышкен пытарем,
тыйым мыскылтышым ыштем
да еҥ шинча ончыко луктын шогалтем.
7 Тыйым ужын, кажныже тый дечет куржеш
да каласа: ”Ниневийым шалатыме!
Кӧ тудын верч шорташ тӱҥалеш?”
Кушто тылат лыпландарыше-влакым муам?»
8 Но-Амон
*б деч тый сайрак улат мо?
Тиде ола эҥер-влак коклаште шога,
чыла могырым тудым вӱд авырен.
Теҥыз тудын аралтышыже,
вӱд тудын пырдыжше лийыныт.
9 Эфиопий ден Египет тудын кугу вийже лийыныт,
Фут ден Ливий тудлан полшеныт.
10 Но тиде олат пленыш логалын,
тушто илыше-шамычым вес верыш наҥгаеныт.
Изи йочаже-влакым уремлаште руэн пуштыныт,
лӱмлӧ еҥже-шамыч шотышто шеревам кышкеныт,
тӧраже-влакым шинчырленыт.
11 Тый денетат тыгак лиеш – ушым йомдарымеш руштат,
тушман деч аралтышым кычал кает.
12 Карманет-влак смоква пушеҥгын кӱшӧ саскаж гай улыт:
рӱзалташ гын, кочкаш шонышын умшашкыже вигак камвозыт.
13 Ончал, сарзет-влак ӱдырамаш гай улыт:
тушман ончылно элысе капкат-влак комдык почылтыт,
тӱкылтыш-шамычым тул пӧжга.
14 Вӱдым шапашле, олам авырен налмылан ямдылалт,
карман-влакетым чоткыдемде!
Кай шунан верыш, тушто шуным тошко,
кермычлан калыпым ямдыле.
15 Шукш ден шурнышырчык семын тӱлаҥат гынат,
тушто тыйым тул пӧжга, керде руа,
шукш семын тыйым пытарат.
16 Сатучет-влак кавасе шӱдыр деч шукырак улыт,
но нунат шулдыраҥше шурнышырчык семын чоҥештен каят.
17 Тӧра ден возкалышет-влак шурнышырчык тӱшка гай улыт:
йӱштӧ годым нуно кӱ савар шелшыш шылыт,
кунам кече лектеш – чоҥештен пытат,
а кушко – ок пале нигӧат.
18 Ассирий кугыжа! Вуйлатышет-влак мален колтеныт,
тӧрат-влак курымаш омо дене малат.
Калыкет курыклашке шаланен пытен,
нигӧлан нуным погаш.
19 Сусыретым паремдаш ок лий,
эмганыметше ок тӧрлане.
Чыланат, тый денет мо лиймым палымеке,
тӱҥалыт совыштым кыраш.
Мучашдыме осаллыкетым кӧлан гына чыташ логалын огыл?
*а 3:4 Курваланаш – развратничать.
*б 3:8 Тиде олам Фива манынат лӱмдат, тудо акрет годсо Египетыште Мемфис деч вара кокымшо кугу ола лийын.
Глава 3
