Выбрать язык
Книги Ветхого Завета
Книги Нового Завета
с русским текстом1 Мылам Господьын шомакше лийын:2 «Айдеме эрге, Израильын кӱтӱчыжӧ-влак ваштареш пророк шомакым ойло. Пророклен ойло, нунылан каласе: ”Тыге Господь Юмо ойла: ойго Израильын кӱтӱчыжӧ-влаклан, кӧмыт шкеныштым гына кӱтат! Кӱтӱчӧ-шамыч кӱтӱм кӱтышаш огытыл мо?3 Те эн сай шылым кочкыда, меж гыч ыштыме вургемым чиеда да ӧрдыктарыме шорыкым шӱшкылыда, а кӱтӱ нерген ода азаплане.4 Начарым те пеҥгыдемден огыдал, черлым паремден огыдал, сусыргышын сусыржым пидын огыдал, перныл коштшым пӧртылтен огыдал, йомшым кычалын огыдал. Те нунылан торжа да осал оза лийында.5 Кӱтӱчӧ деч посна нуно шаланен пытеныт, шаланымеке, тӱрлӧ янлыклан кочкыш лийыныт.6 Шорыкем-влак курыкла ден кӱкшӧ чоҥгаталаште йомын коштыт. Нуно мланде мучко шаланен пытеныт, нигӧ нуным ок кычал, муаш ок тырше.7 Сандене, кӱтӱчӧ-влак, Господьын шомакшым колыштса.8 Шкем дене товатлем, – ойла Господь Юмо, – шорык-шамычем нигӧ кӱтен огыл, нуно тӱрлӧ янлыклан кочкыш лийыныт. Кӱтӱчем-влак шорыкем-шамычым кычалын огытыл. Нуно Мыйын шорыкем-влакым огыл, а шкеныштым гына кӱтеныт.9 Сандене, кӱтӱчӧ-влак, Господьын шомакшым колыштса:10 Тыге ойла Господь Юмо: Мый нине кӱтӱчӧ-шамыч ӱмбаке толам, шорыкем-влак верч нуным мут кучаш шогалтем. Мый нунылан тетла шорык-шамычем кӱташ ом пу, нуно шкеныштым тетла огыт кӱтӧ. Мый шорык-влакем нунын умшашт гыч утарем, тетла шорыкем-шамыч нунылан кочкыш огыт лий.
11 Вет Господь Юмо тыге ойла: Мый Шке шорыкем-влакым кычал муам да нуным ончен лектам.12 Кӱтӱжӧ шаланен кайымеке, шорыкшо-шамычым кычал коштшо кӱтӱчӧ семын Мыят шке шорыкем-влакым кычалаш да нуным ончаш тӱҥалам. Чыла вер гыч, кушко нуно пылан да пычкемыш кечын шалатен колтымо лийыныт, Мый нуным луктам.13 Чыла калык кокла гыч луктам, тӱрлӧ эл гыч погем да шке мландышкышт кондем. Мый нуным Израильын курыклаштыже, эҥер-влак воктене, тиде мландын чыла илыме верыштыже кӱташ тӱҥалам.14 Мый нуным ужар олыкышто кӱташ тӱҥалам, нунын кӱтымӧ верышт Израильын кӱкшӧ курыклаштыже лиеш. Тушто нуно сай верлаште канаш, Израиль курык-влакын ужар шудан олыклаштыже кочкын кошташ тӱҥалыт.15 Шорык-шамычем Мый Шке кӱташ тӱҥалам да нуным кандарем, – ойла Господь Юмо. –16 Мый йомшо шорыкым кычал муам, йомын коштшым пӧртылтем, сусыргышын сусыржым пидам, начарым пеҥгыдемдем, а ӧрдышӧ ден вуянчым пытарем. Мый нуным чынлын кӱташ тӱҥалам.
17 А тендан шотышто, Мыйын кӱтӱэм, теве шомакем, – Господь Юмо тыге ойла. – Мый шорык-влак коклам, тага ден казатага коклам судитлаш тӱҥалам.18 Сай олыкышто кочкын коштмыда тыланда шагал мо? Молан те кодшо шудым йолда дене тошкеда? Ару вӱдым йӱмыда тыланда шагал мо? Молан те кодшо вӱдым йолда дене румбыкаҥдеда?19 Сандене моло шорыкемлан йолда дене тошкымо шудым кочкашышт да румбыкаҥдыме вӱддам йӱашышт перна.
20 Садлан Господь Юмо нунылан тыге ойла: ӧрдышӧ шорык ден явык шорык коклам Мый Шке судитлем.21 Шӱкен лукмешке, те ваче да ӧрдыжда дене шӱкедылыда, вийдыме-влакым тӱкыда дене ӧргеда.22 Но Мый шорык-шамычем утарем, тетла нуно янлыклан кочкыш огыт лий, а шорык-влак коклам Мый Шке судитлаш тӱҥалам.23 Нуным кӱташ Мый ик кӱтӱчым – Давид тарземым – шогалтем. Тудо нуным кӱташ тӱҥалеш, нунын кӱтӱчышт лиеш.24 Мый, Господь, нунын Юмышт лиям, а Мыйын Давид тарзем нунын онышт лиеш. Тидым Мый, Господь, каласенам.
25 Мый тудын дене тыныс ойпидышым ыштем да тиде мланде гыч чыла осал янлыкым поктен колтем – тунам шорык-влак лӱдыкшӧ деч посна ир мландыште илен да чодыраште мален кертыт.26 Мый нунылан да святой курыкем йыр улшо кундемлан суапландарымашем пуэм. Мый нунылан шке жапыштыже йӱрым колташ тӱҥалам, тудо суапландарымаш йӱр лиеш.27 Пушеҥге-шамыч саскам пуаш тӱҥалыт, тыгак мланде шке лектышыжым пуа. Еҥ-влак шке мландыштышт лӱдыкшӧ деч посна илаш тӱҥалыт. Кунам Мый нунын омыташтым шалатем да куллыкышто кучышо-шамычын кидышт деч утарем, нуно пален налыт: Мый Господь улам.28 Вес калык-влак нуным тетла огыт аге, янлык-шамыч нуным тетла огыт коч. Нуно тыныслын илаш тӱҥалыт, нигӧ нуным лӱдыкташ ок тӱҥал.29 Мый нунылан чапле лектышым пуэм, мландыштышт тетла нигӧ шужен ок коло, вес калык-влакын мыскылымыштым тетла чыташышт ок логал.30 Нуно пален налыт: Мый, нунын Господь Юмышт, пеленышт улам, а нуно, Израиль эрге-шамыч, Мыйын калыкем улыт, – ойла Господь Юмо. –31 Те Мыйын шорыкем, Мыйын олыкыштем улшо кӱтӱэм улыда. Те айдеме улыда, а Мый тендан Юмыда улам,” – ойла Господь Юмо».
Глава 34