Библия
Выбрать язык
Книги Ветхого Завета
Книги Нового Завета
с русским текстом
ПРОРОК МИХЕЙЫН КНИГАЖЕ
4 Глава
1 Ончыкшым мландымбалне сар огеш лий. 6 Израиль калык плен гыч пӧртылеш.1 Пытартыш кечылаште тыге лиеш:
курык, кушто Господьын пӧртшӧ шинча,
чыла курык ден кӱкшака деч кӱшнӧ шогаш тӱҥалеш,
да тудын дек калык-влак вӱд гай йоген толыт.
2 Шуко калык тушко мия да каласа:
«Толза, Господьын курыкышкыжо
да Иаковын Юмыжын пӧртышкыжӧ кӱзена.
Тудо мемнам шке корныжлан туныкта,
да ме Тудын йолгорныж дене кошташ тӱҥалына,
вет Сион гычын закон лектеш,
Иерусалим гыч – Господьын шомакше».
3 Тудо шуко калыклан судым ышта,
тора эллаште виян тукым-влакым мут кучаш шогалта.
Шке кердышт гыч нуно шогавуйым,
умдышт гыч сорлам таптен ыштат.
Ик калык вес калык ӱмбаке керде дене ок кае,
кредалаш тетла огыт тунем.
4 Кажныже виноград ден смоква пушеҥгыже йымалне
шинчаш тӱҥалеш,
нигӧ нуным ок лӱдыктӧ,
вет Господь Саваоф тыге каласен.
5 Кажне калык шке юмыжын лӱмжым ӱжын ила,
а ме Господь Юмынан лӱмжылан курымеш инанен илена.
6 «Тудо кечын, – ойла Господь, –
окшак-влакым, поктен колтымо-влакым погем,
кӧмытлан ойгым колтенам, чылаштым чумырем.
7 Окшак-влак гыч утаралт кодшо калыкым ыштем,
шалатен колтымо-влак гыч – виян калыкым.
Господь нуным Сион курыкышто
тиде жап гыч курым-курымеш вуйлаташ тӱҥалеш».
8 А тый, кӱтӱ-влак кокласе башне,
Сион ӱдырын кӱкшакаже!
Ончычсо кучемвиетым мӧҥгеш налат,
кугыжа кучемвий угыч Иерусалим ӱдырын лиеш.
9 А молан тый кызыт кугу йӱкын магырет?
Тыйын кугыжат уке мо?
Але каҥашым пуышет уке?
Азам ыштыше ӱдырамашын гай орлык тыйым авалтен.
10 Азам ыштыше ӱдырамаш семын
корштымо деч кечкыж да кугыргыл, Сион ӱдыр,
вет кызыт тылат олам кодаш логалеш,
чара пасушто тый илаш тӱҥалат.
Миен шуат Вавилон марте –
тушто тый утарыме лият,
тушто тыйым Господь
тушман-влакетын кидышт гыч сулен налеш.
11 А кызыт тыйын ваштареш шуко калык погынен.
Ойлат нуно: «Тек тудо шакшылыме лиеш,
тек шинчана Сионын пытымыжым ужеш!»
12 Но нуно Господьын шонымыжым огыт пале,
Тудын мом шонен пыштымыжым огыт умыло,
вет Тудо нуным идымыш кылтам погымо семын поген.
13 «Кынел да шияш тӱҥал, Сион ӱдыр!
Мый тыйын тӱкетым кӱртньым, йолгӱчетым тойым ыштем,
да тый шуко калыкым тошкен шалатет».
Нунын руалтен налме погыштым Господьлан,
поянлыкыштым пӱтынь мландын Озажлан
надыр шотеш пӧлеклен, тӱрыснек пытарет.
Глава 4
