Выбрать язык
Книги Ветхого Завета
Книги Нового Завета
с русским текстом1 Теве Господьын шомакше, тудо Морасфа гыч Михейлан лийын. Тиде Иуда кугыжа-влак Иофамын, Ахазын да Езекийын вуйлатымышт годым лийын. Теве мом тудлан Самарий ден Иерусалим шотышто ончыктымо улмаш.
2 Колыштса, калык-влак,
мланде да мо тушто уло, тӱткын колыштса!
Тек Господь Юмо тендан ваштареш таныклыше лиеш,
тек Господь шке святой храмже гыч ойла!
3 Теве Господь шке верже гыч лектеш,
мландын кӱкшӧ верлаж дене ошкылын, Тудо вола.
4 Кузе тул дечын шыште лева,
кузе тайыл дене вӱд йога,
туге Тудын йымалныже курык-влак леват,
лапвер-влак шелалтыт.
5 Чыла тиде Иаковын осал пашажлан кӧра,
Израиль тукымын сулыкшылан кӧра лийын.
Кӧ дечын Иаков тидлан тунемын?
Самарий деч огыл мо?
Иуда мландыште кумалме кӱкшакам ыштымылан кӧ титакан?
Иерусалим огыл мо?
6 «Садлан Мый Самарий деч кӱ орам гына кодем,
тиде вер виноград аҥалан веле йӧра.
Кӱжӧ-влакым лапверыш кудалтем,
тудым негыз марте шалатем.
7 Чыла шояк юмыжо шалатыме,
яжарланен налме пӧлекше-влак йӱлалтыме лийыт.
Чыла полган юмыжым Мый пытарем,
вет тудо нуным нине пӧлек гыч ыштен,
да нуно угыч яжар-влаклан тӱлымӧ пӧлек лийыт».
8 Тидлан верч мый шорташ да ойгыраш,
чарайола да чараматын кошташ тӱҥалам.
Тулпире семын урмыжаш,
страус семын магыраш тӱҥалам,
9 вет Самарийын сусыржо паремдаш лийдыме,
тудо Иуда мланде марте,
эсогыл калыкемын капкаж деке,
Иерусалим марте шуын.
10 Ида каласкале тидын нерген Гефыште,
тушто йӱкын ида шорт.
Бет-Офраште ӱмбакыда ломыжым шавыза!
11 Шафирыште илыше-влак,
чара да мыскылалтше кайыза!
Цааныште илыше-влак ола гыч лектын огыт керт!
Бет-Ецель шортеш, тудын деч полыш ок лий.
12 Марофышто*а илыше-влак cайым тургыжланен вучат,
но Господь Иерусалимын капкаж деке ойгым колтен.
13 Лахисыште илыше-шамыч,
имне-влакым орвашке кычкыза,
вет тендам ончен, Израиль сулыкыш пурен,
Сион ӱдырын осал пашаже-влак тендан деч тӱҥалыныт.
14 Сандене те кузык шотеш пӧлек-влакым
Морешеф-Гефыш колтеда,
но Ахзив ола Израиль кугыжа-влаклан ондалчык лиеш.
15 Тендан дек, Марешаште илыше-шамыч,
Мый адакат у озам кондем.*б
Израильын чапше, тудын онжо-влак, Одолламыш каят.
16 Йӧратыме эргыда-влак верчын ойгырен,
ӱпдам нӱжын кудалтыза,
чаравуян кайык гай лийза,
вет йочада-влакым тендан деч пленыш наҥгаят.
*а 1:12 Мароф лӱм ’кочылык’ манмым ончыкта.
*б 1:15 «Мареша» лӱм еврей йылмысе ’оза’ шомак дене ик семынрак йоҥга.
Глава 1