Выбрать язык
Книги Ветхого Завета
Книги Нового Завета
с русским текстом1 Мыланем Господьын шомакше лийын:2 «Айдеме эрге! Израиль калыклан туштым тушто, тыге туштен ойло.3 Каласе нунылан: ”Тыге ойла Господь Юмо:
Кугу шулдыран, вужга кужу пунан, олача тӱсан,
кугу арыслангайык Ливан курыкыш чоҥештен толын.
Тудо кедр вуйым тодылын,
4 эн кӱшыл ужашыжым кӱрлын
да Ханаан мландыш наҥгаен,
купеч-влакын олашкышт конден.
5 Вара арыслангайык тиде мландысе кичкым налын
да шертньым шындыме семын
кугу вӱд воктене сай мландыш шынден.
6 Тудо кушкын, виноград вондерыш савырнен –
лийын лапка, но одарле.
Укшыжо-влак арыслангайык дек шуйненыт,
а вожшо келгыш каен.
Тыге вондер кушкын,
игым колтен да укшлажым шарен.
7 Но лийын эше вес кугу арыслангайык –
кугу шулдыран, вужга пунан.
Саде вондер шке вожшым тудын дек колтен,
укшлажым тудын дек шуен –
кайык тудым шке пакчаж гыч йӱкта шонен.
8 А вет вондер сай мландыште, кугу вӱд воктене шындыме лийын,
сандене тудо укшлажым шарен, саскам конден
да чапле вондер лийын кертын!”
9 Каласе: ”Тыге ойла Господь Юмо:
умбакыжым тудо воранен кертеш мо?
Тудо вожшыге лукмо ок лий мо?
Чыла саскаже кӱрышт налме ок лий мо?
Тунам тудо мерча, чыла нӧргӧ укшыжо кошка.
Тудым вожге лукташ кугу вий да шуко калык огыт кӱл.
10 Тудым шындыме гынат, воранен кертеш мо?
Изи эрвел мардеж пуалмекак, тудо ок кошко мо?
Кушто кушкын шогалын – туштак пыта”».
11 Мыланем Господьын шомакше лийын:12 «Йод тиде вуянче калык деч: ”Мом тиде ончыкта, огыда пале мо?” Каласе нунылан: ”Вавилон кугыжа Иерусалимыш толын, тудын кугыжаж ден онжо-влакым пленыш налын да шкеж деке Вавилоныш наҥгаен.13-14 Кугыжа тукым гыч тудо ик еҥым ойырен налын, тудын дене ойпидышым ыштен да товатмутым пуыктен. Тиде кугыжаныш тудлан мут колыштшо лийже, вуйым ынже нӧлтӧ да ойпидышым пеҥгыдын шуктен шогыжо манын, тудо пеленже тыгак элысе чыла тӧрам наҥгаен.15 Но тиде еҥ Вавилон кугыжа ваштареш шогалын да, имне-влак ден кугу сарзывийым пуышт манын, шке уверзыже-шамычым Египетыш колтен. Тудым воранымаш вуча мо? Тыге ыштыше утлен кертеш мо? Ойпидышым пудыртымеке, тудо илыше кодеш мо?16 Шкем дене товатлем, – ойла Господь Юмо, – тудо Вавилонышто кола, саде кугыжан элыштыже, кӧ тудым престолыш шынден, кӧлан пуымо товатмутшым тудо пудыртен, кӧн дене ыштыме ойпидышым кӱлдымыш луктын.17 Кунам еҥ-влакым пытараш йырым-йыр мланде кӱкшака-влак нӧлталме да сеҥаш полшышо чоҥеж-шамыч чоҥымо лийыт, тиде сарыште тудлан фараонат кугу сарзывийже да шотлен пытарыдыме еҥже-влак дене ок полшо.18 Товатмутым тудо кӱлдымыш луктын, ойпидышым пудыртен. Тудо сӧрен да теве кузе ыштен! Тудо мут кучыктыде ок код!
19 Садлан Господь Юмо тыге ойла: Шкем дене товатлем! Мыйын товатмутем, кудым тудо кӱлдымыш луктын, да Мыйын ойпидышем, кудым тудо пудыртен, Мый тудын вуй ӱмбакше савырем.20 Мый ӱмбакше шке вапшем шуэм, да тудо тушко логалеш. Мый тудым Вавилоныш наҥгаем да Мыланем ӱшанле огыл улмыжлан судитлем.21 Тудын куржын утлышо еҥже-влак керде деч камвозыт, нунын кокла гыч илен кодшыжо-шамыч чыла велыш шалатен колтымо лийыт. Тунам те пален налыда: тидым Мый, Господь, ойленам”».
22 Тыге ойла Господь Юмо: «Мый кӱкшӧ кедрын вуйжым налам да мландыш шындем. Эн кӱшыл ужаш гыч Мый нӧргӧ укшым тодылам да кӱкшӧ, кугу курык ӱмбалне шындем.23 Израильын кӱкшӧ курыкешыже Мый тудым шындем. Тудо укшлам колта, саскам конда да чапле кедр лиеш. Тӱрлӧ кайык тудын йымалныже верлана, укшлажын ӱмылыштыжӧ илаш тӱҥалеш.24 Чодырасе чыла пушеҥге пален налеш: Мый, Господь, кӱкшӧ пушеҥгым лапкаҥдем, лапка пушеҥгым кӱкшемдем. Ужар пушеҥгым Мый коштем, а кукшо пушеҥгым пеледшым ыштем. Мый, Господь, тыге каласенам да тыгак ыштем!»
Глава 17