Библия
Выбрать язык
Книги Ветхого Завета
Книги Нового Завета
с русским текстом
ПРОРОК МИХЕЙЫН КНИГАЖЕ
5 Глава
1 Израильлан сӧрымӧ Вуйлатыше Вифлеем гыч лиеш. 5 Израиль калык тӱзлана. Шояк юмылан кумалмылан мучаш толеш.1 А кызыт, сарлан ямдылалтше ола,
сарзывиетым пого!
Мемнам йырым-йыр авыреныт,
Израильын судьяжым шӱргыж гыч
тоя дене кыраш тӱҥалыт.
2 «А тый, Вифлеем-Ефрафа,
Иуда мландысе ола-влак коклаште кеч изи улат,
Мыйын шонымем шукташ манын,
тый дечет Тудо лектеш,
Кӧ Израильын Вуйлатышыже лиеш.
Тудын тӱҥалтышыже – акрет жап гычак,
ожнысо кечыла гычак».
3 Сандене Господь,
азам ыштышаш ӱдырамашын ыштымешкыже,
Израиль эрге-влакым икмыняр жаплан коден кая.
Тунам нунын деке моло иза-шольышт пӧртылыт.
4 Тудо кынел шогалеш да Господьын куатше дене,
шке Господь Юмыжын кӱдыратле лӱмжӧ дене кӱташ тӱҥалеш.
Илаш тӱҥалыт нуно лӱдыкшӧ деч посна,
вет Тудын лӱмжӧ мланде тӱр марте шарла.
5 Тудо чылаштлан тыныслыкым конда.
Кунам мландышкына Ассирий толеш
да карман-влакнам шалаташ тӱҥалеш,
ме тудын ваштареш шым сарзывуйым,
кандаш оным шогалтена.
6 Нуно Ассирийым керде дене кӱташ,
Нимрод мландын капкаж воктене шогаш тӱҥалыт.
Кунам элышкына Ассирий толеш
да мландынам тошкаш тӱҥалеш,
тудын деч мемнам ты Вуйлатыше утара.
7 Иаковын утлен кодшыжо-влак
шуко калык коклаште Господьын лупсыж гай,
шудо ӱмбак йогышо кугу йӱр гай лийыт.
Нуно айдемын кучемвийже деч эрыкан улыт,
айдемын эргыж-влаклан огыт инане.
8 Иаковын утаралт кодшыжо-влак
шуко калык ден тукым коклаште
лийыт чодырасе янлык коклаште улшо лев гай,
шорык кӱтӱ кокласе самырык лев гай:
кунам тудо нунын дек толын лектеш,
тошкен пытара, кӱрыштеш –
нигӧ тудын деч ок утаре.
9 Кидетым тушман-влак ваштареш нӧлталат,
лийыт нуно чыланат пытарыме!
10 «Тудо кечын, – ойла Господь, –
чыла имнетым пытарем, сарлык орват-влакым шалатем,
11 мландыштет ола-влакым пытарем,
чыла карманетым сӱмырем.
12 Юзо пашатлан Мый мучашым пыштем,
мужедше-влакет тетла огыт лий.
13 Полган юмет ден онакӱэт-влакым пытарем,
мом шке кидет дене ыштенат –
нунылан тый тетла кумалаш от тӱҥал.
14 Ашера меҥгет-влакым Мый луктын кудалтем,
ола-шамычетым пӱтынек шалатем.
15 Мутем колыштдымо калык-влаклан
кугу шыдем дене ӱчым шуктем».
Глава 5
