Выбрать язык
Книги Ветхого Завета
Книги Нового Завета
с русским текстом1 Вара тиде еҥ мыйым мӧҥгеш храмын эрвелыш ончышо тӱжвал капкаж деке конден. Капка петырыме лийын.2 Господь мыланем каласен: «Тиде капка петырыме кодеш, тек тудым огыт поч. Тиде капка гоч ик айдемат ынже пуро, вет тудын гоч Господь, Израильын Юмыжо, пурен. Тудо петырыме кодеш.3 Эл вуйлатыше гына, Господь ончылно киндым кочкаш манын, капка оралте кӧргыштӧ шинчен кертеш. Тудо тушко ончыл кыдеж гоч пура да мӧҥгеш тыгак лектеш».
4 Вара тудо йӱдвел капка гоч мыйым храм ончыко конден. Мый ужынам: Господьын храмжым Тудын чапше темен, да мый кумык возынам.5 Господь мылам каласен: «Айдеме эрге! Чыла, мом шинчат ужеш да пылышет колеш, ушышкет пыште: Мый тылат Господьын пӧртшӧ шотышто палемдыме кӱштымаш ден пунчал-влакым каласем. Кӧмыт храмыш пурен кертыт, а кӧмыт святой верыш пурышаш огытыл – сайын шарне.6 Израильын вуянче калыкшылан каласе: ”Господь Юмо тыге ойла: сита тыланда, Израиль калык, йырнык пашам ыштылаш!7 Кунам Мыланем кочкышым – коя ден вӱрым – конденда, те Мыйын храмышкем йот еҥ-влакым, кӧмытын шӱмышт да капышт пӱчдымӧ,*а пуртенда да тудым шакшыленда. Тӱрлӧ йырнык пашада дене те Мыйын ойпидышем пудыртенда.8 Мыйын святой верыштем те служитлен огыдал, шке олмешда йот еҥ-влакым шогалтенда”.9 Тыге Господь Юмо ойла: пӱчдымӧ шӱм ден пӱчдымӧ капан нимогай йот еҥ, кеч тудо Израиль эрге-влак коклаште ила, Мыйын святой верышкем пурышаш огыл.
10 А Израильын чын корно гыч кораҥмыж жапыште Мый дечем кораҥше левит-шамыч, кӧмыт, Мыйым коден, шояк юмо-влак почеш каеныт да йомын коштыныт, шке сулыкыштлан мутым кучат.11 Но Мыйын святой верыштем нуно служитлен кертыт – храм капкам оролаш, храм пелен тӱрлӧ сомылым шукташ тӱҥалыт. Нуно калыкын йӱлалтен пуымо да моло надыржым шӱшкылаш, калыклан полшен шогаш тӱҥалыт.12 Вет нуно калыкын лӱмжӧ дене нунын шояк юмышт-влаклан служитленыт да Израиль калыклан сулыкыш пураш амал лийыныт, сандене Мый нунын ӱмбаке кидем нӧлталынам, – ойла Господь Юмо, – нуно шке осал пашаштлан мутым кучаш тӱҥалыт.13 Тек нуно Мый декем огыт лишем, Мыйын иерей-влакем огыт лий, нимо святой деке, нимогай эн святой деке огыт лишем. Ыштыме чыла йырныкыштлан нуно намысыш пурат.14 Мый нуным храмым оролаш, тушто ыштышаш чыла сомылым шукташ шогалтем.
15 А Левий тукым гыч улшо Садок урлыкысо иерей-влак, кӧмыт Израиль эрге-шамычын Мый дечем кораҥмышт жапыште Мыйын святой верыштем ӱшанлын служитленыт, нуно Мылам служитлаш ончыкем лишемын кертыт. Мыланем коя ден вӱрым кондаш манын, нуно Мыйын ончылнем шогаш тӱҥалыт, – ойла Господь Юмо. –16 Мыйын святой верышкем нуно гына пураш тӱҥалыт. Нуно гына, Мыланем служитлаш да чыла ыштышаш пашам шукташ манын, Мылам погымо ӱстел дек лишемын кертыт.17 Кӧргӧ кудывечын капкашкыже пурымышт годым нуно ӱмбакышт йытын вургемым чийышаш улыт. Кӧргӧ кудывечын капкаштыже але храм кӧргыштӧ служитлымышт годым нунын ӱмбалне меж вургем лийшаш огыл.18 Вуйыштышт йытын вуйчием лийшаш, йымал вургемыштат йытын дене ыштыме лийже. Мо пӱжвӱдым луктеш, тыгайым нуно чийышаш огытыл.19 А кунам тӱжвал кудывечыш калык деке лекташ кӱлеш, нуно служитлыме вургемыштым кудашшаш да святой пӧлемеш кодышаш улыт. Святой вургемышт деке тӱкнымӧ дене калык ынже святитлалт манын, нуно вес вургемым чийышаш улыт.20 Тек нуно вуйыштым огыт нӱжӧ, но кужу ӱпымат огыт кушто – нуно ӱпыштым пӱчшаш улыт.21 Кӧргӧ кудывечыш пурымо деч ончыч ик иереят аракам йӱшаш огыл.22 Нуно тулык ватым але ойырлышым марлан налшаш огытыл. Израиль калык гыч ӱдыръеҥым але иерейын тулык ватыжым гына марлан налын кертыт.23 Тек нуно Мыйын калыкем святой арверым святой огыл деч ойырен мошташ туныктат, мо ару огыл да мо ару – умылтарен шогат.24 Иерей-шамыч ӱчашымашым лукшо паша-влакым лончылышаш да кӱштымаш-влакем почеш судитлышаш улыт. Нуно Мыйын чыла пайремем шотышто закон ден пунчал-влакем шуктен шогышаш да шуматкече-влакемын святой улмыштым шотлен илышаш улыт.25 Колышо кап деке лишемме дене иерей шкенжым амыртышаш огыл. Лач ача ден аважлан, эрге ден ӱдыржылан, иза ден шольыжлан, марлан кайыдыме ака ден шӱжаржылан кӧра гына тудо шкенжым амыртен кертеш.26 Тидын деч вара, эрналтме йӱлам эртымеке, тудо эше шым кече вучышаш.27 Тудо кечын, кунам святой верыш кая да кӧргӧ кудывечысе святой верышке служитлаш пура, тудо сулык верч надырым кондышаш, – ойла Господь Юмо. –28 Иерей-влакын пайышт Мый улам. Нунылан Израильыште мланде ужашым ида пу, Мый нунын ужашышт улам.29 Кинде надыр, сулык верч надыр да титак верч надыр нунын кочкышышт лиеш. Тыгак Израильыште мом Господьлан посна ойырен пӧлеклат, тидат нунын лиеш.30 Надыр шотеш кондымо икымше саскада гыч эн сайже, чыла тӱрлӧ пӧлекда иерей-влакын лийыт. Икымше йоҥыштымо ложашдамат иерейлан пуыза, тунам пӧртда ӱмбалне суап лиеш.31 Кайык ден вольыкым, кудышт коленыт але нуным янлык кушкед пуштын – тыгай шылым иерей-влак кочшаш огытыл.
*а 44:7 Пӱчдымӧ шӱм – тыште Юмым колыштдымо еҥ-влак нерген ойлалтеш.
Глава 44