Библия
Выбрать язык
Книги Ветхого Завета
Книги Нового Завета
с русским текстом
ПРОРОК ОСИЙЫН КНИГАЖЕ
12 Глава
Господьым Израиль шукертсек ондала.1 Ефрем мардежым кӱтен коштеш,
кече мучко эрвел мардежым поктылеш,
шояк ден пызырымашым шукемда.
Ассирий дене тудо ойпидышым ышта,
Египетыш олив ӱйым нумалеш.
2 Иуда денат Господь судым ышта,
Иаковлан пашаже-влак верч мутым кучыкта,
мом ыштымыжлан пӧртылта.
3 Ава мӱшкырыштак тудо изажын йолтаганжым руалтен,
*а а кугу лиймекше, Юмо дене кучедалын.
4 Тыгак тудо Суксо дене кучедалын да сеҥен,
Иаков шортын да Суксым сӧрвален.
Господь тудым Вефильыште муын,
тушто мыланна ойлен.
5 Господь – Саваоф Юмо,
Тудын лӱмжӧ – Мый Улам [Яхве].
6 Тугеже шке Юмет деке пӧртыл,
порылык ден чынлыкым шуктен шого
да шке Юметлан инанен иле.
7 Хананей купечын кидыштыже шояк виса,
тудо ондалкалаш йӧрата!
*б8 Тыге Ефрем ойла:
«Мый поенам, шуко погым погенам.
Чыла пашаштем нимогай осалым огыт му,
нимогай сулыкем уке».
9 «Египет мландыште лийме жапет гычак
Мый тыйын Господь Юмет улам.
Ончычсо кечыласе семын
Мый тыйым угыч омашыш илаш пуртем.
10 Мый пророк-влаклан ойленам,
нунылан шуко кончымашым пуэнам,
нунын гоч туштен каласенам».
11 Галаад осал дене темын,
сандене тушто илыше-шамыч пытарыме лийыныт.
Галгалыште надырлан ӱшкыж-влакым конденыт,
жертвенникышт куралме пасусо кӱ ораш савырненыт.
12 Иаков Сирийыш куржын,
ватым налаш манын, Израиль пашам ыштен,
ватылан верч тудо шорыкым кӱтен.
13 Пророкын кидше дене Господь
Египет гыч Израильым луктын,
пророкын кидше дене тудым арален.
14 Ефрем Господьым чот шыдештарен.
Йоктарыме вӱр верч Господь тудлан пӧртылта,
мыскылымыжлан мут кучаш шогалта.
*а 12:3 Ончо: Тӱҥ 25:26, 32:22-32.
*б 12:7 Тыште, очыни, Израиль (вес семынже Ефрем) ондалаш йӧратыше хананей пошкудыж-влак дене таҥастаралтеш.
Глава 12
