Выбрать язык
Книги Ветхого Завета
Книги Нового Завета
с русским текстом1 Вара тудо мыйым эрвелыш ончышо капка деке конден,2 да мый эрвечын лишемше Израиль Юмын чапшым ужынам. Тудын йӱкшӧ кугу вӱд лӱшкымӧ гай лийын, мланде Тудын чапше дене волгалтын.3 Тиде кончымаш ондак ужмемсе гай лийын, чылт тунам ужмемсе гаяк, кунам мый олам пытарымым ончаш толынам – тыгаяк кончымашым мый Ховар эҥер воктене ужынам. Мый кумык возынам.4 Господьын чапше эрвелыш ончышо капка гоч храмыш пурен.
5 Шӱлыш мыйым нӧлталын да кӧргӧ кудывечыш пуртен. Мый ужынам: Господьын чапше пӱтынь храмым темен.6 Саде еҥ воктенем шоген, да мый храм гыч мылам Ала-кӧн ойлымыжым колынам.7 Тудо каласен: «Айдеме эрге! Тыште Мыйын престол верем, йолым шындыме верем. Тыште Мый израиль эрге-влак коклаште курымеш илаш тӱҥалам. Израиль калык да тудын кугыжаже-влак тетла Мыйын святой лӱмем ны яжарланымаш дене, ны колышо кугыжа-шамычлан шогалтыме чапкӱ-влакым шотлымышт дене шӱктараш огыт тӱҥал.8 Нуно шке лондемыштым Мыйын лондемем воктене, омсаянакыштым Мыйын омсаянакем воктене шогалтеныт – Мыйын да нунын коклаште лач пырдыж лийын! Мыйын святой лӱмем нуно йырнык пашашт дене шӱктареныт, сандене Мый нуным кугу шыдем дене пытаренам.9 А ынде нуно Мыйын ончылнем яжарланымыштым чарнат, колышо кугыжа-влакын капыштым кораҥдат, да Мый нунын коклаште курымеш илаш тӱҥалам.
10 Айдеме эрге! Тиде храм нерген Израиль калыклан каласкале – тек нуно осал пашашт деч вожылыт да тиде храмын могай улмыжым шымлат.11 Чыла мом ыштымышт деч вожылыт гын, нунылан храмын кузе чоҥалтмыжым, могай ужашла гыч шогымыжым, тудын пурымо ден лекме верлажым, нунын кузе коймыштым, тудын шотышто палемдыме кӱштымаш ден пунчал-влакым умылтаре. Чыла тидым нунын шинча ончылнышт возо. Тек нуно храмын кузе ышталтмыжым шарнат да тудын дене кылдалтше чыла пунчалым шуктен шогат.12 Теве храм шотышто закон: курык вуй да тудын йыр улшо кумдык – святой деч святой вер. Тиде – храм шотышто закон».
13 Теве жертвенникын кужу кынергут дене висыме кугытшо – тидыже тыглай кынергут деч ик сово лопкытлан кугурак: негызын*а кӱкшытшӧ – ик кынергут, лопкытшат – ик кынергут. Негызым чыла могырымат шеч лопкытан вая авырен. А жертвенникын кӱкшытшӧ тыгай лийын:14 мландыште улшо негыз гыч ӱлыл лондем марте – кок кынергут, ӱлыл лондемын лопкытшо – ик кынергут; ӱлыл лондем гыч кӱшыл лондем марте – ныл кынергут, а кӱшыл лондемын лопкытшо – ик кынергут.15 Жертвенник ӱмбал ныл кынергут кӱкшытан лийын, тушечын ныл тӱкӧ нӧлталт шоген.16 Тудо ныл лукан лийын: кужыт ден лопкытшо – латкок кынергут.17 Жертвенникын ӱмбал кумдыкшо латныл кынергут кужытан да латныл кынергут лопкытан лийын, тудым пел кынергут лопкытан вая авырен шоген. Тудын йырже ик кынергут лопкытан негыз лийын. Жертвенникыш кӱзымӧ тошкалтыш эрвел могырым шоген.
18 Тудо мыланем каласен: «Айдеме эрге! Господь Юмо тыге ойла: теве жертвенник шотышто кӱштымаш. Тудо кечын, кунам ӱмбалныже йӱлалтен пуымо надырым кондаш да ӱмбакше вӱрым йоктараш манын, тиде жертвенник чоҥымо лиеш,19 Левий тукым гыч улшо Садок урлыкысо иерей-влаклан, кӧмыт Мыланем служитлаш Мый декем лишемын кертыт, – ойла Господь, – сулык верч надырым кондаш кӱтӱ гыч самырык ӱшкыжым пу.20 Тудын вӱржым нал да жертвенникын ныл тӱкыжым, ӱмбал кумдыкшын ныл лукшым да ваяжым шӱралте. Тыге тый жертвенникым эрныктет да святитлет.21 Сулык верч кондымо ӱшкыжым нал да храм кумдыкысо палемдыме верыште, святой вер деч ӧрдыжтӧ, йӱлалте.22 Вес кечын сулык верч надырлан кӱтӱ гыч экшыкдыме казатагам кондо, тек жертвенникым ӱшкыж дене эрныктыме семынак эрныктат.23 Жертвенникым эрныктымеке, кӱтӱ гыч экшыкдыме самырык ӱшкыж ден тагам кондо.24 Нуным Господь ончыко шогалте, тек иерей-влак ӱмбакышт шинчалым шават да Господьлан йӱлалтен пуымо надыр шотеш кондат.25 Сулык верч надырлан кажне кечын ик казатага дене шым кече кондо, тек тыгак кажне кечын кӱтӱ гыч экшыкдыме ик ӱшкыж ден тагам кондат.26 Жертвенникым нуно шым кече эрныктышаш да святитлышаш улыт. Тыге тудо святой лиеш, да тудым кучылтын кертыт.27 Нине кече деч вара, кандашымше кечын да варажат, иерей-влак жертвенникыште тендан йӱлалтен пуымо надырда ден тауштымо надырдам кондаш тӱҥалыт. Тунам Мый тендан деке поро лиям, – ойла Господь Юмо».
*а 43:13 Негыз – тидым канаве манынат умылаш лиеш.
Глава 43