Библия
Выбрать язык
Книги Ветхого Завета
Книги Нового Завета
с русским текстом
ПРОРОК ОСИЙЫН КНИГАЖЕ
9 Глава
Сулыкшо-влаклан Израиль мутым кучаш тӱҥалеш.1 Ит йывырте, Израиль, моло калык семын ит куане,
вет тый шке Юмет деч кораҥынат да яжарланет,
кажне идымыште яжарланыметлан пӧлекым налаш йӧратет.
2 Идым да виноградым темдыме вер
тиде калыкым огыт пукшо,
виноград вӱдышт нунын ок лий.
3 Господьын мландыштыже нуно огыт код:
Ефрем Египетыш пӧртылеш,
Ассирийыште ару огыл кочкышым кочкаш тӱҥалеш.
4 Господьлан нуно йошкар арака надырым тетла огыт кондо,
надырышт-влак Тудлан келшыше огыт лий.
Нине надыр-влак нунылан
колышо верч ойгырен кочмо кинде гай лийыт:
кӧ тудым кочкеш – амырга.
Нунын киндышт – шкаланышт гына,
Господьын пӧртышкыжӧ тудо ок пуро.
5 Мом ышташ тӱҥалыда пайрем кечын,
Господьын пайрем кечылаже годым?
6 Пытарымаш деч куржын утледа гынат,
тендам Египет пога, а Мемфис тендам тоя.
Ший поянлыкдан озаже почкалтыш лиеш,
омаш олмыштыда коршаҥге кушкеш.
7 Мут кучымо кече-влак толыныт,
пашаланда пӧртылтымӧ кече-влак шуыныт –
тек тидым Израиль пала!
Сулыкда тендан пеш шуко,
ужмышудымашда пеш кугу,
садлан те пророкым аҥыралан шотледа,
Юмын Шӱлышан айдемым ушдымо маныда.
8 Ефремым оролышо пророк – Юмо дене пырля,
но чыла корныштыжо тудым кайык кучышын оптышыжо вуча,
тудын Юмыжын пӧртыштыжӧ – ужмышудымаш.
9 Гива годымсо семын
*а нуно чот пужленыт.
Юмо шарналта осал пашаштым,
сулыкыштлан мутым кучыкта.
10 «Ир мландыште виноградым мумо семын
Мый Израильым муынам,
смоква пушеҥгыште икымше саскам ужмо семын
Мый ача-кочада-влакым ужынам.
Но нуно Ваал-Фегорыш каеныт
да шкеныштым полган юмылан пуэныт:
кӧн деке нуно шӱмаҥыныт,
шкештат тудын гаяк йырнык лийыныт.
11 Ефремын [йочам ыштыме] чапше
кайык семын чоҥештен кая:
йочам ыштымаш, мӱшкыраҥмаш да тӱлаҥмаш огыт лий.
12 Йоча-влакым ончен куштат гынат,
Мый нуным икте кодде шупшын налам.
Ойго лиеш нунылан,
кунам Мый нунын дечын кораҥам!
13 Мый Ефремым Тир гайым ужынам,
тудым сылне вершӧреш шындыме,
но Ефрем шке йочаже-влакым пуштедыше-влак деке луктеш.
*б14 Пӧртылтӧ нунылан, Господь!
Мом Тый нунылан пуэт?
Пу нунылан йочам ыштен кертдыме авагудым
да кошкышо чызым.
15 Чыла осалышт нунын Галгалыште:
тушто Мый нунын дек ужмышудымо лийынам.
Ыштыме осал пашаштлан
Мый нуным шке пӧртем гыч поктен луктам.
Мый нуным тетла ом йӧрате,
вет онышт ӱскырт улыт.
16 Ефремым сӱмырен кудалтыме!
Вожшо тудын кошкен,
саскам тетла ок кондо.
Нуно шочыкташ тӱҥалыт гынат,
шӱм йымалне нумалме йочаштым Мый пуштам».
17 Мыйын Юмем нуным Шкеж деч кораҥда,
вет нуно Тудым колыштын огытыл,
сандене калык-влак коклаште перныл коштшо лийыт.
*а 9:9 Ончо: Суд 19:22-30.
*б 9:13 Еврей текстыште тыште мом возымым умылаш неле.
Глава 9
