Выбрать язык
Книги Ветхого Завета
Книги Нового Завета
с русским текстом1 Тиде Ионалан келшен огыл, да тудо сырен кудалтен.2 Тудо Господьлан кумалын, тыге ойлен: «О Господь! Тидымак огыл мо мый эше шке мландыштем улмем годым ойленам ыле? Садланак мый Фарсисыш куржынам. Мый паленам: Тый поро, чаманыше, шуко чытыше, серлагыше Юмо улат. Тый азапым ышташ шоныметымат вашталташ ямде улат.3 А кызыт, Господь, нал чонем – мыланем лучо колаш».4 Господь тудын деч йодын: «Шыдешкымет дене чын ыштет мо?»
5 Иона ола гыч лектын да тудын деч эрвелкыла шинчын. Тудо шкаланже омашым ыштен, ӱмылышкыжӧ пурен шинчын да ола дене мо лиймым эскераш тӱҥалын.6 А Господь, Ионан вуйжо ӱмбалне ӱмыл лийже да шыдыже лушкыжо манын, кушкылым*а шочыктен. Тиде кушкыл Ионан шинчыме верже ӱмбалне нӧлталт шогалын. Иона тудлан пеш чот куанен.7 Но Юмо туге ыштен: вес кечынже ӱжара нӧлтмӧ жапыште кушкылым шукш нултен, да тудыжо кошкен.8 А кече лекмеке, Юмо эрвел гыч пуышо шокшо мардежым колтен. Кече Ионан вуйжым пелташ тӱҥалын. Иона пеш чот улнен, колаш шонен, тыге каласен: «Мыланем лучо колаш».
9 Юмо Иона деч йодын: «Кумылет тиде кушкыллан кӧра волен мо?» Иона вашештен: «Пеш чот волен, эсогыл илымем ок шу».10 А Господь тудлан каласен: «Тый ик йӱдыштӧ кушкын шогалше да ик йӱдыштак кошкен кайыше кушкылым чаманет, кеч тудым онченат, куштенат отыл.11 А кугу Ниневий олам Мылам чаманыман огыл ыле мо? Вет тушто шола ден пурла кидым ойыркален моштыдымо шӱдӧ коло тӱжем утла еҥ ила, тыгак пеш шуко вольык уло».
*а 4:6 «Кушкылым» – тыште, очыни, кузивондо (клещевина) нерген ойлалтеш. Тудо пеш вашке кушкеш, кӱкшытшӧ ныл метрышкат шуэш.
Глава 4