Выбрать язык
Книги Ветхого Завета
Книги Нового Завета
с русским текстом1 Авдийлан ончыктымо кончымаш.
Едом шотышто Господь Юмо теве мом ойла.
Господь деч ме уверым колынна,
калык-влак дек уверзым колтымо:
«Кынелза, Едом ваштареш сар дене лектына!
2 Мый тыйым калык-влак коклаште изим ыштем,
еҥ-шамыч тыйым шотлымым чарнат.
3 Кугешныше шӱмет тыйым ондален.
Кӱан кӱкшӧ верыште, курык шелшыште,
тый нигӧ деч лӱдде илет да шке семынет шонет:
”Кӧ мыйым мландымбаке сӱмырен кертеш?”
4 Кеч арыслангайык семын тый кӱшкӧ кӱзет
да пыжашетым шӱдыр-влак коклаште ыштет,
тушечат Мый тыйым сӱмырал кудалтем, – ойла Господь. –
5 Тый декет вор-влак але йӱдым аген коштшо-влак толыт гын,
тыйым нуно чот аген кодат ыле!
Но нуно шкаланышт мо кӱлешым гына шолыштыт ыле.
Тый декет виноградым погышо-влак толыт гын,
икмыняр саскам огыт кодо ыле мо?
6 Но Исав деч чыла поген налме,
чыла шылтымым кычал мумо!
7 Тый денет ик ушемыште лийше-влак
тыйым чек деке шумеш поктен колтат.
Тый денет тыныслын илыше-шамыч тыйым ондалат да сеҥат,
тый денет пырля кочшо-влак тылат оптышым шындат.
Но Едом шонен ок мошто!
8 Тудо кечын, – ойла Господь, –
Мый Едомышто мунло-влакым,
Исавын курыкыштыжо шонен моштышо-влакым пытарем.
9 Тале сарзет-шамыч, Феман, лӱдын шогалыт,
Исавын курыкыштыжо илыше-влак
чылан шӱшкыл пуштмо лийыт.
10 Шольычым, Иаков тукымым, шыгыремдыметлан
тыйым намыс леведеш,
пытарыме лият тый курымешлан.
11 Тудо кечын, кунам йот калык-влак
Иаковын поянлыкшым наҥгаеныт,
кунам йот тукым-влак капкашкыже пуреныт
да Иерусалим шотышто шеревам кышкеныт,
тый чыла тидым ончен шогенат,
нунын кокла гыч иктыж гай лийынат!
12 Огеш кӱл ыле тылат шольычын ойган кечыжлан куанаш,
Иуда эрге-влакым пытымышт кечын воштылаш,
орлыкан кечышт годым нуным мыскылен ойлаш.
13 Огеш кӱл ыле калыкемын ойган кечынже
тудын капкашкыже пураш,
огеш кӱл ыле туткар кечынже тудын пытымыжым ончаш,
азап толмо кечын тудын погыжым тӱкаш.
14 Огеш кӱл ыле тылат корнывожышто шогаш
да куржшо-влакым пуштедаш,
огеш кӱл ыле орлык толмо кечын
утаралт кодшо-влакым тушман кидыш пуаш.
15 Господьын суд кечыже чыла калык ӱмбак толеш!
Мом тый ыштенат, тый денетат тыгакак ыштыме лиеш,
чыла пашат шке ӱмбакет пӧртылеш.
16 Мом те Мыйын святой курыкыштем йӱында,
тудымак чыла калыклан йӱаш логалеш:
нуно йӱыт, йӱын темыт да ӱмыл гай йомыт,
пуйто лийынат огытыл.
17 А Сион курыкышто утарымаш лиеш,
тудо святой верлан шотлалташ тӱҥалеш,
Иаков тукым шке мландыжым угыч налеш.
18 Иаков тукым тул лиеш,
Иосиф тукым – тулйолкын,
а Исав тукым олым лиеш.
Нуно тудым ылыжтат да йӱлалтат,
Исав тукым гыч нигӧ ок код», –
тыге Господь каласен.
19 Кечывалвел мландыште илыше-влак
Исавын курыкшым руалтен налыт,
тӧрверыште илыше-шамыч – филистим-влакын мландыштым.
Нуно Ефрем ден Самарий кундемлам сеҥен налыт,
а Вениамин – Галаадым.
20 Пленыш наҥгайыме Израиль эрге-влак
Ханаан мландым Сарепта марте сеҥен налыт,
а Иерусалим гыч наҥгайыме
да кызыт Сефарадыште илыше-шамыч
Кечывалвел мландын олаж-влаклан оза лийыт.
21 Сеҥыше-влак Сион курыкыш кӱзат,
Исавын курыкыштыжо судитлаш тӱҥалыт,
тунам Господь Шкеак кугыжа лиеш.
Глава 1