Выбрать язык
Книги Ветхого Завета
Книги Нового Завета
с русским текстом1 Господь Юмо мылам тыгай кончымашым ончыктен: теве ончылнем – кӱшӧ саскам темыме комдо.2 Тудо йодын: «Мом тый ужат, Амос?» Мый вашештенам: «Кӱшӧ саскам темыме комдым». Тунам Господь мылам каласен: «Мыйын Израиль калыкемлан мут кучыктымо жап толын шуын.*а Тетла Мый тудын сулыкшым ом кудалте.3 Полатыште мурымо муро-влак тудо кечын мӱгырен шортмашыш савырнат, – ойла Господь Юмо. – Колышо кап шуко лиеш, нуным чыла вере шыпак кышкаш тӱҥалыт.
4 Колыштса тидым, йорло-влакым темдыше,
элысе незер-влакым пытарыше-шамыч!
5 Те ойледа: ”Кунам у тылзе пайрем эртен кая?
Мыланна киндым ужалаш кӱлеш!
Кунам шуматкече эртен кая?
Ме угыч шурным ужалена!
Ефам иземдена, сикльым кугемдена –
чын огыл виса дене ондалена!
6 Незерым шийлан,
йорло еҥым ик мужыр йолчиемлан налына.
Ме арвамат кинде семын ужален кертына!”»
7 Мо дене Иаков кугешнен, тидын дене Господь товатлен:
«Мом нуно ыштеныт, нимомат нигунам ом мондо!
8 Тидын деч мланде ок чытырналт мо?
Тушто илыше кажне еҥ ок ойгане мо?
Пӱтынь мланде Нил семын нӧлталтеш,
Египетысе эҥер семын шарлаш да пучаш тӱҥалеш.
9 Тудо кечын, – ойла Господь Юмо, –
Мый тыге ыштем:
кече тура кечывалым шинчеш,
кечывал кечын мландым пычкемыш леведеш.
10 Пайремда-влакым ойгыш савырем,
чыла мурыдам – шортмо мурыш.
Чылаланда Мый чоштыра вургемым чиктыктем,
вуйысо ӱпдам нӱжыктем,
пуйто ик шкет эрге верч шортыда –
чыла тидын мучашыже кочо лиеш.
11 Тугай жап шуэш, – ойла Господь Юмо, –
кунам Мый мландымбаке шужымашым колтем –
киндым кочмо шумым огыл,
вӱдым йӱмӧ шумым огыл,
а Господьын шомакшым колмо шумо шужымашым.
12 Тунам ик теҥыз деч вес теҥыз деке,
йӱдвел гыч эрвелыш перныл кошташ,
Господьын шомакшым кычалаш тӱҥалыт,
но тудым огыт му.
13 Мотор ӱдыр ден рвезе-влак
вӱд йӱмӧ шумо деч лунчыргат,
14 вет нуно Самарийын шояк юмыж дене товатлен ойлат:
”Тыйын юмет дене товатлем, Дан”
але ”Вирсавийыш кайыше корно дене товатлем”.
Нуно камвозыт да тетла огыт кынел».
*а 8:2 «Толын шуын» – еврей текстыште ’кӱын шуын’.
Глава 8