Выбрать язык
Книги Ветхого Завета
Книги Нового Завета
с русским текстом1 Господь Юмо мылам тыгай кончымашым ончыктен: теве Тудо шурнышырчык тӱшкам ямдыла. Тиде кугыжан пай шудыжым солымо деч вара, кайшудо*а кушмо годым, лийын.2 Кунам шурнышырчык-влак шудым йыклык кочкын пытареныт, мый кычкыралынам: «Господь Юмем, чамане! Иаков тукым кузе илен лектеш? Тудо тыгай изи!»3 Тунам Господь шонен пыштымыжым вашталтен. «Тиде ок шукталт», – Тудо каласен.
4 Вара Господь Юмо мыланем тыгай кончымашым ончыктен: теве Тудо судым ышташ тулым ӱжеш. Тиде тул кугу вӱд келгытым да мландын икмыняр ужашыжым пӧжген.5 Тунам мый каласенам: «Господь Юмем, тидым ит ыште! Иаков тукым кузе илен лектеш? Тудо тыгай изи!»6 Господь шонен пыштымыжым вашталтен. «Тидат ок шукталт», – Тудо каласен.
7 Тидын деч вара Тудо мыланем тыгай кончымашым ончыктен: теве Господь воткандыра полшымо дене чоҥымо пырдыж воктене шога, кидыштыже – воткандыра.8 Господь мый дечем йодын: «Мом тый ужат, Амос?» Мый вашештенам: «Воткандырам». Господь каласен: «Шке Израиль калыкем коклашке Мый воткандырам сакалтем, тетла сулыкшым ом кудалте.
9 Исаакын кумалме кӱкшакаже-влак пустаҥдыме,
Израильын святой верже-влак шалатыме лийыт.
Иеровоам тукым ваштареш Мый керде дене шогалам».
10 Амасий, Вефиль гыч иерей, Израиль кугыжа Иеровоам деке тыге каласаш колтен: «Израиль калык коклаште Амос тыйын ваштарешет заговорым ямдыла. Мландына тудын ойлымыжым тетла чытен ок керт.11 Теве мом тудо ойла: ”Иеровоам керде деч кола, а Израиль калыкым шке мландыж гыч пленыш наҥгаят”».
12 Амослан Амасий тыге каласен: «Кай тышеч, ончыкужшо, Иуда мландыш курж! Кочкашет киндым тушто ыштен нал, пророк шомакым тушто ойло!13 А Вефильыште тетла пророк шомакым ит ойло. Тудо – кугыжан святой верже, кугыжанышын храмже».14 Амос Амасийлан вашештен: «Мый пророк омыл, пророк тунемше кокла гычат омыл. Мый шорыкым ашныше лийынам да ир смоква пушеҥгым куштенам.15 Но Господь мыйым кӱтӱчӧ паша гыч налын да каласен: ”Кай да Израиль калыкемлан пророк шомакым ойло”.16 Амасий, ынде Господьын шомакшым колышт. Тый мылам манат: ”Израиль ваштареш пророк шомакым ит ойло, Исаак тукым ваштареш ит ойлышт”.
17 Садлан Господь тыге ойла:
тыйын ватет оласе яжар лиеш,
эрге-ӱдырет-влак керде деч пытат,
мландетым висат да пайлат,
тый шкеже ару огыл калыкын мландыштыже колет.
А Израиль калык шке мландыж гыч наҥгайыме лиеш».
*а 7:1 Кайшудо – солымо деч вара кушшо шудо.
Глава 7